"ვისაც მაღალი გამავლობის მანქანები გვყავს, ამ ხალხს მაქსიმალურად უნდა დავეხმაროთ" გურიაში ვითარება კვლავ რთულია, გუშინ თავდაცვის ძალების ჩაერთნენ, სოფლების ძალიან დიდი ნაწილი მოწყვეტილია გარე სამყაროს, ვერ მყარდება კომუნიკაცია, ამ კუთხით ძალიან ბევრია სამუშაო. "ტექნიკა მობილიზებულია იმისათვის, რომ მაქსიმალურად აღდგეს კავშირი კონკრეტულ სოფლებთან და ამაზე უკვე ამ მომენტიდან განახლდება აქტიური მუშაობა, ასევე, დაგვჭირდება მარაგების მობილიზება, როგორც მედიკამენტების, ასევე სურსათისა და შეშის - გათბობისთვის და ამასთან დაკავშირებითაც ვიმუშავებთ. მთლიანობაში, გეგმა არსებობს, ვითარება რთულია, გამოწვევა - ძალიან ბევრი, თუმცა ყველაფერი გაკეთდება იმისათვის, რომ მაქსიმალურად ვიმუშაოთ ყველა პრობლემის გადაჭრაზე”, - განაცხადა პრემიერმა ირაკლი კობახიძემ. სოციალურ ქსელში არაერთი ადამიანი ითხოვს დახმარებას. ხალხს აქტიურად ეხმარებიან მოხალისეები. ოზურგეთელი ქრისტი ორაგველიძე თავისი მანქანით დადის და მოსახლეობას დახმარებას უწევს. მის მსგავსად, ჩოხატაურში დადიან მისი მეგობრები და მოხალისეები მაქსიმალურად ეხმარებიან ადამიანებს. სოციალურ ქსელში ქრისტინემ თავისი საკონტაქტო ნომერი დაწერა და არაერთი შეტყობინება მიიღო. ქრისტი ორაგველიძე: - ძალიან მძიმე მდგომარეობაა, ასეთი მძიმე ვითარება, რაც აქ ახლა ხდება, მე არ მახსოვს. მაქსიმალურად ვეხმარებით ადამიანებს მე და ჩემი მეგობრები. ხალხი გამოსავალს ვერ პოულობს. გუშინ ერთი ქალბატონის დედის გასვენება იყო ჩოხატაურში და ოზურგეთიდან იქ ვერ მიდიოდა. ბუნებრივია, წუხდა ამის გამო და დახმარება დეპუტატს სთხოვა. დეპუტატი მე დამიკავშირდა და ჩემი მანქანით წავიყვანე დედის გასვენებაში. ჩემი მეგობრები ნატანებში ეხმარებიან მოქალაქეებს. დღეს რამდენიმე ცხოველი გადავარჩინე. ჩავისვი მანქანაში ძაღლები და გადავარჩინე გაყინვას. ახლა ვარ ოზურგეთში, ტექნიკა მუშაობს, თუმცა ცოტაა ეს ტექნიკა და არ ყოფნის. დიდი რაოდენობაა თოვლის, ყველა მხრიდან დასათოვლია. ჯარის მანქანებიც დადის, სამაშველოც არის, სასწრაფოც დავინახე თოვლმავალი, მაგრამ ასევე ვნახე, სასწრაფო იყო ჩავარდნილი ჩოხატაურში. მართლაც უკიდურესად მძიმე მდგომარეობაა. ახლა ყველა უნდა ადგეს, მოხალისეები, რომლებსაც ჰყავთ მაღალი გამავლობის მანქანები და ამ ხალხს მაქსიმალურად დავეხმაროთ. სახლები ენგრევა ხალხს, რადგან გადათოვლას ვერ ახერხებენ. სოფლები მამაკაცებისგან თითქმის დაცარიელებულია, ან მოხუცები არიან, ან დედები ბავშვებით და მათი ოჯახი წევრები კი ემიგრაციაში არიან წასულები. ახლა ქალი მირეკავს და მეუბნება, რომ მამამისს სჭირდება დახმარება. მეტრნახევარი, გაუწმენდავი თოვლია მასთან და მამამისი მარტოა, ფეხი მოკვეთილი აქვს, სახლი კი ავარიულიაო. დახმარება სჭირდება, რომ სახურავი თოვლისგან გაიწმინდოს. რა გავაკეთო, ამხელა თოვლში ჩემი მანქანით ვერ შევალ. თან მამაკაცი სჭირდება, რომ სახურავი გადათოვლოს. ბევრს საკვები არ აქვს და მშიერია. ძალიან ბევრია ისეთი, რომელთანაც კომუნიკაცია ვერ ხერხდება, ქსელები არ იჭერს, უჭირს. დენი არ არის და ტელეფონსაც ვერ ტენის ხალხი, მართლა კოშმარული ვითარებაა. ასეთი თოვა არ ვიცი, "პაჯეროთი" ძლივს დავდივარ, ქალაქშიც მიჭირს სიარული. რაღაც სოფლები იწმინდება, მაგრამ გარკვეულ სოფლებში 2 მეტრზე დიდია თოვლი და იქ ბურანები გვჭირდება, თოვლმავალები. მანქანით კი დავდივართ, სამაშველოს სადაც გავლილი აქვს, იმ გზებზე, მეც ვჭრი ჩემი მანქანით გზას, თუ თოვლი არის ერთი მეტრი და ცოტა მეტიც, ამას გავჭრი, მაგრამ უფრო დიდ თოვლს ვერ გაწმინდავ. ბურანები იქნებ გამოჩნდეს. სერიოზული მასშტაბის დახმარებაა საჭირო. მახსოვს, ბავშვობაში დიდთოვლობის დროს კაცები ერთმანეთს ეხმარებოდნენ და უთოვლავდნენ სახლებს, მაგრამ ახლა ვერ იპოვი აქ კაცებს, უმრავლესობა არ არის სოფელში. ამიტომ კარგი იქნება, თუ ფიზიკურად მოვლენ ისეთი მოხალისეები, რომლებიც სახლების გადათოვლაში დაეხმარებიან ხალხს. ყველა ამაზე წუხს დღეს, რადგან სახლები დაენგრევათ და ამაში სჭირდებათ ძირითადად დახმარება. (სპეციალურად საიტისთვის)
