„აქამდე ირაკლისთან ერთად ვაკეთებდით, ახლა ირაკლისთვის გავაკეთებთ!“ - "ბიბლუსის" მისია

"ბიბლუსი ჯგუფის" გენერალური დირექტორი ირაკლი გაგნიძე 42 წლის ასაკში, მძიმე სენთან ხანმოკლე ბრძოლის შემდეგ გარდაიცვალა. ეს უზარმაზარი დანაკარგია არა მხოლოდ მისი ოჯახისთვის, თანამშრომლებისთვის თუ მეგობრებისთვის, არამედ ქვეყნისთვისაც. სხვა ყველაფერთან ერთად, ირაკლი გაგნიძის წვლილი საქართველოში წიგნიერების გავრცელებაში შეუფასებელია. მას მეუღლე და ოთხი შვილი დარჩა. ირაკლი გაგნიძე თავისი თანამშრომლებისთვის გარდაცვალების შემდეგაც კი დიდი მოტივატორია. კერძოდ, "ბიბლუსის" წარმომადგენლები აცხადებენ, რომ ამ ტრაგედიის შემდეგ მათი მისია კიდევ უფრო განსაკუთრებული და მნიშვნელოვანი გახდა. &bdquo;არ მახსოვს, ირაკლის არ დაენახა თანამშრომლის მონდომება, მოტივაცია არ მიეცა და გუნდის წინაშე არ აღენიშნა მისი მიღწევა" რომან ანთიძე, "ბიბლუსი ჯგუფის" გენერალური დირექტორის მოადგილე: - ირაკლის მოულოდნელად მძიმე ონკოლოგიური დაავადება დაუდგინდა, რამაც დიაგნოზის დასმიდან თვე-ნახევარში ეს ადამიანი დაგვაკარგვინა. ირაკლის გარდაცვალება "ბიბლუსისთვის" და მთელი "პალიტრამედია ჰოლდინგისთვის" ენით აღუწერელი დანაკლისია - ის ამ კომპანიის მთავარი მამოძრავებელი ძალა იყო. ამ უმძიმეს პერიოდში განსაკუთრებულად ვიგრძენით ჩვენი მომხმარებლების გვერდში დგომა. უამრავმა ადამიანმა გაიზიარა ჩვენი ტკივილი - გვისამძიმრებენ სოციალური ქსელებით, სატელეფონო ზარებით, პირადადაც გამოთქვამენ მწუხარებას "ბიბლუსის" მაღაზიებში... როდესაც ირაკლი "ბიბლუსში" მოვიდა, მაშინ ის პატარა კომპანიას წარმოადგენდა, რომელიც პირველ ნაბიჯებს დგამდა დიდ ბიზნესში. იმ დროს წიგნის კითხვა არ იყო მაინცდამაინც პოპულარული ახალგაზრდებში და შესაბამისად, მასთან დაკავშირებული საქმიანობა პერსპექტიულ ბიზნესად არ მიიჩნეოდა. დღეს "ბიბლუსი" დიდი კომპანიაა, რამდენიმე ათეული მილიონი ლარის ბრუნვით. მისი გავრცელების არეალი კარგა ხანია საქართველოს გასცდა, დღეს მეზობელ ქვეყნებშიც გვყავს ბიზნესპარტნიორები, ასევე სლოვენიაში გვაქვს მაღაზია... ირაკლი უაღრესად ნიჭიერი ადამიანი იყო, რომელსაც არაჩვეულებრივი მენეჯერული უნარები და ბიზნესხედვა ჰქონდა. ასევე, გამორჩეული იყო თანამშრომლების მიმართ დამოკიდებულებით. ამ ყველაფრის გამო არაერთ თანამშრომელს უთქვამს უარი სამსახურის შეცვლაზე. ასეთი დელიკატური, დამნახავი, მამოტივირებელი ხელმძღვანელი არასდროს მინახავს, მიუხედავად იმისა, რომ ბევრ კომპანიაში მიმუშავია. არ მახსოვს, რომ ირაკლის არ დაენახა თანამშრომლის მონდომება, მოტივაცია არ მიეცა და გუნდის წინაშე არ აღენიშნა მისი მიღწევა. ირაკლი გაგნიძე იყო უაღრესად საინტერესო იდეების მაგენერირებელი, სიახლესა და ინოვაციებზე ორიენტირებული. სულ კითხულობდა, ეძებდა, პოულობდა და ცდილობდა სიახლეების დანერგვას, რათა "ბიბლუსი" უფრო წარმატებული და თანამედროვე ყოფილიყო. ამას მიაღწია კიდეც... მოულოდნელად წავიდა ამ ქვეყნიდან. ბოლო მომენტამდე არ გვჯეროდა მომხდარი ტრაგედიის, ისეთი ძლიერი და სპორტული ადამიანი იყო. გვეგონა მძიმე სენთან ბრძოლაშიც გაიმარჯვებდა... წარმოუდგენელი შოკია. ძალიან რთულია ასეთ დროს მუშაობა, მაგრამ ვაცნობიერებთ, რომ ყველაფერი უნდა გავაკეთოთ ასჯერ უკეთ, ვიდრე აქამდე - ისე, როგორც ირაკლი გაგნიძეს ეკადრებოდა. ცხადია, ყველა მის დაწყებულ პროექტს გააგრძელებს ირაკლი გაგნიძის გუნდი და კომპანია კვლავაც განვითარდება. კომპანია "ბიბლუსს" მნიშვნელოვანი მისია აქვს. ჩვენ ვთქვით, რომ აქამდე ირაკლისთან ერთად ვაკეთებდით, ახლა - ირაკლისთვის გავაკეთებთ! "ბიბლუსის" წარმატება და ბრენდად ქცევა სწორედ მისი დამსახურებაა..." ნათია აფციაური, "ბიბლუსის" თანამშრომელი: - ირაკლი განსაკუთრებული ადამიანი იყო. გვიჭირს მასზე წარსულში საუბარი... 12 წლის წინ, როცა "ბიბლუსში" მოვედი სამუშაოდ, ადმინისტრაცია სამოთახიან ბინაში ვიყავით განთავსებული - მაქსიმუმ 15 ადამიანი. დღეს "ბიბლუსი" უზარმაზარი კომპანიაა. მისი წარმატება და ბრენდად ქცევა სწორედ ირაკლი გაგნიძის დამსახურებაა... ძალიან რთულია ირაკლის გარეშე მუშაობის გაგრძელება. ერთადერთი, რაც ძალასა და შემართებას გვაძლევს, ის არის, რომ ახლა ირაკლისთვის უნდა გავაგრძელოთ მუშაობა. დარწმუნებული ვარ, ის ყოველთვის ჩვენ გვერდით იქნება... საოცარი ადამიანი იყო. თანამშრომელში თუ პოტენციალს დაინახავდა, ყველაფერს აკეთებდა, რომ მას განვითარების შანსი ჰქონოდა. აქ რომ მოვედი, ბუღალტრის ასისტენტი ვიყავი, დღეს "ბიბლუსი ჯგუფის" მთავარი ბუღალტერი ვარ და ეს ყველაფერი ირაკლის დამსახურებით მოხდა. როდესაც ასეთი ხელმძღვანელი გვყავდა, მხოლოდ გამარჯვებისა და წინსვლის უფლებას ვაძლევდით საკუთარ თავს და ეს ძალა ბოლომდე გაგვყვება. ირაკლი თანამშრომლებისთვის ცხოვრებაშიც დიდი დასაყრდენი იყო. მე პირადად ჯანმრთელობის პრობლემა მქონდა და საოცარი თანადგომა და მხარდაჭერა გამომიცხადა. "ასჯერ მეტად მოვინდომებთ, რომ გავამართლოთ ირაკლის ნდობა და იმედები" ნინო მელაშვილი, "ბიბლუსის" თანამშრომელი: - ფუფუნება იყო ირაკლისნაირ ხელმძღვანელთან მუშაობა. როდესაც საქმიანობა დავიწყეთ, საქართველოში წიგნის მაღაზიები იხურებოდა, ახლა კი "ბიბლუსი" 85 მაღაზიით არის წარმოდგენილი. ამაში ირაკლის ხელმძღვანელობით, მთელი გუნდის დიდი შრომაა ჩადებული. ჩვენი წამოწყება გადამდები აღმოჩნდა სხვებისთვისაც - გამომცემლობები გაფართოვდნენ, ეს სტამბებზეც აისახა და საერთო ჯამში, ქვეყნის ეკონომიკაზე დადებითი გავლენა მოახდინა. ირაკლი არ იმჩნევდა ავადმყოფობას და საქმიანი კომუნიკაცია გვქონდა ბოლომდე. ახალი წელი მივულოცეთ ერთმანეთს, სამომავლო გეგმების განხორციელებისთვის ვემზადებოდით, თუმცა... ყველა გეგმას აუცილებლად განვახორციელებთ და ასჯერ მეტად მოვინდომებთ, რომ გავამართლოთ ირაკლის ნდობა და იმედები. თანამშრომლებისთვის ისეთი მოტივატორი იყო, რომ გეგონა, მთებს გადადგამდი. ყველა თანამშრომელთან ჰქონდა კომუნიკაცია, თითოეულის სახელი იცოდა და მნიშვნელობა არ ჰქონდა, ვინ რა პოზიციაზე იყო - ყველას აზრი და იდეა აინტერესებდა. მე პირადად კონსულტანტის პოზიციიდან დავიწყე მუშაობა და დღეს კომპანიის კომერციული მიმართულების ხელმძღვანელი ვარ. ირაკლიმ დიდი ნდობა გამომიცხადა და ეს ნდობა აუცილებლად უნდა გავამართლო.