"კვირის პალიტრა" საბუნე­ბისმეტყველო მეცნიერებათა აკადემიის ვიცე-პრეზიდენტს ალექსანდრე­ თვალჭრელიძეს ესაუბრა: - შეიძლებოდა თუ არა წინასწარ გამოცნობა, რაც მოხდა, რათა უფრო მომზადებულები დავხვედროდით სტიქიას? - დიახ, შეიძლებოდა. არსებობდა მოკლევადიანი მეტეოროლოგიური პროგნოზი­, რომ დიდთოვლობა იყო მოსალოდნელი და ადგილობრივი და ცენტრალური ხელისუფლებები მზად უნდა ყოფილიყვნენ. შტაბი 10 დღით ადრე უნდა შექმნილიყო. მუშაობა თოვის პირველივე­ დღეებიდან რომ დაწყებულიყო, ასეთი არაფერი მოხდებოდა. რა თქმა უნდა, იქნებოდა გართულებები, მაგრამ არა ამ მასშტაბის. გაწმენდა უნდა დაწყებულიყო მყისიერად - 10 სანტიმეტრის მოხსნა­ პირველივე წუთებიდან გაცილებით ადვილია­, ვიდრე 2 მეტრი და მეტი სიმაღლის თოვლის. სოფლებში ყოველთვის თოვის პირველივე წუთებში წმენდნენ ხოლმე გზას და არა მერე, როდესაც ჩამოწვება უზარმაზარი მასა. რაც ახლა მოხდა,­ არის დაუდევრობის, საგანგებო მდგომარეობის არასწორი მენეჯმენტის ბრალი. - რატომ ვერ ვაღწევთ უსაფრთხოების სისტემის ერთიან მექანიზმად მუშაობას? - არ არსებობს სტრატეგიული გეგმა, რომელიც უნდა იყოს მარტივი, ზუსტად განაწი­ლებული ვალდებულებებით - ყველამ უნდა იცოდეს, სად, როგორ იმუშავებს. ასეთი რამ არ არის იშვიათი შვეიცარიაში, საფრანგეთში, აშშ-ში, მაგრამ ასეთ შედეგებს არ იღებენ - იქ სისტემა საათივითაა აწყობილი. ჩვენთან კი პეტრემ არ იცის, რა ნიჩაბი აიღოს, რომელ ტრაქტორში ჩაჯდეს, საიდან დაიწყოს მუშაობა. ბრძანება არ არის, გეგმა არ არის, დაბნეულობაა მენეჯმენტში. 3 დღის შემდეგ დალაგდა ყველაფერი, მაგრამ ეს ძალიან გვიანია. - ასე მგონია, რაჭის ტრაგედიის დროს რომ გესაუბრეთ, ზუსტად იმავე ტექსტს მეუბნებით. რა იცვლება სტიქიიდან სტიქიამდე? - მე ამას 20 წელია ვამბობ, მას შემდეგ, რაც დევდორაკის ტრაგედია მოხდა, მაგრამ არავინ მისმენს. რა ვქნა?! არაეფექტურად იყენებენ ტექნიკას, მენეჯმენტშია პრობლემა და არა შესრულებაში. სტიქიის ზონაში მუშაობენ მაშველები, მოხალისეები, მძიმე ტექნიკა, ჯარი დაგვიანებით შეიყვანეს, მაგრამ ახლა ყველაფერს აკეთებენ, რისი შესაძლებლობაც აქვთ. ნებისმიერ სახელმწიფოს აქვს გეგმა, თუ როგორ უნდა მოიქცეს ექსტრაორდინარულ სიტუაციაში. მე მეჩვენება, რომ ჩვენს სახელმწიფოს ასეთი გეგმა არ გააჩნია. ჩვენ ჯერ ვუყურებთ მოვლენებს და მერე გმირულად ვუმკლავდებით. მადლობა ღმერთს, ჩვენი მეტეოროლოგიური სადგური მოკლევადიან პროგნოზს შესანიშნავად აკეთებს. იმის შესახებ რომ გურიაში, იმერეთსა და მთიან აჭარაში მოსალოდნელი იყო დიდთოვლობა, ცნობილი იყო, თუმცა პრევენცია არ ყოფილა. - ანუ რეაგირება ვიცით, მაგრამ პრევენციისთვის არც გეგმა გვაქვს, არც უნარები? - დიახ, ყველა თავის ჭკუაზე მუშაობს­. არ გვაქვს სინქრონული მოქმედების გეგმა. - თოვლი რომ დადნება, რას უნდა ველოდოთ? - შეიძლება 3 ტიპის გართულება­ გვქონდეს. თოვლის დნობის პირველი შედეგია ზვავი, მეორე - წყალმოვარდნა,­ წყალდიდობები და მესამე - პატარა მეწყრები. გარემოს დაცვის ეროვნულმა სააგენტომ უნდა განაცხადოს, სად არის ყველაზე დიდი საფრთხე. ახლავე უნდა ატარებდნენ მონიტორინგს, სად არის მოსალოდნელი ყველაზე რთული­ მოვლენები. ყოველი სოფლის მოსახლეობა­ უნდა იყოს გაფრთხილებული და საშიში ადგილებიდან გამოყვანილი. ისე კი არა, "112" რომ აცხადებს, იყავით ფრთხილადო. მე თბილისში მიგზავნიან შეტყობინებას, ფრთხილად იყავი, დასავლეთში დიდი თოვლიაო. გარემოს ეროვნული სააგენტოს ხალხმა უნდა დაიაროს სოფლები და მისცეს ერთმანეთისგან განსხვავებული მითითებები, სიტუაციისა და იმ ხიფათების მიხედვით, რომელიც არსებობს. სხვადასხვა სოფელში მეწყრულად სხვადასხვა ხიფათია. წინ გველოდება ისევ მოვლენები და მათთან გმირული გამკლავება. არ გამოვრიცხავ ამ ყველაფერს მსხვერპლიც მოჰყვეს. ამიტომ ჯობს ახლავე დაიწყონ მოქმედება.
