"ორგანიზაცია TrialWatch-ი, რომელიც უზრუნველყოფს უფასო იურიდიულ დახმარებას სიტყვის თავისუფლების მხარდასაჭერად მთელ მსოფლიოში, მონიტორინგს გაუწევს დამოუკიდებელი ქართველი ჟურნალისტის, "ბათუმელები"/ნეტგაზეთის დამფუძნებლისა და დირექტორის მზია ამაღლობელის სასამართლო პროცესს", - განაცხადა უფლებადამცველ ამალ კლუნისა და მსახიობ ჯორჯ კლუნის ფონდმა "სამარ­თლიანობისთვის". ამალ კლუნი ჯორჯ კლუნთან ერთად იმ ფონდის თანადამფუძნებელია, რომელიც­ 2016 წელს შეიქმნა და უზრუნველყოფს უფასო იურიდიულ მხარდაჭერას ადამიანის უფლებების დარღვევის მსხვერპლთათვის 40-ზე მეტ ქვეყანაში. ფონდის ორგანიზაციებია: TrialWatch, რომელიც აკონტროლებს სისხლის სამართლის სასამართლო პროცესს ჟურნალისტებისა და სხვა მოწყვლადი ჯგუფების წინააღმდეგ; Docket, რომლის თანამშრომლები იძიებენ მასობრივი სისასტიკის შემთხვევებს და იცავენ მსხვერპლთა ინტერესებს; ჭაგინგ ჟუსტიცე ფორ ჭომენ, რომელიც ეწინააღმდეგება დისკრიმინაციულ კანონებსა და სქესობრივი­ ნიშნით ძალადობას. ფონდის საქმიანობა ასევე მოიცავს­ იურიდიულ დახმარებას აფრიკაში, თანამშრომლობს მიშელ ობამასა და მელინდა ფრენჩ გეითსთან, რომელიც მხარს უჭერს მოზარდი გოგონების განათლებასა და გაძლიერებას. ფონდს სათავეში უდგას წარმოშობით ლიბანელი ბრიტანელი ამალ ალამუდინ კლუნი, ადვოკატი, რომელიც სპეციალიზებულია საერთაშორისო სამართალსა და ადამიანის უფლებებში, წარმოადგენს ადამიანის უფლებათა დარღვევების მსხვერპლებს ეროვნულ და საერთაშორისო სასამართლოებში. ამალ ალამუდინი საერთაშორისო მედიის ყურადღების ცენტრში მაშინ მოექცა, როდესაც 2014 წლის 27 სექტემბერს მსახიობ და რეჟისორ ჯორჯ კლუნზე იქორწინა. ცნობილი მექალთანის გული ლიბანელმა­ უფლებადამცველმა გაცნობისთანავე დაიპყრო. დღეს ქართველების ინტერესი ამ წყვილის მიმართ გაორმაგდა, რადგან სწორედ მათი ფონდი დაინტერესდა ჟურნალისტ მზია ამაღლობელის საქმით. ვინ არის ამალ კლუნი, ამ კითხვებზე პასუხის გაცემა მედიაში ამალის შესახებ სხვადასხვა­ სტატიის მიხედვით ვცადეთ. ქალი, სახელად „იმედი“ ამალ ალამუდინ კლუნი ბეირუთში, ლიბანში დაიბადა. მისი სახელი "ამალ" არაბულად "იმედს" ნიშნავს. გოგონა ორი წლის იყო, როდესაც მშობლები ემიგრაციაში ბრიტანეთში წავიდნენ, ასე გაერიდა ალამუდინების ოჯახი ლიბანის სამოქალაქო­ ომს. ამალმა იურიდიული განათლება დიდ ბრიტანეთსა და ამერიკის შეერთებულ შტატებში მიიღო, დაამთავრა ოქსფორდის უნივერსიტეტის სენტ-ჰიუს კოლეჯი, ნიუ-იორკის უნივერსიტეტის სამართლის სკოლა­ საერთაშორისო სამართლის, ექსტრადი­ციისა და ადამიანის უფლებების დაცვის­ სპეციალობით. ამალ კლუნის კლიენტებს შორის არიან WikiLeaks-ის დამფუძნებელი ჯულიან ასანჟი, უკრაინის ყოფილი პრემიერ-მინისტრი იულია ტიმოშენკო, მალდივის რესპუბლიკის ყოფილი პრეზიდენტი მოჰამედ ნაშიდი, აზერბაიჯანელი ჟურნალისტი ჰადიჯა ისმაილოვა, ეგვიპტელ-კანადელი ჟურნალისტი მუჰამედ ფაჰმი და სხვა ცნობილი პირები. 2024 წელს ამალმა მიიღო Legal 500-ის (მსოფლიოში წამყვანი ადვოკატები, რომლებიც სთავაზობენ მნიშვნელოვან პრაქტიკულ რჩევებს კანონებისა და რეგულაციების შესახებ) წლის ადვოკატის პრიზი, რაც აღიარება იყო საერთაშორისო სამართლის სფეროში შეტანილი წვლილისათვის. ქალბატონი კლუნი ხშირად იცავს მასობრივი სისასტიკის, მათ შორის გენოციდისა და სქესობრივი ძალადობის მსხვერპლთა და პოლიტპატიმრების ინტერესებს მთელ მსოფლიოში. ამჟამად ამალ კლუნი მარია რესას (ნობელის მშვიდობის პრიზის მფლობელი ჟურნალისტი, რომელსაც ათწ­ლეულობით თავისუფლების აღკვეთა ემუქრება ფილიპინებში ჟურნალისტური საქმიანობისთვის) ინტერესებს იცავს. "მარია რესა მამაცი ჟურნალისტია, რომელსაც დევნიან სიახლეების გაშუქებისა და ადამიანის უფლებების დარღვევების წინააღმდეგ ბრძოლისთვის. ჩვენ გამოვიყენ­ებთ ყველა ხელმისაწვდომ იურიდიულ საშუა­ლებას მისი უფლებების დასაცავად და ფილიპინებში პრესის თავისუფლებისა და სამართლის უზენაესობის დასაცავად", - აცხადებს ამალ კლუნი. 2025 წლის იანვარში ნობელის პრემიის მფლობელი ფილიპინელი ჟურნალისტი მარია რესა ჟურნალისტ მზია ამაღლობელის­ სასამართლო პროცესს გამოეხმაურა. მან პლატფორმა X-ზე გააზიარა პოსტები, რომლებსაც დართული აქვს მზია ამაღლობელის სასამართლო პროცესის ფოტოები, სადაც მან მარია რესას წიგნი "როგორ დავამარცხოთ დიქტატორი" მიიტანა. იურისტისა და მსახიობის სიყვარულის ამბავი ჯორჯ კლუნი ამალ ალამუდინის გაცნობის ამბავს ასე იხსენებს: "ამალს ჩემს სახლში შევხვდი - 2013 წლის ივლისში მეგობარმა მთხოვა, ჩემი ამხანაგი მოვა, კანში­ მიდის და გზად კომოზე შენთან დავპა­ტიჟებო. რა თქმა უნდა, დავთანხმდი,­ ასე გავიცანი ამალი. იმხანად ჩემთან მშობ­ლები იყვნენ სტუმრად. ამალის სტუმრობის­ დღეს მთელი საღამო ერთად გავატარეთ, ვსაუბრობდით, შემდეგ მეილი გამოვართვი, არც ვიცოდი, თუ დამთანხმდებოდა პაემანზე". წლების შემდეგ გამოცემა The Hollywood Reporter-ს მსახიობმა ამალთან ლონდონში პირველი პაემნის შესახებ უამბო: "საუცხოო პირველი პაემანი იყო. ერთად ვივახშმეთ, ადგილი ამალმა შეარჩია, ერთ-ერთ მოდურ და პრესტიჟულ ადგილას. როდესაც იქიდან­ გამოვედით, გარეთ, ალბათ, 50 პაპარაცი დაგვხვდა, მაგრამ ამალმა ჩემპიონივით გაართვა თავი ამ ამბავს". შემდეგ მოვლენები ძალიან სწრაფად განვითარდა - 2014 წლის თებერვალში კენიაში სამოგზაუროდ წავიდნენ. "ამალს ჟირაფები უყვარს, ამიტომ იმ ადგილას გავემგზავრეთ. მაშინდელი ფოტოც მაქვს, როდესაც ჟირაფს უღიმის, და იმ დღეს ვიფიქრე, ხელი უნდა ვთხოვო-მეთქი", - იხსენებს მსახიობი. კენიის შემდეგ იყვნენ სეიშელის კუნძულებზე, ტანზანიაში, ნიუ-იორკში. კლუნს დაგეგმილი ჰქონდა რომანტიკულ გარემოში ეთხოვა ხელი საყვარელი ქალისთვის, თუმცა ყველაფერი გეგმის მიხედვით ვერ წარიმართა: "ყველაფერი მოვამზადე, ჩემი საყვარელი სიმღერა ჩავრთე, ბეჭედი ხელში მქონდა, მუხლებზე დავდექი და ხელი ვთხოვე ამალს. გათვლილი მქონდა, რომ ზუსტად იმ რომანტიკული­ სიმღერის დროს უნდა დამთანხმებოდა ცოლობაზე, მაგრამ ამალი იმდენად შოკირებული იყო, რომ 20 წუთის შემდეგ თქვა თანხმობა, მე კი იმდენ ხანს მუხლებზე ვიდექი, თან სულ სხვა, არარომანტიკული სიმღერა დაიწყო ყველაზე მნიშვნელოვან მომენტში, როდესაც ამალი დამთანხმდა". 2014 წლის 27 სექტემბერს მათი ქორწილი­ ვენეციაში გაიმართა. "არავისთვის გვითქვამს, როდის და სად ვაპირებდით ქორწილს, მაგრამ მაინც გავარდა ხმა. კატერით მივედით ვენეციაში და როგორც კი ჩავსხედით, უამრავი პაპარაცი და ხალხი შემოგვეხვია. მაშინ ვიფიქრე, რა გვაქვს დასამალი, რამე გვაქვს სასირცხვილო-მეთქი? ავდექით და, ყველას, ვინც გველოდა, ხელი დავუქნიეთ და მივესალმეთ". 2018 წელს ჯორჯ კლუნი ამერიკის კინოინსტიტუტმა კინოინდუსტრიაში მიღწევებისთვის დააჯილდოვა. ღონისძიებაზე სიტყვით გამოვიდა ამალ კლუნი, რომელმაც რამდენიმე აბზაცში სრულად აღწერა მისი და ჯორჯის ცხოვრება: "როდესაც ჯორჯს შევხვდი, 35 წლის გახლდით და შეგუებული ვიყავი იმ აზრთან, რომ მარტოხელა დავრჩებოდი. როდესაც შეხვედრები დავიწყეთ, ძალიან მალე ვიგრძენი, რომ რაც არ უნდა მომხდარიყო, არავისთან მენდომებოდა ყოფნა ჯორჯის გარდა, ვერ ვიძინებდი, როდესაც ცალ-ცალკე გვიწევდა ყოფნა. ძალიან სასიამოვნო იყო როდესაც მის წერილებს ჩემს ჩანთაში ვპოულობდი. 5 წლის შემდეგაც ჩვენი შეხვედრიდან არაფერი შეცვლილა­. ის არის ადამიანი,­ რომლის მიმართ ჩემი აღფრთოვანება უცვლელია, ადამიანი, რომლის ღიმილიც ყოველ ჯერზე გულს მითბობს".
