ნათქვამია, გაჭირვება მაჩვენე და გაქცევას გაჩვენებო... საქართველოში გაჭირვებულებმა (და არაგაჭირვებულებმაც) გაქცევა არა, მაგრამ ფულის შოვნის ახალი მეთოდები ნამდვილად გვაჩვენეს. "ტიკტოკის" პლატფორმა უამრავი ადამიანის შემოსავლის წყარო გახდა. რა თქმა უნდა, გაჭირვებული ადამიანის დახმარება მადლიანი საქმეა და არ გვეშლება ქართველებს, მაგრამ ამჯერად ჯან-ღონით სავსე ადამიანებზე მინდა მოგიყვეთ, რომლებსაც მუშაობა ეზარებათ და შემოსავლის იოლი წყარო იშოვეს. მათი ყოველდღიური შემოსავალი კი შოკში ჩაგაგდებთ... რადენიმე მათგანს გავესაუბრე, თუმცა, პირობა ასეთი იყო - თუ გულწრფელი პასუხები მინდოდა, ისინი ინკოგნიტოდ უნდა დარჩენილიყვნენ, ვინაიდან არ სურთ რეალური შემოსავლების შესახებ ღიად ილაპარაკონ. "კონცერტი" "ლაივში" "არც ერთ სამსახურში არ არის იმხელა ხელფასი, რასაც ტიკტოკში გამოვიმუშავებ" - მითხრა ერთმა ქალბატონმა. "მუშაობა"­ ცოტა ხმამაღალი ნათქვამია, მაგრამ ასე თავს იმართლებენ იმ ადამიანების წინაშე, ვინც მოუწოდებს, რომ სამსახური იშოვოს და "მოწყალების" თხოვნას თავი დაანებოს... სქემა ძირითადად ასეთია: თითოეული მათგანი აწესებს კონკრეტულ თანხას, რომელიც "ლაივის" განმავლობაში უნდა მოაგროვოს, სანაცვლოდ კი "კონცერტს" ჰპირდება, რომელშიც შედის როგორც ცეკვის, ასევე სიმღერის ნომრები. თანხის რაოდენობა 200 ლარიდან იწყება. მაგალითად ხუთშვილიანი, სოფლად მცხოვრები ოჯახი სხვადასხვა საჭიროებისთვის დღეში 800-1000 ლარსაც აგროვებს. თუმცა, ორივე მშობელი ჯანმრთელი და შრომისუნარიანია. როდესაც დაწესებული თანხა მოგროვდება მათ ანგარიშებზე, იწყება დაპირებული "კონცერტი", რაც ძალიან სასაცილოდ გამოიყურება იმის გათვალისწინებით, რომ მათი "შესრულებული" სიმღერები არც ხელოვნების ნიმუშია და არც საამისო ნიჭი გააჩნიათ. "ფულს ბავშვების სარჩენად მირიცხავენ და ჩემთვისაც, სალონში თმა და ფრჩხილები რომ მოვიწესრიგო" ორი შვილის დედა ამბობს, რომ მას უბრალოდ სხვა გზა არა აქვს, ვინაიდან უმცროსი შვილი ძალიან პატარაა, ბაღში­ ვერ შეჰყავს, რომ თავად სამსახურში იაროს­. "ფულს მირიცხავენ ბავშვების სარჩენად, არიან ადამიანები, რომლებიც თანხას მირიცხავენ, რომ სალონში თმა და ფრჩხილები მოვიწესრიგო". კითხვაზე, რამდენია მისი ყოველდღიური შემოსავალი, მპასუხობს, რომ 200-დან 250 ლარამდე. "თითქოს ბევრია, მაგრამ ფული მაინც არასდროს მყოფნის და ამიტომ, თუ თანხას ყოველდღე არ მოვაგროვებ, ბავშვები მშივრები დარჩებიან"... ადამიანები, რომლებიც პატარებისთვის არაფერს იშურებენ, ისევ ურიცხავენ თანხებს და ასე მეორდება ყოველდღე... გაიღე მოწყალება "დედოფლისთვის" "არ შემიძლია მუშაობა, ნევროზი მაქვს"­ - ამბობს ახალგაზრდა ქალი­ და როცა განსაზღვრულ თანხას ვერ აგროვებს ძალიან ბრაზობს. ის, ვინც მის "ლაივებს" უყურებს, ეჩხუბება, რომ დედოფლისთვის ფული ენანებათ. ერთგვარი სექტაც კი ჩამოაყალიბა და მხარდამჭერებს ირიანელებს უწოდებს. მის პროფილზე ნახავთ ვიდეოებს, როგორ ისვენებს­ სხვადასხვა კურორტზე, რასაც, სამსახურში სიარულით ვერ მოახერხებს. ერთხელ დაიჩივლა, რომ ზღვა არ ჰქონდა ნანახი და 2-3 საათში 1.500 ლარზე მეტი მოაგროვა, რომ ბათუმში წასულიყო. „ტიკტოკის“ რეკორდსმენი მოწყალების თხოვნის რეკორდი ეკუთვნის სამი შვილის დედას, რომელმაც გულწრფელად ილაპარაკა თავისი არცთუ სახარბიელო ცხოვრების წესის შესახებ, თქვა, რომ ახალი ცხოვრების დაწყება სურს. გულმოწყალე ადამიანების მიერ ჩარიცხული თანხებით შეიძინა ბინა, დაიწყო "ლაქშერი" ცხოვრება და მანქანაც შეიძინა. ასეთი წარმატებისთვის არც ერთ ქართველ ტიკტოკერს არ მიუღწევია. მიუხედავად იმისა, რომ თითოეულ მათგანს თავისი დამფინანსებელი ჰყავს, ერთმანეთის მიმართ ძლიერი შური ამოძრავებთ­. ხშირად ნახავთ მათ ვიდეოებში, როგორ ლანძღავენ ერთმანეთს - ცდილობენ, რეიტინგი დაუგდონ, რათა ნაკლები შემოსავალი ჰქონდეთ. საქმე ხელჩართულ ბრძოლამდეც კი მისულა და პოლიციაში საჩივრებიც კი შეიტანეს ერთმანეთის წინააღმდეგ... მოკლედ, "ტიკტოკში" მოწყალების თხო­ვნა­­ სარფიანი საქმეა, ოღონდ ჯანმრთელი და შრომისუნარიანი ადამიანებისთვის, ეს მაშინ, როცა ირგვლივ ამდენ შშმ პირს დახმარება სჭირდება. უამრავი მართლა გაჭირვებული ადამიანი ასევე ითხოვს მოწყალებას "ტიკტოკში", მაგრამ ყოველდღიური შემოწირულობა 20-30 ლარს ვერ გასცდა... ამ საინტერესო ფენომენით დავინტერე­სდი და კითხვით ფსიქოლოგს მივმართე, რომელმაც მოკლედ განმარტა: "ეს ადამიანები უბრალოდ, კარგი მანიპულატორები არიან და ზუსტად იციან, როგორ მოახდინონ ადამიანებზე გავლენა, რასაც მშვენივრად იყენებენ". მარიამ როინიშვილი
