სამწუხაროდ, კიდევ ერთი ავტოსაგზაო შემთხვევა დასრულდა მსხვერპლით. ფაქტი ქედაში, სოფელ წონიარისში დღეს მოხდა. ავტომანქანა, რომელსაც ახალგაზრდა ბიჭი მართავდა, საავტომობილო გზიდან მდინარეში გადავარდა. არსებული ინფორმაციით, შემთხვევის დროს ავტომობილში სამი ადამიანი იმყოფებოდა, საიდანაც ორი მათგანი ხალხმა გამოიყვანა, სამწუხაროდ, ერთი მგზავრი კი გარდაიცვალა. არსებული ინფორმაციით, დაშავებულები სასწრაფო სამედიცინო დახმარების ავტომობილით საავადმყოფოში გადაიყვანეს და კვლევები უტარდებათ. როგორც ადგილობრივი ჩვენთან საუბარში ამბობს, მათ სერიოზული დაზიანებები არ აქვთ და არც სიცოცხლეს ემუქრება საფრთხე. სამწუხაროდ, თვითმხილველებმა ვერ გადაარჩინეს 45 წლამდე ასაკის ქალბატონი, რომელიც ამ ტრაგედიას შეეწირა. "სამწუხარო ფაქტი მოხდა, ჩვენს სოფელშია მომხდარი ეს ავტოსაგზაო შემთხვევა. გარდაცვლილი ხულოს რაიონიდან არის, სოფელ ძმაგულადან. შემთხვევის ადგილას, ამ წუთებშიც მიმდინარეობს საგამოძიებო მოქმედებები. მდინარიდან უკვე ამოიტანეს გადავარდნილი ავტომობილი, მაშველები მუშაობენ. რამ გამოიწვია ეს ავარია, დეტალები არ ვიცით. იქ არ არის საშიში ადგილი, ამიტომ ვფიქრობ, რომ შესაძლოა, მძღოლს ჩაეძინა. კონკრეტულად რა მოხდა, გამოძიება დაადგენს. იყო თუ არა გადაჭარბებული სიჩქარე, ესეც გაირკვევა. ფაქტი დღისით მოხდა, ის ორი გადარჩა, ხალხი დაეხმარა და ამოიყვანეს. თვითმხილველები არიან, რომლებმაც დაინახეს ეს ავარია, ასევე, გაჩერდნენ მანქანები და ყველა ცდილობდა, როგორმე დახმარებოდა წყალში გადავარდნილ მგზავრებს. მძღოლი და ერთი მგზავრი ამოიყვანეს, ერთი კი, სამწუხაროდ, შეეწირა, მეტ დეტალს გამოძიება დაადგენს. ვუსამძიმრებ ოჯახს", - ამბობს ჩვენთან საუბარში ადგილობრივი. როგორც გავარკვიეთ, გარდაცვლილი ქალბატონი ხულოს მუნიციპალიტეტის, სოფელ ძმაგულას მაცხოვრებელი ფიქრია შაინიძე- მახარაძეა. მის ცხედარს ახლა ექსპერტიზა უტარდება, რის შემდეგაც, სოფელში გადაასვენებენ. ჩვენი ინფორმაციით, საჭესთან იჯდა მისი სიძე და იქ იყო ქალიშვილიც. მომხდარი ავტოსაგზაო შემთხვევის დროს, ქალი მანქანიდან გადმოვარდა, მდინარეში გადავარდა და ადიდებულმა მდინარემ გაიტაცა. ყველაფერი ისე წამებში მოხდა, რომ სამწუხაროდ, მისი გადარჩენა ვეღარ მოხერხდა. "ერთი ოჯახის წევრები იყვნენ მანქანაში. გარდაცვლილი, 45 წლამდე ასაკის ქალბატონი, სოფელ ძმაგულაში ცხოვრობდა - ფიქრია შაინიძე, მეუღლე მახარაძე ჰყავს. საჭესთან იჯდა მისი სიძე და მანქანაში იყო მისი ქალიშვილიც. უბედური შემთხვევა დღეს მოხდა. კონკრეტულად რამ გამოიწვია, ჩემთვის უცნობია, ალბათ, დეტალებს სამართალდამცავები დაადგენენ. ვიცით, რომ მანქანაში სამნი იყვნენ, სიძეს და ქალიშვილს მსუბუქი დაზიანებები აქვთ, ქალი კი გარდაცვლილია. სხვა დეტალებზე ჯერჯერობით ვერაფერს გეტყვით, ისეთი მძიმე ვითარებაა სოფელში, რომ დეტალებზე საუბრის თავი არავის აქვს, მოგვიანებით მეცოდინება. ცხედარი ექსპერტიზაზეა გადასვენებული. წყალი ადიდებულია და გაიტაცა. ვუსამძიმრებ მის ოჯახს მომხდარი ტრაგედიის გამო. ძალიან კარგი ადამიანი დააკლდა ჩვენს სოფელს, ძალიან განვიცდით. სამწუხარო ფაქტია", - ამბობს ჩვენთან საუბარში მერის წარმომადგენელი სოფელ სხალთაში - რაულ მახარაძე. "კვირის პალიტრა" უსამძიმრებს გარდაცვლილი ქალის ოჯახს. ფაქტზე გამოძიება დაწყებულია. (სპეციალურად საიტისთვის)
