მესამე მსოფლიო ომი შესაძლოა საქართველოს მეზობლად დაიწყოს?! - ტრამპი ირანზე დარტყმების მიყენებას ქართველიშვილის მოიერიშე თვითმფრინავებითაც შეეცდება

მარტის ბოლოს პენტაგონმა ჩრდილოეთ ამერიკის კონტინენტიდან არაბეთის ნახევარკუნძულზე А-10А Thunderbolt II ტიპის 12 ერთეული საბრძოლო თვითმფრინავი გადაისროლა. ამაში არაფერი იქნებოდა განსაკუთრებული, რომ არა ერთი მნიშვნელოვანი დეტალი - ეს მოიერიშე თვითმფრინავები განკუთვნილნი არიან შედარებით ახლო რადიუსში საჰაერო დარტყმების მისაყენებლად. მათი გადაფრენა 10 ათას კმ-ზე შორს (ჰაერში საწვავით რამდენჯერმე გაწყობით) ამერიკელ გენერლებს რატომღაც უნდა სჭირდებოდეთ და მათ შორის იმისთვის, თუ აშშ-ისა და ისრაელის ერთობლივი საჰაერო ოპერაცია ირანის წინააღმდეგ მართლაც განხორციელდება. აშშ-ის პრეზიდენტი ტრამპი უკვე დაემუქრა თეირანს - თუკი 1 მაისამდე ირანი ხელს არ მოაწერს ხელშეკრულებას ბირთვული იარაღის არშექმნაზე, მაშინ თეთრი სახლი არ გამორიცხავს მის წინააღმდეგ ძალოვანი მეთოდებით ზემოქმედების დაწყებასო... А-10А Thunderbolt II ტიპის მოიერიშე თვითმფრინავები ჯერ კიდევ ნახევარი საუკუნის წინ ჩვენი თანამემამულის, ცნობილი ამერიკელი ავიაკონსტრუქტორის ალექსანდრე ქართველის (ქართველიშვილის) ხელმძღვანელობითაა შექმნილი და ხუთი ათეული წლის განმავლობაში ამ თვითმფრინავებმა თითქმის ყველა იმ საბრძოლო მოქმედებებში მიიღეს მონაწილეობა, რომლებსაც პენტაგონი მსოფლიოს სხვადასხვა კუთხეში აწარმოებდა, მათ შორის - ერაყში, კოსოვოში, ავღანეთში... მაგრამ მარტო ის ფაქტი, რომ ქართველიშვილის მოიერიშეები ათი ათას კმ-ზე შორ მანძილზე გადმოისროლა პენტაგონმა და ახლოს &bdquo;მიუჩოჩა“ ირანის ტერიტორიას, როდი მეტყველებს იმაზე, რომ თეთრი სახლი მართლაც რაღაცას აპირებს ჩვენს სამეზობლოში... პენტაგონმა, ასევე, განახორციელა აქამდე წარმოუდგენელი მანევრი და ინდოეთის ოკეანეში დიეგო-გარსიას საჰაერო ბაზაზე თავი მოუყარა თავის ყველაზე მრისხანე საჰაერო ძალას - B-2 Spirit-ის ტიპის &bdquo;სტელსის“ ტექნოლოგიით დამზადებულ შვიდ სტრატეგიულ ბომბდამშენს... მოიერიშე А-10А Thunderbolt II-ების ჩრდილო-ამერიკიდან ირანის სიახლოვეს გადასროლა რას უნდა ნიშნავდეს? ამერიკელებს მწყობრში სულ 18-20 ასეთი, ძალზე ძვირად ღირებული (თითოეული მათგანი, თავისი აღჭურვილობით, 2 მლრდ დოლარზე მეტადაა შეფასებული) სტრატეგიული ბომბდამშენი თუ ჰყავთ და მათგან ერთი მესამედის სასწრაფო გადასროლა ინდოეთის ოკეანის ერთ პატარა კუნძულზე ბევრ რამეს უნდა მიანიშნებდეს. B-2 Spirit-ებით პენტაგონი ერაყსა და ავღანეთში დაბომბვებს უშუალოდ ჩრდილოეთ ამერიკის კონტინენტიდან გაფრენებითაც ახორციელებდა, თუმცა დიეგო-გარსიას კუნძულზე მდებარე აეროდრომი სამჯერ უფრო ახლოსაა ირანის საჰაერო სივრცესთან. ამ კუნძულიდან ომანის ყურეში, ირანის სამხრეთ სანაპირომდე მხოლოდ 3 800 კმ-მდეა. დიეგო-გარსიას კუნძული ინდოეთის ოკეანეში და მასზე განთავსებული სამხედრო აეროდრომი, საიდანაც ირანის სამხრეთ საზღვრებამდე პირდაპირი ხაზით 3 800 კმ-ია... ის, რომ პენტაგონი აქცენტს აკეთებს სწორედ &bdquo;სტელსის“ ტექნოლოგიით დამზადებულ B-2 Spirit-ებზე, შემთხვევითი არ არის, რადგან ირანის რადიოლოკაციურ პუნქტებს, წესით, უნდა გაუჭირდეთ ამ 150-ტონიანი ამერიკული მფრინავი &bdquo;მოჩვენებების“ ადრეული აღმოჩენა, თუკი პრეზიდენტმა ტრამპმა გაბედა და, ისრაელის ნებას აყოლილმა, მართლაც მიიტანა საჰაერო იერიში ირანზე... ის, რომ ტრამპი, განსხვავებით იმავე ბაიდენისგან, ბევრად უფრო დაუჭერდა მხარს ისრაელს, საპრეზიდენტო არჩევნებამდეც არ იწვევდა დიდ ეჭვს და ეს ასეც მოხდა, რაც გამოიხატა, თუნდაც, ამერიკული ბუნკერსაწინააღმდეგო საავიაციო ბომბების ისრაელისთვის გაგზავნაში, რაც მანამდე პრეზიდენტ ბაიდენს დაბლოკილი ჰქონდა. სწორედ ამგვარი ბუნკერსაწინააღმდეგო მართვადი საავიაციო ბომბები და რაკეტები გახდებიან მთავარი დამაზიანებელი საშუალებები, თუკი აშშ და ისრაელი უახლოეს მომავალში მართლაც განახორციელებენ საჰაერო ოპერაციებს ირანის წინააღმდეგ, რადგან ირანელებს ბირთვული ობიექტები და სარაკეტო არსენალები სწორედ მიწისქვეშ განთავსებულ დაცულ გვირაბებში აქვთ განთავსებული. დიეგო-გარსიადან აფრენილ და მძლავრი ბუნკერსაწინააღმდეგო მართვადი საავიაციო ბომბებით შეიარაღებულ ამერიკულ &bdquo;მოჩვენებებს“- B-2 Spirit-ებს ირანის საჰაერო სივრცემდე შეუმჩნევლად მიღწევის დიდი შანსი ექნებათ... გარდა ქართველიშვილის მოიერიშეებისა და &bdquo;სტელსის“ &bdquo;მოჩვენებებისა", პენტაგონს ახლო აღმოსავლეთის რეგიონში თავმოყრილი აქვს ორი საავიამზიდო ჯგუფი, თავისი გემბანის დამრტყმელი თვითმფრინავებით - F/A-18E/F Super Hornet-ებით და რამდენიმე ასეული სხვადასხვა ტიპის ფრთოსანი რაკეტით, მათ შორის - &bdquo;ტომაჰავკებით“... გულხელდაკრეფილი არც ირანელები სხედან - ისინი ისრაელსა და ახლო აღმოსავლეთში ამერიკულ სამხედრო ბაზებს ემუქრებიან ასობით ბალისტიკური და ფრთოსანი რაკეტით, ასევე, ათასობით კამიკაძე-დრონით, რომელთა სტარტი განხორციელდება არა მარტო თავად ირანის ტერიტორიიდან, არამედ - იემენიდან, ჰუსიტების მიერ კონტროლირებული რაიონებიდანაც, რაც არცთუ სახუმარო საფრთხეს შეუქმნის, პირველ რიგში, ისრაელის ქალაქების მაცხოვრებლებს... სირიაში ბაშარ ასადის რეჟიმის ჩამოქცევით ისრაელმა ნაწილობრივ ამოისუნთქა, რადგან შეწყდა ირანული შეიარაღების, მათ შორის - რაკეტების მიწოდება სირიის გავლით, სამხრეთ ლიბანში მოქმედი ტერორისტული დაჯგუფება &bdquo;ჰეზბოლასთვის“, ღაზას სექტორში &bdquo;ჰამასის“ საქმეც ვერ არის კარგად, მაგრამ ისრაელში საზეიმოდ მანამდე არ ეცლებათ, სანამ იგრძნობენ საფრთხეს - ირანი ძალიან მალე შექმნის ისეთ ბირთვულ მუხტებს, რომელთა დაყენება შეეძლება თავის იმ ბალისტიკურ რაკეტებზე, რომლებმაც აქამდეც არა ერთხელ &bdquo;ააფორიაქეს“ ისრაელის ქალაქები... შესაბამისად, ნეთანიაჰუ ყველანაირად ეცდება, დაიყოლიოს ტრამპი, რომ ერთიანი ძალებით დაარტყან ირანის ბირთვულ ობიექტებსა და სარაკეტო ბაზებს, მაგრამ რა მოჰყვება ყოველივე ამას შემდეგ? ეს, ჩვენთვის,საქართველოსთვის,ისევე, როგორც მთლიანად სამხრეთ კავკასიისთვის მეორეხარისხოვანი სულაც არ გახდება, რადგან ყურისძირში მესამე მსოფლიო ომის დაწყების თვითმხილველნი შეიძლება გავხდეთ...