ზელენსკის ვილა იტალიაში და ანგარიში შვეიცარიის ბანკში, მილიარდერი პოროშენკო და კლიჩკოს თეთრი როიალი - რა ქონებას ფლობენ უკრაინის პოლიტიკის მთავარი ფიგ - კვირის პალიტრა

ფრანგულ გაზეთ „პარი მატჩში“ (Paris Match) გამოქვეყნებულია სტატია სათაურით „მდიდრული საათები და ანგარიში შვეიცარიის ბანკში: რა აქტივების მფლობელია ვოლოდიმირ ზელენსკი?“ (ავტორი - მარტენ ლაგრავი). „უკრაინა რუსეთს უმკლავდება, მაგრამ, სამწუხაროდ, ეს ქვეყანა მსოფლიოში ერთ-ერთ ყველაზე მეტად კორუმპირებულ ქვეყნადაც არის ცნობილი. პოლიტიკოსები ყველაფერს გამდიდრებისათვის იყენებენ. ცოლ-ქმარი ზელენსკები საკმაოდ დიდი ქონების პატრონები არიან, თუმცა მათი სიმდიდრე უკრაინის პოლიტიკური ელიტის სხვა წარმომადგენლების - პეტრო პოროშენკოსა და ვიტალი კლიჩკოს - ქონების ფონზე საკმაოდ ფერმკრთალდება“, - ნათქვამია მასალაში.

გთავაზობთ პუბლიკაციას შემოკლებით:

ცნობილმა უკრაინელმა პოლიტიკოსებმა, რომლებიც სახელმწიფო თანამდებობებზე მუშაობენ, ან პარლამენტის წევრები არიან, თავიანთი ქონების ოფიციალური დეკლარირება მოახდინეს.

სამწუხაროდ, უკრაინა მსოფლიოს ერთ-ერთ ყველაზე მეტად კორუმპირებულ ქვეყნად არის მიჩნეული, სადაც პოლიტიკოსები უკანონოდ მდიდრდებოდნენ. 2014 წლის მაიდნის შემდეგ მიღებული იქნა რიგი ზომევი საზოგადოებრივი ცხოვრების მეტი გამჭვირვალობის მიზნით - შემოღებული იქნა ქონებრივი მდგომარეობის ამსახველი დეკლარაციების წარდგენის სავალდებულო წესი სახელმწიფო სამსახურში მყოფი ჩინოვნიკების მხრიდან.

ცოლ-ქმარ ზელენსკების ქონება

საინტერესოა, რა სიმდიდრეს ფლობს უკრაინის მეთაური ვოლოდიმირ ზელენსკი? იმ დეკლარაციის თანახმად, რომელიც გაზეთ The Kyiv Independent-შია გამოქვეყნებული, 45 წლის პრეზიდენტს შენარჩუნებული აქვს თავისი აქტივების დიდი ნაწილი, რომელიც პოლიტიკაში მოსვლამდე ჰქონდა. მათ შორისაა რამდენიმე ელიტური საათი („ბრეგეტი“, „როლექსი“ და ა.შ.), რომლებიც მას 2019 წლის დეკლარაციაშიც მოხსენიებული ჰქონდა, აგრეთვე თავისი წილი 76 კომერციულ ბრენდში, დაკავშირებული საპროდიუსერო კომპანია „კვარტალ-95“-თან, რომელმაც მას, როგორც მსახიობს და კომედიანტს, პოპულარობა მოუტანა. რაც შეეხება უძრავ ქონებას, ვოლოდიმირ ზელენსკი აღარ ფლობს იმ ზოგიერთ ობიექტს, რომლებიც მას პრეზიდენტობამდე ეკუთვნოდა. მაგალითად, ეს ეხება კიევთან ახლოს არსებულ სახლს, იტალიაში მდებარე ვილას და რიგ არასაცხოვრებელ სათავსოებს. ამასთან, მის საკუთრებაში რჩება კიევში არსებული საცხოვრებელი ბინა 132 კვადრატული მეტრის ფართობით, ორი ავტოსადგომი, წილები სხვადასხვა ბინებში, რომლებსაც იგი პარტნიორებთან ერთად ფლობს. მას გაქირავებული აქვს დიდ ბრიტანეთში არსებული ბინა (92 კვ.მეტრი).

ცოლ-ქმარ ვოლოდიმირ და ელენა ზელენსკების საერთო წლიურმა შემოსავალმა 2024 წელს 330 ათას ევროს მიაღწია, რომლის ძირითადი წყაროებია სახელმწიფო ობლიგაციები, ბინის გაქირავების შედეგად მიღებული თანხა, საპრეზიდენტო ხელფასი (წელიწადში 7 ათასზე მეტი ევრო).

პრეზიდენტის ცოლი ელენა ზელენსკაია ფლობს ბინას ყირიმში, რომელიც მან რუსეთის მიერ ნახევარკუნძულის ოკუპაციამდე შეიძინა. მას აქვს აგრეთვე დიდი ბინა კიევში, წილი კვიპროსზე დარეგისტრირებულ კომპანიაში.

მოკლედ, ზელენსკების წყვილის ფინანსური აქტივების ოდენობა ნაღდი ფულის სახით ერთ მილიონ ევროს აღწევს, რომელთაგან თითქმის 350 ათასი ევრო შვეიცარიის ბანკში ინახება.

ყოფილი პრეზიდენტი - მილიარდერი

ზელენსკების აქტივების ფონზე სხვა უკრაინელი პოლიტიკოსების ქონება უფრო შთამბეჭდავად გამოიყურება.

უკრაინის ექს-პრეზიდენტს, პარლამენტის წევრს პეტრო პოროშენკოს ხელოვნების ნიმუშების მდიდრული კოლექცია აქვს. გარდა ამისა, იგი ფლობს 20-მდე უძრავი ქონების ობიექტს და 125 მილიონ ევროს, რომლის დიდ ნაწილს ნაღდი ფულის სახით ინახავს. პეტრო პოროშენკო წარსულში ცნობილი ბიზნესმენი იყო და მისი ქონება, პრინციპში, გასაკვირი არ უნდა იყოს. „ფორბსის“ მონაცემებით, ექს-პრეზიდენტის სიმდიდრე, 2025 წლისათვის, 1,7 მილიარდ ევროდ არის შეფასებული. პეტრო პოროშენკო მსხვილ საკონდიტრო ბიზნესს ფლობს, რომელსაც, სავარაუდოდ, თავის შვილს ალექსის გადასცემს.

მერი - მილიონერი

კიევის მერმა ვიტალი კლიჩკომ, რომელიც კრივში მსოფლიოს ყოფილი ჩემპიონია, 2,4 მილიონი ევროს აქტივების დეკლარირება მოახდინა. მათ შორისაა თეთრი როიალი Yamaha, რომელიც 21500 ევრო ღირს, აგრეთვე კოლექციური მნიშვნელობის მქონე საათები და ავტომობილები.

მოამზადა სიმონ კილაძემ

წყარო