გამოიკვეთა რუსული საზაფხულო შეტევის ერთ-ერთი მიზანი - ქალაქ სუმიდან მოსახლეობის ევაკუაცია მიმდინარეობს .
გამოიკვეთა რუსული საზაფხულო შეტევის ერთ-ერთი მიზანი-სუმზე ხელმეორედ შეტევა...
რუსეთ-უკრაინის ომის მეოთხე წლის ზაფხულისთვის პუტინის არმია, როგორც მოსალოდნელი გახლდათ, ისევ გააქტიურდა (თუმცა, კრემლს უკრაინაზე შეტევების ტემპი არც ზამთარ-გაზაფხულის პერიოდში შეუნელებია ძალიან), რაც უკვე იმაზე მიუთითებს, რომ რუსეთმა ამ გახანგრძლივებულ ომში მეოთხე საზაფხულო შეტევითი კამპანია წამოიწყო...
რუსული შეტევების მიმართულებები ტრადიციულად მიმართულია უკრაინის აღმოსავლეთ ფრონტზე, დნეპროპეტროვსკის ოლქის ადმინისტრაციულ საზღვარზე შესაჭრელად, სამხრეთის ფრონტზე ზაპოროჟიეს ოლქის ახალი მიწების დასაპყრობად და ჩრდილო-აღმოსავლეთით, კუპიანსკის დასაპყრობად...
მაგრამ, გასული წლების საზაფხულო შეტევითი ოპერაციებისგან განსხვავებით,ამჯერად რუსეთი ხსნის ახალ, ჩრდილოეთის ფრონტსაც უკრაინული ქალაქის სუმის დასაპყრობად...
ქალაქი სუმი წარმოადგენს სუმის ოლქის ადმინისტრაციულ ცენტრს და ის უკრაინის ჩრდილოეთ საზღვრიდან სულ რაღაც 30-იოდე კმ-ში მდებარეობს, რაც ზრდის რუსეთის საოკუპაციო ძალების მხრიდან მისი დაპყრობის საშიშროებას...
2022 წლის 24 თებერვლიდან ანუ უკრაინაზე რუსეთის ღია სამხედრო აგრესიის დაწყების დღიდანვე, სუმი აღმოჩნდა რუსი ოკუპანტების ფაქტობრივ ალყაში, თუმცა 6 აპრილამდე პუტინის არმიამ ვერ შეძლო უკრაინული სუმის დაპყრობა და უკან დაიხია და საერთოდ დატოვა უკრაინის ჩრდილოეთი ნაწილი.
სამი წლის შემდეგ კი რუსეთის გენერალიტეტი ახალ შეტევით ოპერაციას იწყებს იმავე სუმის მიმართულებით - რუსეთ-უკრაინის საზღვარი უკვე გადალახული აქვს რუსეთის არმიის საბრძოლო დანაყოფებს და დაიკავეს საზღვრისპირა რამდენიმე უკრაინული სოფელი - ქალაქ სუმამდე პირდაპირი ხაზით 25 კმ-ი დარჩა, რაც რუსეთის შორსმსროლელ არტილერიას საშუალებას აძლევს 152 მმ კალიბრის საარტილერიო ჭურვები და ზალპური ცეცხლის რეაქტიული სისტემების უმართავი რაკეტები სუმის ჩრდილოეთ ნაწილის საცხოვრებელ კორპუსებამდეც მიაღწიონ...
ცალკე დიდ საფრთხეს წარმოადგენენ რუსული FPV-დრონები (მათ შორის ოპტიკურბოჭკოვანი კაბელებით მართვადი), რომელთა მასიური გამოყენების დაწყების შემთხვევაში სუმის მშვიდობიან მოსახლეობას ძალიან დიდი საფრთხე დაემუქრება - სამი წლის წინ,სუმის 40 დღიანი ნახევრადალყის დროს რუსეთმა 2022 წლის 13 აპრილს ჩაიდინა სამხედრო დანაშაული და ქალაქ სუმის ცენტრისკენ „ისკანდერის“ ტიპის ორი აერობალისტიკური რაკეტა გაუშვა (ისევე როგორც აგვისტოს ომის დროს ქართული გორის ცენტრისკენ) ,რასაც 35 მშვიდობიანი მოსახლის დაღუპვა და 129 ადამიანის დაჭრა მოჰყვა...
მაშინ, სამი წლის წინაც, რუსეთის საოკუპაციო არმია, რომლის ორი სატანკო დივიზია და ორი მოტომსროლელი ბრიგადა საზღვრიდან შეიჭრა სუმის ოლქში, ალბათ შეძლებდა ქალაქ სუმის მთლიანად დაპყრობას, მაგრამ იმ მომენტში პუტინის დავალებით რუსეთის არმია ბლიცკრიგის ოპერაციას ახორციელებდა და მთავარ მიზანს უკრაინის დედაქალაქის - კიევის რამდენიმე დღეში სრული დაპყრობა და უკრაინის ხელისუფლების სასწრაფო ჩანაცვლება წარმოადგენდა -ამიტომაც ქალაქ სუმს რუსულმა სატანკო არმადებმა „ტრანზიტით“ ჩაუარეს და კიევისკენ აიღეს გეზი...
ამჯერად კი ეტყობა სულ სხვანაირად იქნება - რუსეთის საოკუპაციო ძალებს დიდი ხანია შეცვლილი აქვთ შეტევების ტაქტიკა და ჯავშანსატანკო კოლონებით ასფალტირებულ გზებზე სწრაფი სვლის ნაცვლად იყენებენ ნელი ტემპითა და მრავალრიცხოვანი მცირე მოიერიშე ჯგუფებით (რომლებიც ტანკების მხარდაჭერის გარეშე, ჩვეულებრივი ავტომობილებითა და მოტოციკლეტებით გადადიან იერიშებზე) ფართო ფრონტით შეტევის ტაქტიკას...
ასე ხდება უკრაინის აღმოსავლეთ ფრონტზე და ეტყობა ასევე გაგრძელდება ახალგახსნილ ჩრდილოეთ ფრონტზეც, მითუმეტეს, რომ სტეპებიანი დონბასიდან განსხვავებით, უკრაინის სუმისა და ხარკოვის ოლქები ხშირი ტყეებითა დაფარული და ზაფხულის გაფოთვლის შემდეგ, ტყის მასივებში რუსული ქვეითი მოიერიშე ჯგუფების ფარული წინსვლა უფრო გაადვილებული ხდება...