"ჩვენი ქორწილი - ეს იქნება ნუცას კონცერტი, ყოველთვის მინდოდა ქორწილი კუნძულზე" - სად აპირებს ნუცა ბუზალაძე ქორწილის გადახდას და რომელმა ვარსკვლავებმა მიულოცეს ნიშნობა?
საზოგადოებისთვის ცნობილია, რომ რამდენიმე კვირის წინ მომღერალი ნუცა ბუზალაძე თავისივე დარენ პრინსზე დაინიშნა. ნიშნობის შესახებ ინფორმაცია ნუცამ გულშემატკივრებს სოციალურ ქსელში გაუზიარა და ხელის თხოვნის კადრებიც გამოაქვეყნა.
ამჯერად ამ სასიხარულო ამბის შესახებ ნუცამ toofab.com-თან ისაუბრა და საზოგადოებას ქორწილის გეგმებიც გაუზიარა."ორწელიწადნახევარი საუკეთესო მეგობრები ვიყავით, ის ჩემი აგენტი იყო და დღემდე ასეა. მას შემდეგ, რაც ლოს-ანჯელესში გადავედი, ჩვენი ურთიერთობა პროფესიულიდან რომანტიკულში გადაიზარდა და ვფიქრობ, ეს იყო საუკეთესო რამ ჩემს ცხოვრებაში", - აღნიშნა ნუცამ და დასძინა, რომ ხელის თხოვნის შეთავაზება მისთვის სიურპრიზი იყო...
"როდესაც მან ეს გააკეთა შოკირებული ვიყავი", - თქვა ნუცამ. მომღერლის თქმით, იმედოვნებდა, რომ დარენი ხელს სთხოვდა, თუმცა იმ კონკრეტულ მომენტში მოულოდნელობა იყო.
ნუცამ აღნიშნა, რომ ფანების გარდა ნიშნობა რამდენიმე ვარსკვლავმაც მიულოცა. წყვილს დაურეკა მეჯიქ ჯონსონმა. "ის აღფრთოვანებული იყო და ამბობდა, რომ უხარია, რადგან ორივე ჩვენგანს იცნობს. ის და ქუქი (მეჯიქ კონსონის მეუღლე), ბედნიერები იყვნენ. მან დაგვირეკა, რამდენიმე რჩევაც მოგვცა, რადგან ამდენი ხანია ურთიერთობაში არიან. ჩვენთვის ძალიან მნიშვნელოვანი იყო ამის მოსმენა.
შემდეგ Chevy Chase-მა დაგვირეკა, ასევე Ric Flair-მა და ძალიან გახარებულები იყვნენ ჩვენი ამბით. ძალიან სასიამოვნოა იმის გაგება, რომ ჩვენი ყველა მეგობარი ბედნიერია ჩვენი ამბით", - აღნიშნა ბუზალაძემ.