"უკვდავების ელექსირი გვინდა": სკანდალური დიალოგი სი ძინ პინს, პუტინსა და კიმ ჩენ ინს შორის - როგორ ეძებენ გაახალგაზრდავების წამალს მსოფლიოს ლიდერები
გამოცემა Bloomberg წერს, რომ პეკინში გამართულ სამხედრო აღლუმზე რუსეთის, ჩინეთის და ჩრდილოეთ კორეის ლიდერები სიცოცხლის გახანგრძლივებაზე საუბრობდნენ. ამის შესახებ ცნობილი გახდა დაახლოებით, 1-წუთიანი აუდიო ჩანაწერით, რომელიც მიკროფონებმა შემთხვევით ჩაიწერა. ამის შესახებ AMBEBI.GE წერს.
"ადრე ადამიანები იშვიათად აღწევდნენ 70 წელს. ახლა კი 70 წლის ასაკში ისევ ბავშვი ხარ", - თქვა სი ძინპინმა.
მას პუტინი (ვიდეოში ისმის მისი სიტყვების ჩინურ ენაზე თარგმანი) ასე პასუხობს:“ბიოტექნოლოგიების დახმარებით ორგანოების შეუზღუდავად შეცვლა იქნება შესაძლებელი… რაც უფრო დიდხანს იცხოვრებენ ადამიანები, მით უფრო ახალგაზრდები გახდებიან და ისინი შეძლებენ უკვდავებასაც კი მიაღწიონ".
ჩინელმა ლიდერმა მიუგო: “ზოგიერთი პროგნოზის მიხედვით, ამ საუკუნეში ადამიანები შეძლებენ 150 წლამდე იცხოვრონ".
პუტინსა და სი ძინპინს გვერდით ჩრდილოეთ კორეის ლიდერი კიმ ჩენ ინი მიჰყვებოდა. ჩანაწერში ისმის თარჯიმნის ფრაზა კორეულ ენაზე, სადაც ორგანოთა ტრანსპლანტაციაზეა საუბარი.
ის, რომ ზოგიერთ ლიდერს "მუდმივი სიცოცხლე" სურს, საიდუმლო არ არის. ერთ-ერთი მათგანია პუტინი, რომელიც, რუსული ოპოზიციური მედიის მტკიცებით, ხან ირმების სისხლში ბანაობს, ხან შამანებს რჩევებს ეკითხება.
"კვირის პალიტრა" გასულ წელს რუსულ მედიაზე დაყრდნობით წერდა, რომ პუტინის უახლოესმა მეგობარმა მეცნიერებს სიბერის საწინააღმდეგო წამლის გამოგონება უბრძანა.
რუსულ მედიაში გავრცელებული ინფორმაციით, 2024 წლის ივნისში რუსეთის ჯანდაცვის სამინისტრომ რუსეთის სამეცნიერო-კვლევით ინსტიტუტებს დაავალა სიბერესთან ბრძოლისთვის პროექტები მოემზადებინათ და წარედგინათ. უფრო კონკრეტულად კი, მეცნიერებს უნდა შეემუშავებინათ ისეთი სამედიცინო პროდუქტი, რომელიც უჯრედების დაბერებას შეაფერხებდა.
ასევე, მათ უნდა შეექმნათ იმუნური სისტემის კორექციის ახალი მეთოდი, რომელიც სიბერეში გამოვლენილ კრიტიკულ მაჩვენებლებს დაეფუძნებოდა.
„გვთხოვეს, სასწრაფოდ გაგვეგზავნა ჩვენი ნამუშევრები. ამასთან, წერილი მოვიდა, ასე ვთქვათ, დღეს, ეს ყველაფერი კი გუშინ უკვე გაგზავნილი უნდა გვქონოდა...“, - დაადასტურა საკითხი ჟურნალისტთან საუბრისას ერთ-ერთი სამეცნიერო-კვლევითი ცენტრის წარმომადგენელმა.
სხვა ცენტრის წარმომადგენელმა კი აღიარა, რომ გაგიჟდა, როცა ეს „ქაღალდი“ ნახა.
„რა თქმა უნდა, ახლა ამ მოხუცი რუსი პოლიტიკოსების გარდა, სხვა არავინ გვყავს გამოსაჯანმრთელებელი ანუ ზუსტად ამ დროს, როცა ომი მიმდინარეობს, ყველა საქმე უნდა მივატოვოთ. ეს ცინიზმი შემაშფოთებელია“.
როგორც ისინი მედიასთან საუბრისას ამბობენ, სამინისტროსთვის ჯერ არაფერი გაუგზავნიათ და არც აპირებენ. სამინისტროდან გაგზავნილი წერილის შინაარსი კი უფრო თხოვნას ჰგავდა, მეცნიერებს რაიმე მაინც გაეგზავნათ.
რუსეთის ჯანმრთელობის სამინისტროს წერილი სამეცნიერო დაწესებულებებს მას შემდეგ გაეგზავნათ, რაც რუსეთის პრეზიდენტმა პუტინმა პირდაპირ ეთერში განაცხადა, რომ აუცილებელია, შეიქმნას ეროვნული პროექტი, რომელიც მოქალაქეთა ჯანმრთელობის შენარჩუნებისა და მოფრთხილებისკენ იქნებოდა მიმართული.
პროექტი, რომელსაც „ახალი ტექნოლოგიები ჯანმრთელობის მოფრთხილებისთვის“ ეწოდა, პრემიერ-მინისტრის მოადგილემ, ტატიანა გოლიკოვამ წარადგინა და, როგორც ცნობილია, ის 2025 წლისთვის უნდა ამოქმედდეს. როგორც РИА Новости წერდა, პროექტი გულისხმობს ინოვაციური პროდუქტებითა და ახალი ტექნოლოგიების გამოყენებით რუსი მოქალაქეების სიცოცხლის გახანგრძლივებას. გამოცემა „მედუზას“ ცნობით, პროექტის მთავარი ხელმძღვანელი მიხაილ კოვალჩუკია, რომელსაც „პუტინის საყვარელ ფიზიკოსსაც“ ეძახიან. რუსულ მედიაში ვკითხულობთ, რომ კოვალჩუკის ძმა - იური ბიზნესმენია და სწორედ ის არის პასუხისმგებელი პუტინის ფულსა და ქალებზე...
„ეს მიშა კოვალჩუკია, რომელიც მუდამ „რუსული გენის“ და სამუდამო სიცოცხლის შესახებ ბოდავს“, - აღნიშნავს კრემლთან დაახლოებული პირი ჟურნალისტთან საუბრისას.
რუსულ მედიაში აღნიშნავენ, რომ მეცნიერები მართლაც მუშაობენ ამ საკითხზე და ეს პროექტი არა რიგითი მოქალაქეების ჯანმრთელობის გაუმჯობესებისთვის, არამედ - პუტინის სიცოცხლის გახანგრძლივებისთვის შეიქმნა.