ათწლეულების ყველაზე გრანდიოზული მიღება: 42-მეტრიანი სავახშმო მაგიდა, 113 წლის კონიაკი და სამი ქალი ყურადღების ცენტრში - როგორ დახვდნენ უინძორები ტრამპს (ფოტოები)
უინძორის სასახლემ გასულ ღამეს ათწლეულების მანძილზე ყველაზე გრანდიოზულ წვეულებას უმასპინძლა. აშშ-ის პრეზიდენტს, დონალდ ტრამპს, ბრიტანეთში მეორე სახელმწიფო ვიზიტის პირველი დღის ბოლოს, სამეფო ბანკეტით გაუმასპინძლდნენ.
სანამ პრეზიდენტი და მეფე საუბრობდნენ და დიდებული სუფრის ცენტრში ისხდნენ, მზერა ძირითადად სამ მთავარ ქალბატონზე იყო მიპყრობილი.
უელსის პრინცესა ბრიტანელი დიზაინერის, ფილიპა ლეპლის მიერ შექმნილი, ოქროსფერი მაქმანითა და ხელით ნაქარგი გრძელი კაბით ბრწყინავდა. მას ამშვენებდა გარდაცვლილი დედოფლის საყურეები და მისი საყვარელი Lover's Knot-ის ტიარა.
დედოფალ კამილას სამოსი მთლიანად საფირონისფერში იყო გადაწყვეტილი - ტიარადან დაწყებული, ფიონა კლერის ნაქარგი კაბის ფერით დამთავრებული.
ამავდროულად, პირველმა ლედიმ, მელანია ტრამპმა, მხრებზე მოშიშვლებული ყვითელი კაბითა და მეწამული ფერის კონტრასტული ქამრით საღამოს თანამედროვე ელფერი შესძინა.
მეფის გამოსვლა და ამერიკასთან "განსაკუთრებული კავშირი"
როდესაც მეფე სიტყვის წარმოსათქმელად წამოდგა, მან ბრიტანეთისა და აშშ-ის „საოცარი კავშირის“ სადღეგრძელო შესვა. თავის სიტყვაში მონარქმა ხაზი გაუსვა ორ ქვეყანას შორის არსებულ „უპრეცედენტო პარტნიორობას“. 76 წლის ჩარლზმა ასევე ისაუბრა "ტირანიაზე, რომელიც კვლავ ემუქრება ევროპას“.
ტრამპი თანხმობის ნიშნად თავს უქნევდა მეფეს, რომელიც ამერიკელი ლიდერისკენ მიბრუნდა და თქვა: "ჩვენ და ჩვენი მოკავშირეები ერთად ვდგავართ უკრაინის მხარდასაჭერად, რათა შევაჩეროთ აგრესია და დავიცვათ მშვიდობა".
ჩარლზის თქმით: "ეს უნიკალური და მნიშვნელოვანი მოვლენა ასახავს ჩვენს ორ დიდ ერს შორის არსებულ მტკიცე კავშირს. ამ ურთიერთობამ, რომელიც ჩვენს ხალხებს შორის არსებული ღრმა მეგობრობით არის გამყარებული, და რომელსაც ჩვენ და ჩვენი წინამორბედებიც, კარგი მიზეზების გამო, "განსაკუთრებულს“ ვუწოდებდით, თაობების განმავლობაში უფრო უსაფრთხო და ძლიერი გაგვხადა“.