ნინო ბურჯანაძე ბელარუსში ევრაზიის უსაფრთხოების კონფერენციაზე, რომელსაც ოკუპანტი რუსეთის საგარეო საქმეთა მინისტრი ლავროვიც ესწრებოდა - რა კადრები ვრცელდება?
ბელარუსულ და რუსულ მედიაში გავრცელებული ინფორმაციით, საქართველოს ყოფილი პარლამენტის თავმჯდომარე ნინო ბურჯანაძე მინსკში იმყოფებოდა, სადაც ის ევრაზიის უსაფრთხოების საერთაშორისო კონფერენციას დაესწრო და ბელარუსის პრეზიდენტ ალექსანდრე ლუკაშენკოს შეხვდა.
რუსული გამოცემები წერენ, რომ ლუკაშენკომ და ბურჯანაძემ კონფერენციის ფარგლებში ისაუბრეს. ქართველმა პოლიტიკოსმა, ნინო ბურჯანაძემ, ბელარუსის პრეზიდენტი საჯაროდ მოიხსენია, როგორც "შესანიშნავი ორატორი" ("замечательный оратор"), რისთვისაც ლუკაშენკომ მას მადლობა გადაუხადა და შემდგომ განხილვებზე მიიწვია.
ბელარუსის ლიდერის თქმით, იგი დაინტერესებულია საკითხების შემდგომი განხილვით და ბურჯანაძე დიალოგისთვის მიიწვია.
ევრაზიის უსაფრთხოების მინსკის კონფერენციას ესწრებოდა რუსეთის ფედერაციის საგარეო საქმეთა მინისტრი სერგეი ლავროვიც.
აღსანიშნავია, რომ ლუკაშენკომ კონფერენციის გახსნაზე მკვეთრი ანტიდასავლური განცხადებები გააკეთა. მან დასავლეთის ქვეყნები გააკრიტიკა იმაში, რომ ისინი "ცდილობენ დათრგუნონ ბელარუსის ეკონომიკა" და გამოიწვიონ "სოციალური აჯანყებები". ბელარუსის ლიდერმა კიდევ ერთხელ ხაზგასმით აღნიშნა, რომ მისი ქვეყანა რუსეთს ეყრდნობა.