"მთავრობა ალბათ ჩემი 150 წლის იუბილეს მომილოცავს და აღნიშნავს" - რას ამბობს იუბილარი, 93 წლის ლეო ანთაძე
ყველაზე მხცოვანი, აღარებული ქართველი მსახიობი - ლეო ანთაძე იუბილარია, მსახიობს 93 წელი შეუსრულდა. თუ სად და როგორ აღნიშნავს დაბადების დღეს, ამის გასარკვევად თავად ლეო ანთაძეს დავუკავშირდით...
- გილოცავთ ბატონო ლეო დაბადების დღეს!
- დიდი მადლობა!
- საზეიმოდ აღნიშნავთ?
- აღნიშნავენ, ახლა ბათუმში ვარ, ბავშვები მილოცავენ, ერთი ამბავია. ზეიმი მიმდინარეობს, კონცერტია, მეც ვმონაწილეობ ამ შეხვედრაში. მთელი სკოლა ესწრება. საღესასწაულო ტორტი მომართვეს სანთლებით, სული შევუბერე.
- ბათუმის ერთ-ერთმა სკოლამ სიურპრიზი მოგიწყოთ?
- დიახ, მე არაფერი ვიცოდი და ძალიან ბედნიერი ვარ, ასე რომ მომილოცეს.
- ორი წლიდან მეგობრობდით თქვენ და ელდარ შენგელაია...
- ეჰ, არ მითხრათ... ძალიან დიდი სევდა მაქვს, ყოველთვის ვულოცავდით ერთმანეთს დაბადების დღეებს. მართლაც ძალიან დიდი მეგობარი დავკარგე და მაგ დარდს ვერაფერი გამიქარვებს.
- სახელმწიფო თუ აღნიშნავს თქვენს დაბადების დღეს რამე ღონისძიებით?
- არა, მრგვალი თარიღი არ არის. მთავრობა ალბათ ჩემი 150 წლის იუბილეს მომილოცავს და აღნიშნავს... ძალიან ბევრი მოლოცვა მივიღე ფეისბუქზე, 4 ათასზე მეტი და ნელ-ნელა ყველა მოლოცვას გავეცნობი.
(სპეციალურად საიტისთვის)