სუნამოს ბოთლში ჩასხმული საწამლავი, რომელმაც ბრიტანელი ქალი მოკლა - პუტინის რეჟიმის შემთხვევითი მსხვერპლი
"ბრიტანელი დონ სტერჯესის სიკვდილზე მორალური პასუხისმგებლობა რუსეთის პრეზიდენტს ვლადიმერ პუტინს ეკისრება" - ამის შესახებ დამოუკიდებელი გამოძიების ხელმძღვანელმა, ლორდმა ენტონი ჰიუზმა განაცხადა.
ბრიტანელი ქალი საბრძოლო ნერვულ-პარალიტიკური ნივთიერება "ნოვიჩოკით" მოწამვლის შედეგად 2018 წელს გარდაიცვალა. ჰიუზმა კი ახლა გამოძიების შედეგები გამოაქვეყნა.
ლორდ ჰიუზმა თქმით, როგორც რუსეთის აგენტების, ისე ყველა იმ პირის ქმედება რომლებმაც ყოფილი ГРУ-ს თანამშრომლის სერგეი სკრიპალის მოწამვლაზე გასცეს ნებართვა, თავად პუტინის ჩათვლით, "აღმაშფოთებლად უპასუხისმგებლოს" მოიქცნენ.
"სკრიპალის სახლის კარის სახელურზე ძლიერი შხამის წასმითა და "ნოვიჩოკის" ნარჩენებით სავსე ფლაკონის გადაგდებით, რუსმა აგენტებმა, განუსაზღვრელი რაოდენობის უდანაშაულო ადამიანების სიცოცხლე სასიკვდილო საფრთხეში ჩააგდეს —სწორედ ამ ქმედებების მსხვერპლი გახდა დონ სტერჯესი" - აცხადებს ლორდ ჰიუზი.
ოფიციალური რუსეთი კვლავ უარყოფს სკრიპალების მოწამვლაში ნებისმიერ მონაწილეობას.
ჰიუზის ანგარიშის გამოქვეყნებასთან ერთად ბრიტანეთის ხელისუფლებამ გამოაცხადა, რომ რუსეთის მთელს სამხედრო დაზვერვას — ГРУ-ს (სრულიად: გენერალური შტაბის მთავარი სამმართველო) და მის 11 თანამშრომელს სანქციებს უწესებს."დღეიდან გაერთიანებული სამეფო უწესებს სანქციებს რუსეთის მთელ სამხედრო დაზვერვას - ГРУ-ს. ГРУ-ს აგენტები ასრულებენ პუტინის მითითებებს, ცდილობენ უკრაინის დესტაბილიზაციას და ქაოსის დათესვას მთელ ევროპაში. ეს ნაბიჯი დონ სტერჯესის სიკვდილთან დაკავშირებული გამოძიების ანგარიშის გამოქვეყნებასთან ერთად გადაიდგა" - ვკითხულობთ ბრიტანეთის მთავრობის პრესსამსახურის განცხადებაში.
დონ სტერჯესი და მისი პარტნიორი ჩარლი როული რუსეთის აგენტების შემთხვევითი მსხვერპლები აღმოჩნდნენ, იმ აგენტების, რომლებმაც 2018 წლის მარტში სკრიპალი და მისი ქალიშვილი "ნოვიჩუკით" მოწამლეს.