"გომელაური გაუგებრობაში მოყოლილი მინისტრი იყო, პასუხისმგებლობა სულ სხვაგან მიდის... გგონიათ, ხარაზიშვილი სადისტია და თვითონ ჩაყარა ნივთიერება თავისი სურვილით?"
რეჟიმი არ გაჩერდება, ყველაფერზე ბოლომდე წავა, იმოქმედებს იქამდე, სანამ ჩვენ სადღაც არ გავაჩერებთ. გაჩერდება იმ შემთხვევაში, თუ მის ძალადობას დაუპირისპირდება გადაულახავი ძალა, რომელიც მას დააფრთხობს და შეაშინებს, - ამის შესახებ პოლიტოლოგმა, გია ხუხაშვილმა „პალიტრანიუსის“ გადაცემაში „360 გრადუსი“ შეკრებისა და მანიფესტაციის შესახებ კანონის გამკაცრებასთან დაკავშირებით განაცხადა.
ხუხაშვილის თქმით, ქვეყანაში არ არიან იმ წონის პოლიტიკური ავტორიტეტები, რომლებიც პროტესტში მყოფი ხალხის ძალის კონსოლიდაციას მოახდენს."ეს არის რეჟიმის თვისება, ერთგვარი პოლიტიკური ბულიმია ახასიათებს რეჟიმს, უნდა შეჭამოს ყველაფერი, რისი შეჭმაც შეიძლება და ჭამენ... ვერ ძღებიან ძალაუფლებით. გასაგებია ის შეტყობინება, რომელიც ამ კანონშია, დანარჩენი ჩვენზეა დამოკიდებული.
როდესაც რეჟიმი ასე გიტევს, ის ბოლომდე წავა. ჩვენ არ უნდა გვქონდეს იმის ილუზია, რომ ის სადღაც გაჩერდება. არ გაჩერდება, ის სულ უნდა ვითარდებოდეს, სულ უფრო და უფრო მეტი შეზღუდვები უნდა შემოჰქონდეს იმიტომ რომ თუ გაჩერდა, მას უჩნდება შიში, რომ გაჩერების შემთხვევაში შეიძლება ყველაფერი ჩამოიშალოს. იმოქმედებს იქამდე, სანამ ჩვენ სადღაც არ გავაჩერებთ. გაჩერდება იმ შემთხვევაში, თუ მის ძალადობას დაუპირისპირდება ძალა, გადაულახავი ძალა, რომელიც მას დააფრთხობს და შეაშინებს.
ძალას ახლა კი ვხედავ, მაგრამ ეს ძალა არის დაქსაქსული. ძალიან დიდი ძალაა, მაგრამ სხვადასხვა სოციალურ და პროფესიულ ჯგუფებშია დაქსაქსული. პოლიტიკური ხელმძღვანელობა არ ჰყავს, რომ ამის კონსოლიდაცია მოახდინოს. სამწუხაროდ, არ გვყავს იმ ტიპის პოლიტიკური ავტორიტეტები, რომელსაც შეუძლია, ეს ყველაფერი შეაგროვოს და ერთიან დინებაში მოაქციოს“, - განაცხადა ხუხაშვილმა.