რუსული ავიაკატასტროფის დეტალები - რატომ გადატყდა შუაზე მსოფლიოში უდიდესი ტურბოხრახნიანი თვითმფრინავი?
225-ტონიანი რუსული „ანტეი“ ჰაერშივე შუაზე გადამტყდარა...
ამ ბლოგში გამოქვეყნებულ სტატიაში „შავი დღე რუსებისთვის - ყველაზე დიდი ტურბოხრახნიანი ბოლო „ანტეიც“ ჩამოვარდა“ უკვე ვწერდით, რომ 9 დეკემბერს ქალაქ ივანოვოსთან ავიაკატასტროფა განიცადა და წყალსაცავში ჩავარდა რუსეთის საჰაერო-კოსმოსური ძალების ბოლო მოქმედი და მსოფლიოში უდიდესი ტურბოხრახნიანი სამხედრო-სატრანსპორტო თვითმფრინავი Ан-22А Анте́й. თუმცა მაშინ ცნობილი არ იყო, რას შეიძლება გამოეწვია ამ უზარმაზარი თვითმფრინავის კატასტროფა...
და ახლა ვრცელდება ვიდეოკადრები, გადაღებული „ანტეის“ კატასტროფის რაიონში მდებარე კერძო სახლების სათვალთვალო ვიდეოკამერების მიერ, რომლებზეც ნათლად მოჩანს, რომ ეს 225-ტონიანი, ოთხძრავიანი თვითმფრინავი, თურმე, ჰაერშივე შუაზე გადატეხილა და ისე ჩავარდნილა წყალსაცავში... ისევე, როგორც თვითმხილველებმა მოასწრეს 11 ნოემბერს კახეთის თავზე თურქული სამხედრო-სატრანსპორტო თვითმფრინავის - C-130E Hercules-ის ჰაერში დაშლისა და მისი მსხვილი ფრაგმენტების, მათ შორის - 40 მ სიგრძის ფრთის ჰაერში ფარფატით დაშვებისა და მიწაზე დაცემის პროცესის გადაღება, რუსული „ანტეის“ შემთხვევაშიც სათვალთვალო ვიდეოკამერებმა დააფიქსირეს ამ, 57 მ სიგრძის თვითმფრინავის ჰაერშივე შუაზე გადატეხის მომენტი...
ასეთი ვიდეოკადრები მნიშვნელოვნად აჩქარებენ ავიაკატასტროფების გამოძიებას და რუსული „ანტეის“ შემთხვევაშიც, დიდი ალბათობით, შეიძლება, ადგილი ჰქონდეს „ლითონის დაბერების“ ფიზიკურ პროცესს, რადგან კონკრეტულად ამ, Ан-22А Анте́й-მ, სარეგისტრაციო ნომრით RF-08832, ხოლო საქარხნო ნომრით - 053484317, პირველი გაფრენა განახორციელა ჯერ კიდევ 1975 წლის 28 აგვისტოს ანუ ნახევარ საუკუნეზე მეტია, რაც დაფრინავდა და სრულიად შესაძლებელი გახლდათ მის კონსტრუქციაში დაწყებულიყო „ლითონის დაბერების“ საშიში პროცესიც...
ვიდეო - რუსული „ანტეის“ კატასტროფის ვიდეოკადრები, გადაღებული სათვალთვალო კამერიდან
ამ ავიაკატასტროფის შემდეგ დაიწერა, რომ თითქოს „ანტეიმ“ მანამდე გაიარა საკონტროლო-აღდგენითი რემონტი, რუსეთის 308-ე საავიაციო სარემონტო ქარხანაში, რომელიც ასევე ივანოვოში მდებარეობს და წესით, ამ საკონტროლო რემონტის დროს ულტრაბგერითი დეფექტოსკოპიით უნდა აღმოეჩინათ თვითმფრინავის ლითონის კონსტრუქციებში განვითარებული მიკრონაპრალები. თუმცა თავად 308-ე საავიაციო სარემონტო ქარხნის ხელმძღვანელობამ კატეგორიულად უარყო ამ „ანტეის“ ახალი რემონტის ფაქტი და დააკონკრეტა - ამ თვითმფრინავს საკონტროლო-აღდგენითი სამუშაობი მათ ქარხანაში ბოლოს... 2007 წელს ჩაუტარდა და მას შემდეგ მის ექსპლუატაციასა და მომსახურებას რუსეთის მე-8 სამხედრო-სატრანსპორტო საავიაციო პოლკის ინჟინრები აგრძელებდნენო...
სამხედრო ნაწილის საინჟინრო-საავიაციო სამსახურს გასაგებია, რომ არ ექნებოდა იმის ტექნიკური შესაძლებლობა, რომ ამ უზარმაზარი „ანტეის“ ლითონის კონსტრუქციებისთვის ულტრაბგერითი დეფექტოსკოპია მილიმეტრობით ჩაეტარებინა... რუსეთ-უკრაინის ომის მასშტაბებისა და დროში გაჭიანურების ფონზე, რუსეთის საჰაერო-კოსმოსური ძალების 50-40-35 წლის ასაკის სამხედრო-სატრანსპორტო თვითმფრინავები (რომლებსაც ჯერ კიდევ საბჭოთა სამხედრო-საჰაერო ძალები იყენებდნენ) დიდი ინტენსივობით დაფრინავენ ფრონტის მომარაგების ინტერესებში, რაც სწრაფად „ჭამს“ მათ საფრენოსნო რესურს, რასაც ემატება მათ კონსტრუქციებში „ლითონის დაბერების“ ბუნებრივი პროცესიც და ეს ყველაფერი ჯამში მოასწავლებს რუსულ სამხედრო-სატრანსპორტო თვითმფრინავებთან დაკავშირებულ ახალ საავიაციო შემთხვევების გარდაუვალობას...