"პირველი ლედი", რომელიც ჟურნალისტებს პარლამენტში შესვლას უკრძალავდა და მილიონერი გერები... - რა არის ცნობილი დაკავებულ ნიკოლას მადუროსა და მის ცოლზე
მსოფლიო მედია საგანგებო რეჟიმში მუშაობს: ამერიკის შეერთებული შტატების პრეზიდენტმა, დონალდ ტრამპმა განაცხადა, რომ აშშ-ის ძალებმა ვენესუელაში "მასშტაბური დარტყმა" განახორციელეს, რის შედეგადაც ქვეყნის ლიდერი, ნიკოლას მადურო და მისი მეუღლე, სილია ფლორესი დაკავებულები არიან და ქვეყნიდან უკვე გაიყვანეს.
რა მოხდა კარაკასში?
შაბათს, 2026 წლის 3 იანვარს, გამთენიისას ვენესუელის დედაქალაქ კარაკასში მინიმუმ შვიდი ძლიერი აფეთქების ხმა გაისმა. თვითმხილველები ყვებიან, რომ ქალაქის თავზე დაბალ სიმაღლეზე მფრინავი სამხედრო თვითმფრინავები ჩანდნენ. აფეთქებები მოხდა სტრატეგიულ ობიექტებთან, მათ შორის "ლა კარლოტას" აეროპორტთან და საპრეზიდენტო სასახლე "მირაფლორესთან".
ტრამპმა ინფორმაცია საკუთარ პლატფორმაზე, Truth Social-ზე გაავრცელა:
"ამერიკის შეერთებულმა შტატებმა წარმატებით განახორციელა მასშტაბური იერიში ვენესუელასა და მის ლიდერზე, პრეზიდენტ ნიკოლას მადუროზე, რომელიც თავის მეუღლესთან ერთად დატყვევებულია და ქვეყნიდან გაყვანილია."
ამ დროისთვის ვენესუელის ვიცე-პრეზიდენტი, დელსი როდრიგესი ადასტურებს, რომ ხელისუფლებისთვის მადუროს ადგილსამყოფელი უცნობია და აშშ-სგან "სიცოცხლის დამადასტურებელ მტკიცებულებებს" ითხოვს.
ვინ არის სილია ფლორესი - "პირველი მებრძოლი" და "რუხი კარდინალი" მადუროს ზურგს უკან
ვენესუელაში მას იშვიათად მოიხსენიებენ "პირველ ლედიდ". ნიკოლას მადურომ მას "პირველი მებრძოლი" (Primera Combatiente) შეარქვა, რადგან ტერმინი "პირველი ლედი" ჩავისტური იდეოლოგიისთვის ზედმეტად არისტოკრატიულად მიიჩნიეს. თუმცა, სილია ფლორესი ბევრად მეტია, ვიდრე პრეზიდენტის მეუღლე - ექსპერტები მას მადუროს რეჟიმის "რუხ კარდინალს" და ქვეყნის ყველაზე გავლენიან ქალს უწოდებენ.