"უნდათ, ნაკადი, რაც სტუ-ში მიდიოდა, ქუთაისში გადავიდეს" - ტატა ხვედელიანი უნივერსიტეტების გაერთიანებაზე
რეფორმა და საკანონმდებლო ინიციატივა, რომელიც ჩვენი ოპონირების და წინააღმდეგობის მიუხედავად, მათ მაინც მიიღეს, სამი მიზნის მატარებელია - მათ შორის, ამ კანონპროექტით ისინი გზას უხსნიან საკუთარ თავს, რომ ნებისმიერ უნივერსიტეტში ნებისმიერი ცვლილება აკადემიური საბჭოების და სტუდენტების გვერდის ავლით განახორციელონ, - ამის შესახებ პარტია „გახარია საქართველოსთვის” დეპუტატმა, ტატა ხვედელიანმა განათლების რეფორმაზე საუბრისას განაცხადა.
მისი თქმით, „ქართული ოცნების” მიზანია, რომ სტუდენტთა ნაკადი, რომელიც ტექნიკურ უნივერსიტეტში მიდიოდა, ქუთაისის უნივერსიტეტში გადავიდეს.
ამასთან ხვედელიანის განცხადებით, მმართველ გუნდს ის შენობები და მიწები აინტერესებს, რომელიც ამ უმაღლეს სასწავლებლებშია.
„აქაც ჩანს, როგორ იტყუება „ოცნება”, რადგან წინასაარჩევნოდ ტექნიკური უნივერსიტეტის სტუდენტებს და პროფესორ-მასწავლებლებს ამ უნივერსიტეტის განვითარებას და აღმშენებლობას დაჰპირდნენ. თვეების შემდეგ კი ვხედავთ, საკუთარი განცხადებით აუქმებენ ასწლოვანი ისტორიის მქონე უნივერსიტეტს, რომელმაც ჩვენს ქვეყანას უამრავი ინჟინერი, ტექნიკოსი და დარგის სპეციალისტი გაუზარდა. სტუდენტებმა, პროფესორ-მასწავლებლებმა და რექტორმა ეს ყველაფერი გაიგეს სატელევიზიო ეთერიდან, სადაც „ნაცების” ციხეების უფროსი, [გივი] მიქანაძე მათ ტელევიზიიდან ეუბნება ამის შესახებ.
რაც შეეხება რეფორმას და საკანონმდებლო ინიციატივას, რომელიც ჩვენი ოპონირების და წინააღმდეგობის მიუხედავად, მათ მაინც მიიღეს, ეს რეფორმა სამი მიზნის მატარებელია: პირველი - კორუფციული დაინტერესება, აინტერესებთ შენობები და მიწები, რომელიც ამ უმაღლეს სასწავლებლებშია. მეორე - აკადემიური თავისუფლების შეზღუდვა. ამ კანონპროექტით ისინი გზას უხსნიან საკუთარ თავს, რომ ნებისმიერ უნივერსიტეტში ნებისმიერი ცვლილება აკადემიური საბჭოების და სტუდენტების გვერდის ავლით განახორციელონ.
"ინტერპრესნიუსი"