"სიგიჟეა და არ შეიძლება, რომ ადამიანის სიკვდილი გვანიჭებდეს სიხარულს" - ვადო მაჭავარიანი ბექა გოცირიძის გარდაცვალებას ეხმაურება
8 თებერვალს, ცნობილი გახდა, რომ გარდაიცვალა საქართველოს ეროვნული ნაკრების ყოფილი წევრი, ბექა გოცირიძე. 37 წლის სპორტსმენის გარდაცვალების მიზეზი უცნობია.
ის 2005-2009 წლებში საქართველოს ეროვნული ნაკრებისა და სხვადასხვა ასაკობრივი გუნდების ერთ-ერთ იმედისმომცემ თავდამსხმელად მიიჩნეოდა. მიუხედავად სპორტული კარიერისა, ბოლო პერიოდში იგი აქტიურად იყო ჩართული საზოგადოებრივ-პოლიტიკურ პროცესებში, იყო "ქართული ოცნების" აქტიური მხარდამჭერი და საკუთარ პოზიციას სოციალური ქსელების მეშვეობითაც ხშირად გამოხატავდა.
მომხდარს უკვე გამოეხმაურნენ როგორც სპორტული სამყაროს წარმომადგენლები, ისე პოლიტიკური ოპონენტები. კერძოდ, პოლიტიკური მოძრაობის "სართული - ახალი თაობის ძალა“ ლიდერმა, ვადო მაჭავარიანმა, სპეციალური ვიდეომიმართვა გაავრცელა, რომელშიც ხაზი გაუსვა, რომ სიკვდილთან ყოველგვარი პოლიტიკური დაპირისპირება სრულდება და საზოგადოებას გარდაცვლილის მიმართ ეთიკური მოპყრობისკენ მოუწოდა.
"ბექა გოცირიძე გარდაიცვალა; და მიუხედავად იმისა, რომ განსაკუთრებით ამ ბოლო დროს გადაკიდებული იყო ჩემზე და ჩვენზე, ყველა მეორე ვიდეოში მახსენებდა, გვახსენებდა უზრდელურად, მაინც მინდა ვთქვა, რომ სიგიჟეა და არ შეიძლება, რომ ადამიანის სიკვდილი გვანიჭებდეს სიხარულს.
ამიტომ იმ ადამიანებს, ვინც ჩვენ გვისმენთ, ჩვენ გვენდობით და ვინც ჩვენი ვიდეოებიდან გაიცანით ის უარყოფით კონტექსტში, ძალიან გთხოვთ, რომ ნუ მოვიხსენიებთ გარდაცვლილ ადამიანს ცუდად და მოდი, ვუთხრათ საკუთარ თავებს უბრალოდ ის, რომ ცხონდეს ყველა ისე, როგორც დაიმსახურა.
პირადად ჩემის მხრიდან, მინდა მივუსამძიმრო იმ ორ მოხუც ადამიანს, ვისთვისაც ის შვილი იყო და ასევე ბავშვს, პატარას, ვისთვისაც ის მამა იყო. მოდი ვიფიქროთ, ამ ადამიანებზე, ვინც ჯერ კიდევ ცოცხლები არიან და არაფერი დაუშავებიათ. ვრცლად