NBA-ში გაფორმებული ყველაზე დიდი კონტრაქტები მხოლოდ ფული არ არის - რწმენის სიმბოლოა
ყოველი ხელმოწერის უკან მთელი ცხოვრება დგას. ცარიელ დარბაზებში გატარებული საათები, სროლები, ტრავმები, კრიტიკა და ის დღეები, როცა არავინ უყურებდა - ყველაფერი ერთ წამში იყრის თავს, როცა კალამი ქაღალდს ეხება.
კონტრაქტი მხოლოდ ანაზღაურება არ არის. ეს არის ორგანიზაციის იმედი: "ჩვენს მომავალს შენ გაბარებთ"; ეს არის იმის დადასტურება, რომ ყოველი გათენებული დილა, ყოველი მარცხი და საკუთარი თავის შეურყეველი რწმენა ამად ღირდა. გულშემატკივრისთვის ეს თანხები შეიძლება წარმოუდგენლად დიდია, მაგრამ მოთამაშისთვის ის წამია, როცა ბავშვობის ოცნება რეალობად იქცევა. კონტრაქტი ფინალური წერტილი არ არის -— ეს ახალი დასაწყისია, რომელსაც უფრო დიდი პასუხისმგებლობა, მოლოდინი და ზეწოლა მოაქვს. ყველა რეკორდული კონტრაქტის მიღმა დგას ბავშვი, რომელიც NBA-ში თამაშზე ოცნებობდა. საბოლოოდ, კონტრაქტი მხოლოდ ხელმოწერილი ფურცელია, მაგრამ ისტორია, რომელმაც ამ ხელმოწერამდე მიიყვანა, არის ის, რაც მას ნამდვილ მნიშვნელობას ანიჭებს. NBA-ში ყოველ სეზონში ბევრი რამ იცვლება, მაგრამ ერთი ტენდენცია უცვლელი რჩება - ხელფასები ისტორიულ ნიშნულებს კვლავაც აღწევს.
ათი წლის წინ ლიგის ყველაზე მაღალანაზღაურებადი მოთამაშეები სეზონში 25-30 მილიონ დოლარს გამოიმუშავებდნენ. 2026-27 წლების სეზონისთვის ყველაზე მაღალანაზღაურებადი კალათბურთელის კონტრაქტი 60 მილიონ დოლარზე მეტს შეადგენს. მართალია, 2026-27 წლების სეზონის ყველაზე ძვირად ღირებული კონტრაქტების მფლობელები ყველასთვის ცნობილი ვარსკვლავები არიან, თუმცა ყველა მათგანი ვერ ამართლებს იმ მოლოდინს, რასაც ფრენჩაიზ-მოთამაშეები ქმნიან (გუნდის მთავარი მოთამაშე, რომლის გარშემოც აიგება თამაში, შემადგენლობა და კლუბის მომავალი).
2026-27 წლების სეზონში ყველაზე მაღალი ხელფასი კვლავ იმ მოთამაშეს აქვს, ვინც ამ მაჩვენებლით NBA-ს უკვე 2017-18 წლების სეზონიდან ლიდერობს - "გოლდენ სტეიტ უორიორსის" ვარსკვლავ სტივენ კარის. მან წლების განმავლობაში არაერთი ახალი კონტრაქტი გააფორმა "უორიორსთან", რის შედეგადაც ლიგის ყველაზე მაღალანაზღაურებადი მოთამაშის სტატუსი დღემდე შეინარჩუნა. 2024 წელს მან ერთწლიანი, 62,58 მილიონი დოლარის ღირებულების კონტრაქტის გაგრძელებას მოაწერა ხელი, რომელმაც ის "გოლდენ სტეიტში" 2026-27 წლების სეზონის დასრულებამდე დატოვა. თუმცა, მომავალი სეზონის შემდეგ, როდესაც კარი 38 წლის იქნება, ის თავისუფალი აგენტის სტატუსს მოიპოვებს და კარიერაში მორიგ მნიშვნელოვან გადაწყვეტილებას მიიღებს. ამ შეთანხმებამდე კი "უორიორსთან" ოთხწლიანი, 215,35 მილიონი დოლარის მაქსიმალური კონტრაქტით თამაშობდა. ამის წყალობით ის, 2017-18 წლების სეზონიდან მოყოლებული, ყოველწლიურად NBA-ს ყველაზე მაღალხელფასიანი მოთამაშეა. NBA-ს ისტორიაში ყველაზე დიდი კონტრაქტები ჯეისონ ტეიტუმსა და ჯეილენ ბრაუნს ჰქონდათ. მათ შორის ყველაზე მასშტაბურია ტეიტუმის 2024 წელს გაფორმებული ხუთწლიანი, 313,9 მილიონი დოლარის ღირებულების კონტრაქტის გაგრძელება, რომელიც ლიგის ისტორიაში ყველაზე ძვირად ღირებული შეთანხმებაა. მიუხედავად იმისა, რომ სტივენ კარი 2026-27 წლების სეზონში ყველაზე მაღალანაზღაურებადი მოთამაშეა, მისი ამჟამინდელი ხელშეკრულება მხოლოდ ერთ სეზონს მოიცავს. სწორედ ამიტომ კონტრაქტის საერთო ღირებულებით ის NBA-ს ყველაზე ძვირად ღირებული შეთანხმებების სათავეში აღარ დგას.
ყველაზე მაღალი ერთსეზონიანი ანაზღაურება (2026-27):
სტივენ კარი ("გოლდენ სტეიტ უორიორსი") - 62,59 მილიონი დოლარი
ნიკოლა იოკიჩი ("დენვერ ნაგეტსი") - 59,03 მილიონი დოლარი
ჯეისონ ტეიტუმი ("ბოსტონ სელტიკსი") - 58,46 მილიონი დოლარი
ენტონი დევისი ("ლოს-ანჯელეს ლეიკერსი") - 58,46 მილიონი დოლარი
იანის ანტეტოკუნმპო ("მილუოკი ბაქსი") - 58,46 მილიონი დოლარი
ყველაზე ძვირად ღირებული მოქმედი კონტრაქტები
(ჯამური ღირებულებით):
ჯეისონ ტეიტუმი - 313,9 მილიონი დოლარი (5-წლიანი კონტრაქტის გაგრძელება)
ჯეილენ ბრაუნი - 285,4 მილიონი დოლარი (5-წლიანი კონტრაქტი)
ნიკოლა იოკიჩი - 276,1 მილიონი დოლარი
ნიკოლოზ თევდორაშვილი