“სასწრაფოებს მთელი ღამე გადაჰყავდათ ბავშვები კლინიკებში ...“ - რას ჰყვებიან მშობლები ბაგა-ბაღებში მასობრივი ინტოქსიკაციის შესახებ და რას აცხადებენ დირექტორები მომხდარზე
სოციალურ ქსელში მასიურად გავრცელდა ინფორმაცია თბილისის რამდენიმე საჯარო საბავშვო ბაღში ბავშვების ინტოქსიკაციაზე. როგორც მშობლები ამბობენ, მათ შვილებს პირღებინება და მუცლის ტკივილი აღენიშნებათ და რამდენიმე ბავშვს კლინიკაშიც დასჭირდა გადაყვანა.
მშობლების დიდი ნაწილი თვლის, რომ ბავშვები ბაღში მოიწამლნენ. მათივე ინფორმაციით, მოწამლულია რამდენიმე ათეული ბავშვი. დაიკეტა ბაღები, საიდანაც ბავშვები სხვადასხვა საავადმყოფოებში გადაიყვანეს. მათ შორისაა, თბილისის 49-ე, 46-ე, 109-ე, 124 -ე, 121-ე, 79-ე, 22-ე, 59-ე საბავშვო ბაგა ბაღები.
“მწვავე ინტოქსიკაციით მთელი ღამე სასწრაფოებს გადაჰყავდათ ბავშვები კლინიკებში. ჩემს შვილს ჰქონდა მთელი ღამე ღებინება, მე არ გადამიყვანია, მაგრამ ჩემი ბავშვის ჯგუფელები მოხვდნენ კლინიკაში. სავარაუდოდ არის კვებითი ინტოქსიკაცია, მეტს მე ვერაფერს გეტყვით. დავაკვირდები ახლა ბავშვს და თუ დამჭირდა ქვეყანას შევძრავ. არ გავჩუმდები”, - ამბობს ერთ-ერთი ბავშვის დედა.
ჩვენ დავუკავშირდით დასახელებული ბაღის, კერძოდ 49 ბაგა ბაღის დირექტორს, მან თავიდან არ დაგვიდასტურა მოწამლის ფაქტი, როცა მშობლის კონკრეტული სახელი და გვარი ვუთხარით, გვითხრა, რომ ინფორმაცია ჯერ არ აქვს. “ჯერჯერობით არავინ არ ვიცით სრული დიაგნოზი და სრული ინფორმაცია, ვინ რით მოიწამლა. ეს არ არის მხოლოდ 49-ე ბაღში, ეს ბევრ ბაღში დაფიქსირდა და ამიტომ სრულად პასუხს ვერ გაგცემთ. ასე რომ კარგად ბრძანდებოდეთ,” - განაცხადა მან, რის შემდეგაც ტელეფონი გათიშა.
მომხდარზე ambebi.ge-თან ისაუბრა 109-ე ბაგა ბაღის ხელმძღვანელმა, ქალბატონმა მარინა კობაჩიშვილმა და ფაქტი დაგვიდასტურა:
“ზუსტ პასუხს ვერ გეტყვით, მოწამლულები არიან საკვებით, თუ ვირუსია... მიმდინარეობს გამოძიება და ჯერჯერობით ამ ეტაპზე უცნობია, ეს ვირუსია თუ მოწამვლა. ჩვენი ბაღიდან კლინიკაში არის 3 ბავშვი გადაყვანილი, დაახლოებით 10-მდე ბავშვია ამ სიმპტომებით. ველოდებით კვლევას. კვება ჩვენთან აბსოლუტურად 100%-ით კონტროლირებადია”, - აღნიშნავს მარინა კობაჩიშვილი.