ამერიკა ირანზე ახალი შეტევისთვის ემზადება?!
აშშ-ის ოფიციალური პირების განცხადებით, რამდენიმე დღის წინ პენტაგონმა აშშ-ის ცენტრალურ სარდლობას დაავალა, ირანში მასშტაბური საბრძოლო მოქმედებების განახლებისთვის მზადება დაასრულოს, - ინფორმაციას Axios-ი ავრცელებს.
გამოცემის ცნობით, აღნიშნული მითითება არ მოიცავდა დარტყმების განხორციელების კონკრეტულ თარიღს და აღნიშნულ საკითხთან დაკავშირებით პრეზიდენტ დონალდ ტრამპს საბოლოო გადაწყვეტილება ჯერ არ მიუღია. თუმცა, ამერიკელი და ისრაელელი წყაროების ცნობით, ეს შესაძლოა, აშშ-ის შუალედურ არჩევნებამდე, ან შესაძლოა, ერთი კვირით ადრე დაგეგმილ ისრაელის არჩევნებამდე მოხდეს.
წყაროების თანახმად, მასშტაბური საბრძოლო მოქმედებების განახლების შემთხვევაში, მოსალოდნელია ირანის ენერგეტიკული, ინფრასტრუქტურული და ბირთვული ობიექტების მასიური დაბომბვა.
გამოცემა წერს, რომ უახლოეს სამ-ოთხ კვირაში ომის განახლებამ შესაძლოა, გავლენა მოახდინოს შუალედურ არჩევნებზე, ნაწილობრივ იმის გამო, რომ ამის საპასუხოდ ნავთობის ფასები შეიძლება გაიზარდოს.
„უწყების მოვალეობაა, პრეზიდენტს წარუდგინოს სამხედრო მოქმედებების განხორციელების ვარიანტები“, - განუცხადა Axios-ს პენტაგონის ოფიციალურმა პირმა.
გამოცემა The Atlantic-მაც გაავრცელა ინფორმაცია, რომ ტრამპი შუალედურ არჩევნებამდე ირანზე დარტყმის განხორციელების შესაძლებლობას განიხილავს.
დონალდ ტრამპის ეროვნული უსაფრთხოების გუნდმა რამდენიმე დღის წინ „კემპ-დევიდში“ რამდენიმესაათიანი შეხვედრა გამართა ომისა და სხვა საკითხების განსახილველად.
ისრაელის ოფიციალურმა პირმა გამოცემა Axios-ს განუცხადა, რომ შეხვედრის ნაწილი ირანში მასშტაბური საბრძოლო მოქმედებების შესაძლო განახლებას დაეთმო.
"ინტერპრესნიუსი"