“ვიცი, როგორი გული გაქვს... რამდენი ძალა იმალება შენში“ - ნიცა თავაძის ემოციური წერილი ხვიჩა კვარაცხელიას
საქართველოს ეროვნული საფეხბურთო ნაკრების კაპიტანს და პსჟ-ს ვარსკვლავს მისი მეუღლე, ნიცა თავაძე ამხნევებს.
გუშინ, პსჟ-ბარსელონას თამაშის მიმდინარეობისას “კვარამ“ ტრავმა მიიღო და მოედნის დატოვება დროზე ადრე მოუწია. მოგვიანებით მისი დიაგნოზიც გაირკვა - ფეხბურთელს ჯვარედინი იოგი აქვს გაწყვეტილი და ოპერაცია ესაჭიროება.
რეაბილიტაცია კი საკმაოდ ხანგრძლივი - 7-დან 9 თვემდე გაგრძელდება.
აღნიშნულს გამოეხმაურა თავად ხვიჩა კვარაცხელია და გულშემატკივრებს მიმართა, რომ “მზად არის ეს თვეები შრომაში, ტკივილში, ცრემლებში გაატაროს.“ ის პირობას დებს რომ მოედანზე ორმაგად ძლიერი დაბრუნდება.
ნიცა თავაძე მეუღლეს ემოციური სიტყვებით მიმართავს:
“ჩვენ ერთად ძალიან ბევრი რამ გამოვიარეთ, აღვნიშნეთ ისეთი მომენტები, რომლებზეც ოდესღაც მხოლოდ ოცნება შეგვეძლო, და გადავლახეთ სირთულეები, რომლებმაც გზადაგზა უფრო ძლიერები გაგვხადა. მაგრამ მე ვიცი, რომ ადამიანის სიძლიერის ნამდვილი საზომი ის არ არის, როგორ დგას ის მაშინ, როდესაც ყველაფერი კარგად მიდის, არამედ ის, თუ როგორ დგება ფეხზე მაშინ, როცა ცხოვრება ყველაზე რთულ განსაცდელებს უმზადებს.
მე საკუთარი თვალით მინახავს შენი თავგანწირვა, დისციპლინა, მიზანდასახულობა და ის უთვალავი ბრძოლა, რომელსაც ჩუმად გადიოდი, რათა დღევანდელი ადამიანი გამხდარიყავი. მე ვიცი, როგორი გული გაქვს, როგორი ხასიათი და რამდენი ძალა იმალება შენში. და ისიც ვიცი, რომ ვერცერთი დაბრკოლება, ვერცერთი მარცხი და ვერცერთი რთული პერიოდი ვერ წაგართმევს იმას, რაც აქამდე შეგიქმნია.
ზოგჯერ ცხოვრება ყველაზე ძლიერ ადამიანებსაც ისეთ განსაცდელებს უმზადებს, როგორსაც ისინი არასდროს ელოდნენ. მაგრამ მთელი გულით მჯერა, რომ ეს მომენტიც ჩვენი საოცარი ისტორიის კიდევ ერთი ნაწილი გახდება. ერთ დღეს უკან მოვიხედავთ და ამ პერიოდს გავიხსენებთ არა იმით, თუ რამდენად რთული იყო ის, არამედ იმით, თუ რამდენი ძალა დაგვჭირდა მის გადასალახად.