რა უთხრა გამოძიებას დავით ფეიქრიშვილმა, რომელიც "ვივამედის" კლინიკაში გამოკითხეს?!
განსაკუთრებით დიდი ოდენობით უკანონო შემოსავლის ლეგალიზაციის ფაქტზე ბრალდებული, ე.წ. კრიმინალურ ავტორიტეტებთან დაკავშირებული დავით ფეიქრიშვილი კლინიკა „ვივამედში“ გამოკითხეს.
პატიმართან იუსტიციის სამინისტროს გენერალური ინსპექციის საგამოძიებო სამმართველოს წარმომადგენლები იმყოფებოდნენ, რომელთაც ფეიქრიშვილი ჩვენებას 5 საათის განმავლობაში აძლევდა.
როგორც „ინტერპრესნიუსთან“ საუბარში ფეიქრიშვილების ადვოკატი, პაატა გოგიაშვილი განმარტავს, დავით ფეიქრიშვილმა საგამოძიებო უწყების წარმომადგენლებს დაუსახელა ყველა ის პირი, რომელიც მის მიმართ განხორციელებულ ძალადობაში მონაწილეობდა. მათ შორის, ე.წ. კრიმინალური ავტორიტეტები, ვატო ყიფიანი, ავთანდილ ბილანიშვილი და ა.შ.
გოგიაშვილის თქმით, ფეიქრიშვილს გამომძიებლები როგორც ძალადობის განმხორციელებელ პირებთან, ასევე, ციხის ადმინისტრაციასთან დაკავშირებით უსვამდნენ კითხვებს.
„დავით ფეიქრიშვილმა ამომწურავი პასუხები გასცა ყველა იმ კითხვას, რომელიც ბოლო დღეების განმავლობაში ტელევიზიებისა და პრესის საშუალებით ვრცელდება. კითხვები იყო, როგორც ძალადობის განმხორციელებელი პირების მიმართ, ასევე ციხის ადმინისტრაციის მიმართ. მან მიუთითა ყველაფერი, თავის სახელებით და გვარებით“, - აცხადებს გოგიაშვილი.
"ინტერპრესნიუსი"