ვენაში გამართული სამეფო ქორწილის დეტალები, პატარძლის დიადემა და სიყვარულის ხუთწლიანი ისტორია - ახალი კადრები ცერემონიიდან
ქართველი ზურაბ (ზუტა) ძიძიგური ლიხტენშტეინის პრინცესა მარია-იმაკულატას მეუღლე გახდა. წყვილის ქორწინების საზეიმო ცერემონია 2026 წლის 31 ოქტომბერს, ავსტრიის დედაქალაქ ვენაში, წმინდა პეტრეს ტაძარში გაიმართა. ჯვრისწერა მართლმადიდებლური წესით შესრულდა, განსაკუთრებული ყურადღება კი მიიპყრო პატარძლის ისტორიულმა სამკაულმა და ნეფის ქართულმა ჩოხამ.


სასიხარულო ამბავი საზოგადოებას ზურაბ ძიძიგურის დამ, ქრისტინე ბაგრატიონ-მუხრანელმა, სოციალურ ქსელში გაუზიარა. მისი მეუღლე იოანე ბაგრატიონ-მუხრანელია, თავად კი საქართველოს სამეფო ოჯახის წარმომადგენელია. სწორედ ქრისტინეს პოსტიდან გახდა ცნობილი სიყვარულის ისტორია, რომელიც ხუთი წლის წინ თბილისში დაიწყო.

მარია-იმაკულატა საქართველოში პირველად 2021 წელს ჩამოვიდა. სწორედ თბილისში შეხვდნენ ერთმანეთს მომავალი მეუღლეები. მათი ნაცნობობა განსაკუთრებულ მეგობრობასა და სიყვარულში გადაიზარდა, თუმცა ურთიერთობის შესახებ წყვილი საჯაროდ თითქმის არაფერს ავრცელებდა. როგორც ქრისტინე ბაგრატიონ-მუხრანელი განმარტავს, ნიშნობის შესახებ ინფორმაციის გასაიდუმლოება ლიხტენშტეინის სამთავრო სახლის დინასტიურ წესებს უკავშირდებოდა.

ქორწინებას წინ უძღოდა აუცილებელი ფორმალური პროცედურები, მათ შორის ზურაბ ძიძიგურის პირადი შეხვედრა ლიხტენშტეინის სუვერენულ პრინც ჰანს-ადამ II-სთან, რომელიც მარია-იმაკულატას ბიძაა. ქრისტინე ბაგრატიონის ინფორმაციით, შესაბამისი პროცედურების დასრულების შემდეგ პრინცესა საქართველოს კათოლიკოს-პატრიარქ შიო III-საც წარუდგინეს.

მარიამ იმაკულატა ლიხტენშტეინის პრინც გუნდაკარისა და საფრანგეთის სამეფო დინასტიის წარმომადგენლის, პრინცესა მარი დ’ორლეანის ქალიშვილია. იგი ევროპული არისტოკრატიის რამდენიმე ისტორიულ საგვარეულოს უკავშირდება, მათ შორის ბურბონებს, ჰაბსბურგებსა და ბავარიის ვიტელსბახებს. პრინცესა 1991 წლის 15 დეკემბერს ვენაში დაიბადა. განათლება დიდ ბრიტანეთსა და ავსტრიაში მიიღო, საერთაშორისო ურთიერთობებს სწავლობდა, მოგვიანებით კი ვენის დიპლომატიურ აკადემიაში განაგრძო სწავლა. მისი პროფესიული საქმიანობა საერთაშორისო ურთიერთობებსა და ბიზნესსაკონსულტაციო სფეროსაც უკავშირდება.

საქორწინო ცერემონიის ერთ-ერთი გამორჩეული დეტალი პატარძლის სამკაული გახდა. მარია-იმაკულატას ისტორიული „ფარშევანგის“ (Peacock) დიადემა ეკეთა, რომელიც ფირუზებითა და ბრილიანტებით არის შემკული. 1926 წელს შექმნილი სამკაული თურნ-უნდ-ტაქსების საგვარეულოს ისტორიულ კოლექციას უკავშირდება და პრინცესას მამისეული ბებიის ოჯახიდან გადაეცა. დიადემა თითქმის ერთი საუკუნის წინანდელ სამეფო სამკაულს წარმოადგენს. თავის მხრივ, ზურაბ ძიძიგურმა ქორწილისთვის ქართული ტრადიციული ჩოხა შეარჩია, რითაც ცერემონიას ეროვნული ელფერი შესძინა.

ვენაში გამართულ ქორწილს ევროპის სხვადასხვა ქვეყნის სამეფო და არისტოკრატიული ოჯახების წარმომადგენლები ესწრებოდნენ. ეს ქორწინება განსაკუთრებული აღმოჩნდა იმითაც, რომ ერთმანეთს საქართველოს ისტორიულ სამეფო გვართან დაკავშირებული ოჯახი და ევროპის ერთ-ერთი უძველესი სამთავრო დინასტია დაუკავშირდა.

ლიხტენშტეინის სამთავრო ოჯახი დღემდე ევროპის ერთ-ერთი ცნობილი მმართველი დინასტიაა. ქვეყნის სუვერენული პრინცი ჰანს-ადამ II, რომლის თანხმობაც ქორწინების ფორმალური პროცედურების ნაწილი გახდა, მარია-იმაკულატას ბიძაა.
