"დაჭრილი ცნობილი კრიმინალური ავტორიტეტია, ამნისტიით არის ციხიდან გამოსული" - მორიგი კრიმინალური გარჩევა - კვირის პალიტრა

"ამ დროს კი საშინელი რამ დავინახე, - შუაში ვინც ჰყავდათ ჩაყენებული, ის კაცი ჩაიკეცა და დაეცა, დანარჩენები კი უცებ მოწყდნენ და გაიქცნენ".

"კრიმინალური გარჩევები გახშირდა, ყოველ შემთხვევაში, გურიაში ასე ხდება და არა გვგონია, რომ ქვეყანაში სხვანაირი ვითარება იყოს. საუბედუროდ, ისეთი სიტუაციაა ლამის უკვე, რომ ქუჩაში გასვლის გვეშინია. გვიკვირს, რატომ არ ხმაურდება ეს ამბები!" - ასე დაიწო ჩვენთან ლაპარაკი ქალბატომა, რომელიც ოზურგეთის ცენტრში, ერთ-ერთი საცხოვრებელი კორპუსის ეზოში მომხდარ დანაშაულს შეესწრო, რა დროსაც მუცელში ცივი იარაღით მძიმედ დაიჭრეს ამნისტირებული პატიმარი ა. ა. შემთხვევა დაახლოებით 22 სთ-დან - 23საათამდე მოხდა. ინციდენტს ბევრი თვითმხილველი ჰყავს, თუმცა საუბრისას ვინაობის გამხელას ერიდებიან, ამბობენ, რომ კრიმინალების ეშინიათ. მომხდარს შსს იძიებს.

მ.ლ; - ბნელოდა, ეზოში კი არც ისე კარგი განათება გვაქვს, რომ გაიხედო და ცხადად დაინახო რაც ხდება. სახლში ვიყავი და ჩვეულებრივად ვსაქმიანობდი, ეზოდან ხმაური რომ შემომესმა. უფრო სწორედ ეს ჩხუბი იყო, მაგრამ კი არ ყვიროდნენ, რაღაცნაირად მოგუდულად ლაპარაკობდნენ, თითქოს ერთმანეთს რაღაცს თხოვდნენ... ვიფიქრე, ალბათ პატარა ბიჭები არიან, მაგათ სიცოცხლე არაფრად უღირთ, ერთმანეთს არაფერი დაუშავონ-მეთქი, ამიტომ ფანჯარაში გადავიხედე, მეგონა, ერთს დავუცაცხანებდი და გაიქცეოდნენ, მაგრამ პატარა ბიჭების ნაცვლად 4 თუ 5 ზრდასრული კაცი დავინახე, რომლებიც ერთმანეთს რაღაცას ედავებოდნენ. ძალიან გავბრაზდი, - ამ ხნის ხალხს არ რცხვენიათ, ამ ღამეს ეზოში რომ ჩხუბობენ, წავიდნენ და ცოლ-შვილს მიხედონ-მეთქი; ამ დროს კი საშინელი რამ დავინახე, - შუაში ვინც ჰყავდათ ჩაყენებული, ის კაცი ჩაიკეცა და დაეცა, დანარჩენები კი უცებ მოწყდნენ და გაიქცნენ. მაღლიდან დავყურებდი, ნახვერად ბნელ ეზოში და ვერ მოვხვდი რა უქნეს. რატომღაც ვიფიქრე, ალბათ უბედურს მუცელში მუშტი ჩაარტყეს-მეთქი და ქმარს დავუძახე, - გეხვეწები, ეზოში ჩხუბია, ვიღაც კაცს სცემეს, წააქციეს და ასფალტზე გდია, წადი, არ მოკვდეს-მეთქი და ისიც წავიდა. ამასობაში წაქცეულმაც იყვირა და სხვებიც მოვარდნენ. იმ უბედურს თურმე მუცელში დანა გაუყარეს, სისხლი თქრიალით მოსდიოდა. მერე მანქანაც გამოჩნდა და საავადმყოფოში წაიყვანეს. ჩემი ქმარი ეზოდან რომ ამოვიდა, მითხრა, - ისე დაუჭრიათ, შეიძლება ვეღარც გადარჩესო. მერე როგორც გავიგე, დანა ძალიან ღრმად ჰქონია მუცელში გაყრილი და ექიმებიც ფიქრობდნენ, რომ ოპერაციას ვერ გაუძლებდა. მაგრამ ამჟამად ცოცხალია. ისე, ისიც თქვეს, მაგას კრიმინალები მაგ ფულს მაინც არ შეარჩენენ, რამეს აუცილებლად მოუხერხებენო.

- დაჭრილი ვერავინ იცნო?

- როგორ ვერ იცნო. მაგ კაცს ოზურგეთში ყველა ცნობს, - ცნობილი კრიმინალური ავტორიტეტია, ამნისტიით არის ციხიდან გამოსული. კაცი უკვე 50 წლის ასაკს არის გადაშორებული და აღარ ეყო ციხეში ყოფნა? საკუთარი ნებით ისევ სიკვდილს რატომ დაეძებს?!…

- ანუ ინციდენტი მისი მიზეზით მოხდა?

- როგორც ამბობენ, ის ხალხი გადაუგდია, რაღაც თანხა უნდა მიეცა და არ მისცა თურმე... თუმცა რეალურად რა და როგორ მოხდა ამას გამოძიება დაადგენს.

ამჟამად დაჭრილი ა. ა. ოზურგეთის სამედიცინო ცენტრშია. მძიმე ჭრილობის გამო მისი მდგომარეობა კვლავ რთულია. მორიგი თავდასხმის აცილების მიზნით მის სიცოცხლეს საავადმყოფოში ბადრაგი იცავს. ინციდენტს შსს იძიებს. საქმე სისხლის სამართლის 117-ე მუხლით არის აღძრული, რაც ჯანმრთელობის განზრახ დაზიანებას გულისხმობს. დანმაშავე ჯერჯერობით მიმალულია.

ეთერ ერაძე (სპეციალურად საიტისთვის)