"დანაშაულის ჩადენის შემდეგ, სახლის უკან თვითმკვლელობა სცადა" - წალენჯიხაში მომხდარი მკვლელობის ახალი დეტალები
წალენჯიხის რაიონის სოფელ ლიაში შემზარავი მკვლელობა მოხდა. ახალგაზრდა მამაკაცმა მშობლებს თავები მოკვეთა.
სოფელ ლიას რწმუნებულის, ვახტანგ კვირკველიას განცხადებით, შემთხვევა დღეს დილით მოხდა.
„ეს მამაკაცი ფსიქიურად ჯანმრთელი არ არის. ბავშვობიდან პრობლემები აქვს. დღეს დილით მშობლებს ნაჯახით მოაჭრა თავი, შემდეგ კი გაქცევა სცადა, მოგვიანებით კი თვითდაზიანებები მიიყენა“, - განაცხადა კვირკველიამ.
შინაგან საქმეთა სამინისტრომ სამეგრელოში, დამამძიმებელ გარემოებაში ჩადენილი განზრახ მკვლელობის ფაქტი გახსნა.
გამოძიებამ დაადგინა, რომ მიმდინარე წლის 19 ნოემბერს, წალენჯიხის რაიონის სოფელ ლიაში, 1981 წელს დაბადებულმა ი.ქ.-მ, საკუთარ საცხოვრებელ სახლში, მშობლებს - 1931 წელს დაბადებულ ვ.ქ.-ს და 1931 წელს დაბადებულ რ.გ.-ს თავისა და კისრის არეში ნაჯახით მრავლობითი დაზიანება მიაყენა.
მიყენებული დაზიანებების შედეგად, ორივე მათგანი შემთხვევის ადგილზე გარდაიცვალა. ასევე დადგინდა, რომ ბრალდებული ფსიქიკურადაა დაავადებული და შესაბამის სამედიცინო დაწესებულებაში აღრიცხვაზე იმყოფება.
„დანაშაულის ჩადენის შემდეგ, ი.ქ.-მ საცხოვრებელი სახლის უკან არსებულ ტყის მასივში თვითმკვლელობა სცადა. შემთხვევის ადგილზე ოპერატიულად მისულმა სამართალდამცველებმა სუიციდი დროულად აღკვეთეს და ი.ქ. ჰოსპიტალში გადაიყვანეს. ამჟამად იგი საავადმყოფოში ბადრაგის ზედამხედველობის ქვეშ იმყოფება. პოლიციამ დანაშაულის ჩადენის იარაღი - ნაჯახი ნივთმტკიცებად ამოიღო“, - ნათქვამია განცხადებაში.
სამეგრელო-ზემო სვანეთის პოლიციის დეპარტამენტში გამოძიება დამამძიმებელ გარემოებაში ჩადენილი განზრახ მკვლელობის ფაქტზე (საქართველოს სსკ-ს 109 მუხლის მე-3 ნაწილის „ა“ ქვეპუნქტით) მიმდინარეობს.