პრემიერ-მინისტრი: "შეიძლება ითქვას, რომ ხანძარი არის ლიკვიდირებული" - კვირის პალიტრა

პრემიერ-მინისტრი: "შეიძლება ითქვას, რომ ხანძარი არის ლიკვიდირებული"

"შეიძლება ითქვას, რომ ხანძარი არის ლიკვიდირებული", - ამის შესახებ პრემიერ-მინისტრმა გიორგი კვირიკაშვილმა ჟურნალისტებს ბორჯომში, რამდენიმე წუთის წინ განუცხადა.

მისივე განმარტებით, აღნიშნულის მიუხედავად, რამდენიმე დღის განმავლობაში შტაბი მაინც გააგრძელებს მუშაობას.

"შეიძლება ითქვას, რომ ხანძარი არის ლიკვიდირებული. შესაძლოა, მომდევნო დღეების განმავლობაში იყოს ცალკეული სახანძრო წერტილოვანი კერები, რასაც შესაბამისად მივხედავთ. სწორედ ამიტომ, შტაბი გააგრძელებს შემდეგი დღეების განმავლობაში მუშაობას", - განაცხადა პრემიერმა.

პრემიერმა მადლობა გადაუხადა ყველა იმ ადამიანს, რომელიც გასული დღეების განმავლობაში ხეობაში ხანძრის სალიკვიდაციო სამუშაოებში მონაწილეობდა და აღნიშნა, რომ მათ ზოგიერთ შემთხვევაში მუშაობა სიცოცხლისთვის რისკის შემცველ ადგილებში უწევდათ.

"რა თქმა უნდა, გამოვიარეთ ძალიან სერიოზული კრიზისული დღეები. ამ დღეების განმავლობაში იყო ბევრი კრიტიკაც, იყო ბევრი თბილი სიტყვებიც, მაგრამ მე მინდა ვთქვა, რომ არც ერთი ჩვენგანის, აქ ვინც ვიმყოფებით - მთავრობის წევრის შრომა არ არის მოსატანი ერთი ცალკეული ადამიანის თავდადებასთან, რომელიც ჩვენ ვნახეთ იმ წერტილებში, სადაც იყო სიცოცხლის რისკიც და ამ ადამიანებმა ძალიან დიდი მასივი ჩვენი ულამაზესი ტყის, გადაარჩინეს განადგურებას. ამიტომ მე ქედს ვიხრი თითოეული მათგანის თავდადების წინაშე. ეს გამოწვევა ჩვენმა ქვეყანამ ღირსეულად გადალახა", - განაცხადა კვირიკაშვილმა.

"ინტერპრესნიუსის" მასალების მიხედვით