"მარტო მე პრემიერს არ შევხვდები - 6 თვე ვეხვეწე და ახლა რა უნდათ, ულტიმატუმებს აქეთ მიყენებენ?"
ხორავას ქუჩაზე მოკლული დავით სარალიძის მამა, ზაზა სარალიძე მთავრობის ადმინისტრაციასთან მივიდა, თუმცა აცხადებს, რომ მარტო პრემიერ-მინისტრს არ შეხვდება.
მისი თქმით, ერთი საათის განმავლობაში დაელოდება გადაწყვეტილებას შეხვედრის ფორმატთან დაკავშირებით.
როგორც სარალიძემ განაცხადა, მედიის წარმომადგენლებმა დატოვონ მიკროფონები და კამერები და მათთან ერთად შევა პრემიერთან შესახვედრად.
მისი თქმით, მიუღებელია განცხადებები იმის თაობაზე, რომ მალხაზ მაჩალიკაშვილთან ან პოლიტიკური პარტიების წარმომადგენლებთან ერთად პრემიერთან შეხვედრაზე არ შეუშვებენ.
„ულტიმატუმებს ნუ მიყენებენ. აქ მე მარტო ჩემი შვილის სახელით აღარ ვლაპარაკობ. ჩვენს გვერდში არის მალხაზ მაჩალიკაშვილი და ყველა შვილმოკლული მშობელი.
რაც შეეხება განცხადებას იმის თაობაზე, რომ მარტო მიმიღებენ შეხვედრაზე, დაველოდები ერთი საათის განმავლობაში და თუ არ შემიშვებენ იმ მოთხოვნებით, რაც მე მაქვს, კარგად ბრძანდებოდნენ. მარტო პრემიერს არ შევხვდები. 6 თვე ვეხვეწე და ახლა რა უნდათ, ულტიმატუმებს აქეთ მიყენებენ? - განაცხადა ზაზა სარალიძემ.
მთავრობის ადმინისტრაციაში სახალხო დამცველი ნინო ლომჯარიაც მივიდა. ადმინისტრაციაში ასევე მივიდნენ მალხაზ მაჩალიკაშვილო და ზაზა სარალიძის ადვოკატი.
მთავრობის ადმინისტრაციის ხელმძღვანელის, შალვა თადუმაძის განცხადებით, პრემიერი შეხვდება ყველა შვილმოკლულ მშობელს, ვინც ამ წუთას მთავრობის ადმინისტრაციასთან იმყოფება, მათ შორის მალხაზ მაჩალიკაშვილს.
თადუმაძის თქმით, პრემიერი დღეს პოლიტიკური პარტიების წარმომადგენლებს შეხვედრაზე არ მიიღებს.
"ინტერპრესნიუსი"