"მე კი არ ვუღალატე მათ, თავად არ მომცეს გუნდში დარჩენის საშუალება" - კვირის პალიტრა

"ბიძინა ივანიშვილზე მეტი გავლენა საქართველოს პარლამენტში ოქრიაშვილს ჰქონია, რაც წარმოუდგენლად მიმაჩნია"

საპარლამენტო უმრავლესობის წევრმა ზვიად ძიძიგურმა საარჩევნო სისტემასთან დაკავშირებული საკონსტიტუციო ცვლილების ჩავარდნის გამო საპარლამენტო უმრავლესობა და პარლამენტის თავმჯდომარის მოადგილის თანამდებობა დატოვა.

- ბატონო ზვიად, ვინ არის პასუხისმგებელი, რომ დღეს დაძაბული პოლიტიკური ვითარებაა?

- ყველაფერზე, რაც ქვეყანაში ხდება, კარგი იქნება თუ ცუდი, პასუხისმგებელია ხელისუფლება. ძნელი არ იყო იმის გამოცნობა, თუ პარლამენტი პროპორციული არჩევნების შესახებ კანონპროექტს ჩააგდებდა, ვითარება დაიძაბებოდა. ახლა ცეცხლზე ნავთის დასხმა კი არა, შემხვედრი ნაბიჯებია საჭირო.

- ცეცხლზე ნავთს ვინ ასხამს?

- სრულად მაჟორიტარულ საარჩევნო სისტემაზე გადასვლის ინიციატივა გზავნილია ოპოზიციისთვის, რომ ხელისუფლება აპირებს უფლებამოსილებისა და საპარლამენტო უმრავლესობის სრულად გამოყენებას მისთვის სასურველი სქემის მოსაწყობად. ეს სხვა რა არის, თუ არა ცეცხლზე ნავთის დასხმა?

- როგორ გგონიათ, "ქართულ ოცნებას" არ ჰქონდა იმედი, რომ მოიგებდა 2020 წლის არჩევნებს პროპორციული სისტემით? - სანამ პარლამენტი საკონსტიტუციო ცვლილებას ჩააგდებდა,"ოცნებას" მოგების ყველაზე დიდი შანსი ჰქონდა. ჯერ კიდევ გაზაფხულიდან დაიწყეს სოფელ-სოფელ, ქალაქ-ქალაქ სიარული და მოსახლეობასთან შეხვედრა, მათი პრობლემების აღრიცხვა. ამ დროს ოპოზიცია მხოლოდ ხელისუფლებას აკრიტიკებდა, მას მოსახლეობისთვის არც ერთი ინიციატივა არ შეუთავაზებია, რითაც შეიძლებოდა მოსახლეობის მხარდაჭერის მოპოვება. ამიტომაც გეუბნებით - "ოცნებას" 2020 წლის არჩევნების მოგება არც პროპორციული, არც შერეული და არც მაჟორიტარული სისტემით არ გაუჭირდებოდა.

- მაშინ რისთვის გახდა საჭირო საარჩევნო სისტემის ჩაგდების სცენარი? - ეს ჩემთვისაც აუხსნელია. ძალიან დილეტანტური იყო პასუხი, რომ თურმე კოალიციას ვერავისთან შევქმნიდით, თუ 50%-ზე ნაკლებს ავიღებდით. არჩევნებში გამარჯვებული პოლიტიკური ძალა კოალიციურ მთავრობას ათი შემთხვევიდან მხოლოდ ერთხელ ვერ ქმნის. ამ შემთხვევაში ყველა რესურსი იყო საიმისოდ, რომ "ოცნებას" "ნაციონალებისა" და რუსული ორიენტაციის პარტიების გარეშე შეექმნა კოალიციური მთავრობა.

პროპორციული არჩევნების შედეგად პარლამენტში შევიდოდა ათი, თხუთმეტი პარტია და პოლიტიკური მინდვრის დივერსიფიცირება მოხდებოდა. ამიტომ იმაზე შიში და წუხილი, კოალიციური მთავრობის შექმნა კითხვის ნიშნის ქვეშ დადგებაო, მხოლოდ თავის მართლების მცდელობა მგონია.

- თქვენ უმრავლესობა იმ დღესვე არ დაგიტოვებიათ, როდესაც ეს კანონპროექტი ჩავარდა. ფაქტია, ფიქრისთვის დრო დაიტოვეთ. უმრავლესობის ლიდერთან თუ სცადეთ ვითარებაში გარკვევა? - არავითარი მცდელობა არ მქონია და არც უნდა მქონოდა, რადგან ჩვენ ამ საკითხზე ხელი ჩამოვართვით ერთმანეთს რამდენიმე თვის წინ. კონსერვატორებს მთელი 8 წლის განმავლობაში არ დაგვირღვევია თამაშის წესები. ის ერთი დღე გამოვიყენე ჩემი ფრაქციის წევრებთან შესახვედრად, არ მინდოდა ისინი ფაქტის წინაშე დამეყენებინა. გადაწყვეტილება მას შემდეგ აღვასრულე, რაც ჩემს თანამებრძოლებს ვესაუბრე. არავითარი ემოციური გადაწყვეტილება არ მიმიღია და არც გაბრაზებული ვარ. უბრალოდ,

გული მწყდება, რომ "ქართულმა ოცნებამ" ვერ გამოიყენა ის შესაძლებლობები, რაც ჰქონდა.

- ფაქტია, არც თქვენ გჯერათ გუნდის ლიდერის შემოთავაზებული ვერსიის პროპორციული სისტემის ჩაგდების შესახებ. - ეს ვერსია შემოგვთავაზა თავად""ქართულმა ოცნებამ" და თუ მას გავშიფრავთ, გამოდის, ბიძინა ივანიშვილზე მეტი გავლენა საქართველოს პარლამენტში ოქრიაშვილს ჰქონია, რაც წარმოუდგენლად მიმაჩნია.

ვიცი, როგორია რეალური ვითარება, ამიტომ ვერ დავიჯერებ. თუმცა არც იმის დაჯერება მინდა, რომ ამ სცენარის ავტორი ბიძინა ივანიშვილია. ყველაზე დიდი დარტყმა სწორედ მას მიადგა, ეს არის რეპუტაციული ზიანი, რომელიც პოლიტიკაში ძვირად ფასობს.

- წინა მოწვევის პარლამენტში მაჟორიტარი დეპუტატი იყავით. დღეს როგორ ხედავთ, რამდენად რეალურად აფასებენ მაჟორიტარები თავიანთ ფუნქციას, როდესაც მაჟორიტარული სისტემის აუცილებლობაზე ლაპარაკობენ? - ახლა გამოკითხვა რომ ჩაატაროთ, მაჟორიტარული სისტემის გაუქმებას ხალხი მხარს არ დაუჭერს. მოსახლეობას მოსწონს, მისი წარმომადგენელი რომ არის პარლამენტში, მიუხედავად იმისა, რომ შესაძლოა, მისი მუშაობით უკმაყოფილო იყოს. ცალსახად შემიძლია ვთქვა - მოსახლეობაში მაჟორიტარული სისტემის გაუქმების თემა პოპულარული არ არის. ეს იყო პოლიტიკური თემა, პრინციპული საკითხი ქვეყნისა და პოლიტიკური პარტიების განვითარებისთვის. მაჟორიტარული თუ პროპორციული სისტემები კი არ არის პრობლემა, მთავარი პრობლემა ის გახლავთ, რომ მთელი 6 თვის განმავლობაში პოლიტიკური პარტიის ლიდერი და "ქართული ოცნების" ყველა წარმომადგენელი უმტკიცებდნენ მთელ მსოფლიოს, ყველა პოლიტიკურ მოთამაშეს, რომ ჩვენ მივიღეთ პოლიტიკური გადაწყვეტილება, გადავდივართ პროპორციულ სისტემაზე, საბოლოოდ კი გაირკვა, ეს სიცრუე ყოფილა.

- თქვენთვისაც მოულოდნელი იყო? - რა თქმა უნდა.

- ახლა რას აპირებთ?

- ჩვენ საკმაოდ დიდი პარტია ვართ, გვყავს ხუთი ათასამდე აქტიური წევრი და რამდენიმე ათეული დეპუტატი საკრებულოებში, ვართ ევროპული კონსერვატიული ალიანსის სრულუფლებიანი წევრი და გვაქვს საერთაშორისო კავშირები, ამიტომ ჩვენ ისევ შეგვიძლია პოლიტიკურ პროცესებში მონაწილეობა, რა ფორმით, ამას მოგვიანებით გაგაცნობთ.

- თქვენს ყოფილ თანამებრძოლებზე რას იტყვით, რომლებიც უმრავლესობაში დარჩნენ და რთულ ვითარებაში გუნდის დატოვება ღალატის ტოლფასად მიაჩნიათ? - მე არაფერი გამიკეთებია ღალატის ტოლფასი, მე იმ გადაწყვეტილებას დავუჭირე მხარი, რაც ყველამ ერთად მივიღეთ. ზვიად გამსახურდიას ზარბაზანი რომ ესროლეს, მივედი დღევანდელი პარლამენტის შენობაში და ბოლომდე მის გვერდით ვიდექი. გამსახურდია რომ გარდაიცვალა, იმ საქმეების გამო, რასაც მას აბრალებდნენ, მე, ჩემი ძმა და სიძე 5 წელი ვისხედით ციხეში. ღალატი ყველამ თავისკენ მოიკითხოს. მე კი არ ვუღალატე მათ, თავად არ მომცეს გუნდში დარჩენის საშუალება. 6 თვის განმავლობაში ყველგან, სადაც ხელი მიმიწვდებოდა, ამ საკითხზე ვლაპარაკობდი და ნამდვილად არ მინდა ამდენი ხალხის წინაშე მატყუარად წარმოვჩნდე.

- შესაძლოა, საპროტესტო აქციებზე თქვენც გიხილოთ? - არ ვაპირებ აქციებში მონაწილეობას. არსებობს მედიასაშუალებები, პოლიტიკოსის, პარლამენტის ტრიბუნა და ეს სავსებით საკმარისია ჩემი მოსაზრებების დასაფიქსირებლად. არც იმ ხალხის გვერდით დგომა მინდა, ვის პოლიტიკურ საქმიანობაზეც კარგი წარმოდგენა არა მაქვს.

ხათუნა ბახტურიძე