"ომის გზით მსგავსი კონფლიქტი შეუძლებელია მოგვარდეს" - რას ამბობენ აზერბაიჯანელი და სომეხი დეპუტატები მათ ქვეყნებს შორის არსებულ კონფლიქტზე - კვირის პალიტრა

"ომის გზით მსგავსი კონფლიქტი შეუძლებელია მოგვარდეს" - რას ამბობენ აზერბაიჯანელი და სომეხი დეპუტატები მათ ქვეყნებს შორის არსებულ კონფლიქტზე

12 ივლისს სომხეთ-აზერბაიჯანის საზღვარზე დაპირისპირება მოხდა. თუმცა ამჯერად დაპირისპირების არეალი არა მთიანი ყარაბაღი, არამედ აზერბაიჯანის ტოვუზის და სომხეთის ტავუშის რაიონია. ცეცხლის გახსნაში აზერბაიჯანი სომხეთს ადანაშაულებს, სომხეთი კი - აზერბაიჯანს. შეტაკებას მოჰყვა მსხვერპლი.

მომხდარს ევროკავშირის სპეციალური წარმომადგენელი სამხრეთ კავკასიასა და საქართველოში კრიზისის საკითხებში, ტოივო კლაარიც გამოეხმაურა.

"შეშფოთებული ვარ სომხეთ-აზერბაიჯანის საზღვარზე მომხდარი ორმხრივი სროლის გამო. ორივე ქვეყნისთვის მნიშვნელოვანია, გამოიჩინონ თავშეკავება და კომუნიკაციისთვის ყველა არხი, როგორც პირდაპირი, ასევე ეუთოს მინსკის ჯგუფის თანათავმჯდომარეების ოფისები გამოიყენონ,"- წერს ტოივო კლაარი სოციალურ ქსელში.

"2017 წელს ყარაბაღის კონფლიქტი ან ომით გადაწყდება, ან მშვიდობით" - ეს განცხადება აზერბაიჯანის პარლამენტის დეპუტატმა და საერთაშორისო საკითხებში ექსპერტმა რასიმ მუსაბეკოვმა ჯერ კიდევ 2016 წელს გააკეთა. თუმცა, როგორც უკვე ითქვა, ამჯერად დაპირისპირების ადგილი არა მთიანი ყარაბაღი, არამედ ტოვუზის რაიონია.

Kvirispalitra.ge დაუკავშირდა აზერბაიჯანისა და სომხეთის ოფიციალურ პირებს და მათ ქვეყნებში არსებული ვითარების შესახებ ესაუბრა:

მილი მეჯლისის დეპუტატი რასიმ მუსაბეკოვი აცხადებს, რომ აზერბაიჯანი ვერ შეეგუება თავისი ტერიტორიების ოკუპაციას, რითაც ომის რისკი კიდევ უფრო იზრდება.

"აზერბაიჯანულმა მხარემ განაცხადა, რომ იმ შემთხვევაში, თუკი სომხეთი გაიყვანს ჯარისკაცებს, აზერბაიჯანი საერთაშორისო პარტნიორებთან ერთად მზადაა უზრუნველყოს ყარაბაღში მცხოვრები სომხების უსაფრთხოება, მოახდინოს დემილიტარიზაცია, კომუნიკაციების გახსნა, დიპლომატიური თუ ეკონომიკური ურთიერთობების დამყარება. თუმცა, ამას ვერ ვხედავთ. ისინი არ ეძებენ მშვიდობას ყარაბაღელი სომხებისთვის", - ამბობს მუსაბეკოვი.

რაც შეეხება სომხეთის პარლამენტის წევრს, ანუშ ბეგლოიანს, ჩვენთან საუბრისას ხაზს უსვამს იმას, რომ თანამედროვე, ცივილიზებულ სამყაროში პრობლემები ომით არ გვარდება.

"სიტუაცია სომხეთში საკმაოდ სტაბილურია. ჩვენი მოსახლეობა და მთავრობა ამ საკითხს ერთნაირად უყურებს. მოსახლეობას ესმის, რომ კონფლიქტის მშვიდობიანი გზით გადაწყვეტა შესაძლებელია მხოლოდ თანაბარი ჩართულობით, მოლაპარაკებებით, პრობლემის მოგვარების ძალოვანი მეთოდების გამორიცხვით.

გამოცდილებამ აჩვენა, რომ ომის გზით მსგავსი კონფლიქტი შეუძლებელია მოგვარდეს ცივილიზებულ, თანამედროვე სამყაროში. ხელისუფლებამ უნდა აწარმოოს მოლაპარაკებები. მხარეები უნდა იყვნენ დარწმუნებულები, რომ მოლაპარაკებაზე გაკეთებულ განცხადებებს ორივე მხარე შეასრულებს, ამისთვის კი საჭიროა ნდობა. ჩვენთვის ყველაზე მთავარია გამოვრიცხოთ ომი, ასევე მნიშვნელოვანია ყარაბაღში მცხოვრები მოსახლეობის, თავის მშობლიურ მხარეში მყოფი ადამიანების უფლებების უსაფრთხოების უზრუნველყოფა.. სხვა დანარჩენი უბრალოდ მეთოდებია.

ჩვენ ამ ტერიტორიაზე ვცხოვრობთ, ჩვენ განწირულები ვართ მეზობლობისთვის. სხვა რიტორიკა, საომარი მოქმედებები ვერ უზრუნველყოფენ ხანგძლივ მშვიდობას რეგიონში", - განაცხადა ბეგლოიანმა.

რეგიონში შემავალ ქვეყნებზე საუბრისას, გვერდს ვერ ავუვლით რუსეთის ფაქტორს და მის გავლენას აღნიშნულ კონფლიქტზე. საინტერესოა, როგორია ორივე მხარის განწყობა ამ თვალსაზრისით და ზოგადად რას ფიქრობს ადგილობრივი მოსახლეობა. ამ კითხვით ჩვენ აზერბაიჯანელ ჟურნალისტს, ნიჯატ ჰაჯიევსა და სომეხ პოლიტიკურ მიმომხილველს, ელენ ჰოხიკიანს მივმართეთ. ნიჯატ ჰაჯიევი

"თქვენ წარმოიდგენდით, რომ ამხელა აზერბაიჯანი, რომელიც ასეა აღჭურვილი, დაარტყამდა სომხეთს? თუკი გვენდომებოდა სომხებთან ბრძოლა, ამას სხვაგვარად გავაკეთებდით. ჩვენ არ გვინდა სომხების ტერიტორიების ოკუპაცია, საკუთარი ტერიტორიების დაბრუნება გვინდა. ადრე თუ გვიან ასეც მოხდება. ეს კონფლიქტი სტრატეგიულად მნიშვნელოვანია საქართველოსთვის. ამიტომ, საქართველო უნდა იყოს დაინტერესებული, რომ ამ ტერიტორიებზე უპირატესობა აზერბაიჯანმა მოიპოვოს.

ისიც უნდა გვესმოდეს, რომ როდესაც ვსაუბრობთ სომხეთის კონტროლის ქვეშ არსებულ ტერიტორიებზე, ჩვენ ნაწილობრივ რუსეთსაც ვგულისხმობთ" - აცხადებს ნაჯიევი.

რაც შეეხება ჰოხიკიანის პოზიციას, ის ხაზს უსვამს სომხეთში დემოკრატიული პროცესების მიმდინარეობას. ელენ ჰოხიკიანი

"აზერბაიჯანისგან განსხვავებით, ჩვენ დემოკრატიული ქვეყანა ვართ, ჩვენი სახელმწიფოს მუშაობა აბსოლუტურად გამჭვირვალეა.

მიუხედავად იმისა, რომ აზერებაიჯანელები პირველ გასროლაში ჩვენ გვდებენ ბრალს, პირველები ისინი იყვნენ, რადგან სომხეთი ყოველთვის მოუწოდებდა მათ მშვიდობიანი მოლაპარაკებისკენ, მაშინ როდესაც აზერბაიჯანელები ომით იმუქრებიან. რუსეთი ორივე მხარეს ჰპირდება დახმარებას, რუსეთი შემოიფარგლა მშვიდობიანი პოზიციით.

ცუდია, რომ მეზობლები ომობენ. იმედს ვიტოვებ, რომ ეს კონფლიქტი არ მოახდენს გავლენას საქრთველოში მცხოვრებ სომხურ და აზერბაიჯანულ დიასპორებზე", - აღნიშნა ჰოხიკიანმა.

იხილეთ ინტერვიუები სრულად

თეო ცუცქირიძე (სპეციალურად საიტისთვის)