"ერთმა უყურადღებობამ გამოიწვია ის, რომ 30 ადამიანია დაინფიცირებული" - კვირის პალიტრა

"ერთმა უყურადღებობამ გამოიწვია ის, რომ 30 ადამიანია დაინფიცირებული"

რეგიონულ საკითხებში პრემიერ-მინისტრის მრჩევლის, სოზარ სუბარის განცხადებით, სვანეთის რეგიონში კორონავირუსზე ტესტირების არეალი ფართოდ გაიშალა და რამდენიმე დღეში არსებული ვითარების სრული სურათი გახდება ცნობილი.

სოზარ სუბარი მოუწოდებს სვანეთის მოსახლეობას, ვირუსისთვის დამახასიათებელი რაიმე სიმპტომის ან ტემპერატურის შემთხვევაში, დარეკონ ცხელ ხაზზე ან მიმართონ ექიმს.

"დღეს ტესტირების არეალი ფართოდ გაიშალა, ერთი ჯგუფი წასულია უშგულში და ხეობის დასაწყისში. იდლიანში, ჭუბერში და ხაიშში მუშაობს კიდევ რამდენიმე ჯგუფი და ასე ნელ-ნელა დაიწყება ორივე მხრიდან ამ სოფლების სრულად მოცვა და რამდენიმე დღეში გვეცოდინება სრული სურათი. პარალელურად, იქ, სადაც უკვე ტესტირებები ჩატარდა და სადაც ტესტირებები ჯერ არ ჩატარებულა, პერმანენტული თერმოსკრინინგი იქნება. მოვუწოდებ ადამიანებს, რომ ყველამ, ვისაც აქვს სიცხე ან რაიმე სიმტპომი მაინც, მიაკითხონ ექიმებს, დარეკონ ცხელ ხაზზე იმიტომ, რომ ერთმა უყურადღებობამ გამოიწვია ის, რომ 30 ადამიანი უკვე იდენტიფიცირებულია, როგორც დაინფიცირებული", - განაცხადა სოზარ სუბარმა.

"ინტერპრესნიუსი"