"ტელეფონი ბალიშის ქვეშ იპოვეს" - ვაზიანის ბაზიდან გაუჩინარებულ ჯარისკაცს მთელი ქვეყნის მასშტაბით ეძებენ - კვირის პალიტრა

"ტელეფონი ბალიშის ქვეშ იპოვეს" - ვაზიანის ბაზიდან გაუჩინარებულ ჯარისკაცს მთელი ქვეყნის მასშტაბით ეძებენ

საქართველოს თავდაცვის სამინისტრო განცხადებას ავრცელებს, სადაც აღნიშნავენ რომ სამხედრო მოსამსახურე თეიმურაზ გიუნაშვილის ადგილსამყოფელი ამ დროისთვის უცნობია, რისი დადგენისთვისაც თავდაცვის სამინისტრო სრულ კოორდინაციაშია შესაბამის უწყებასთან.

როგორც უწყებაში აცხადებენ, 22 დეკემბერს თეიმურაზ გიუნაშვილი არ გამოცხადდა სამხედრო ნაწილში, რის შემდეგაც სამინისტრომ განახორციელა სატელეფონო ზარები ოჯახის წევრებთან და ნათესავებთან.

"საკონტრაქტო სამხედრო მოსამსახურე თეიმურაზ გიუნაშვილი მსახურობს თავდაცვის ძალებში, მე-4 მექანიზებულ ბრიგადაში. აღნიშნული სამხედრო პირი 21 დეკემბერს 09:00 სთ-მდე იმყოფებოდა განწესში და ასრულებდა დაკისრებულ მოვალეობას, ხოლო განწესის შეცვლის შემდეგ ისარგებლა კონტრაქტით გათვალისწინებული დათხოვნის უფლებით და დატოვა სამხედრო ნაწილის ტერიტორია, რაც დასტურდება პატაკითა და გამშვები პუნქტის სათვალთვალო ვიდეო კამერებით. 22 დეკემბერს, როდესაც აღნიშნული პირი შესაბამის დროს არ გამოცხადდა სამხედრო ნაწილში, მისმა უშუალო მეთაურმა აღნიშნულ ფაქტთან დაკავშირებით დროულად განახორციელა სატელეფონო ზარები ოჯახის წევრებთან და ნათესავებთან. ამ დროისთვის, თავდაცვის სამინისტრო სრულ კოორდინაციაშია შესაბამის უწყებასთან სამხედრო მოსამსახურის ადგილსამყოფელის დადგენის მიზნით",-აცხადებენ უწყებაში.

შეგახსენებთ, სამხედრო მოსამსახურეს, თეიმურაზ გიუნაშვილს რამდენიმე დღეა, რაც ოჯახი ეძებს. თუმცა, მის კვალს ვერც პოლიციამ და ვერც ოჯახმა ვერსად მიაკვლია. 35 წლის მამაკაცმა სამხედრო ნაწილი 21 დეკემბერს დილით დატოვა და მას შემდეგ, მისი კვალი იკარგება. მას პირადი ნივთებიც კი არ წაუღია. ოჯახი აცხადებს, რომ მას არავისთან ჰქონია კონფლიქტი, არც მობილური ტელეფონისა და ოჯახის გაფრთხილების გარეშე წასულა ოდესმე სადმე. ამიტომ, მათთვის უცნობია, რა მოხდა. სათვალთვალო კამერით გადაღებულ ფოტომასალაში, გიუნაშვილი ბაზას სამოქალაქო ფორმაში ჩაცმული ტოვებს.

იხილეთ ვიდეო: www.palitravideo.ge