"კარტოგრაფებისთვის მოღალატის იარლიყის მიწებება ხელისუფლებამ ვერანაირად ვერ მოახერხა - გირაოს თანხასთან დაკავშირებული სოლიდარობა ამას ადასტურებს"
"ევროპული საქართველოს" წევრის, ხათუნა გოგორიშვილის შეფასებით, საქართველოს ტერიტორიების საწინააღმდეგოდ ჩადენილ ქმედებებში ბრალდებული ივერი მელაშვილი დაკავების პირველი დღიდან წესიერებისა და პრინციპულობის დემონსტრირებას ახდენს.
გოგორიშვილის თქმით, როგორც ივერი მელაშვილი, ასევე ნატალია ილიჩოვა, საკუთარი პროფესიონალიზმისა და პრინციპების ერთგულნი დარჩნენ.
"პირველი დღიდან, რაც "კარტოგრაფების საქმე" დაიწყო, ერთადერთი, რის დემონსტრირებასაც აკეთებს ივერი მელაშვილი, ეს არის წესიერება, პატიოსნება და პრინციპულობა. გუშინაც მისი გამოსვლა ზუსტად ამის მაჩვენებელი იყო. ეს არის ადამიანი, რომელიც იყო უსამართლოდ დაკავებული, მაგრამ მიუხედავად ამისა, მაინც დარჩა ერთგული თავისი პროფესიონალიზმისა და თავისი პრინციპებისა. რაც შეეხება თავისთავად ამ საქმეს, ალბათ, მიუხედავად იმისა, რომ "ქართული ოცნების" ხელისუფლების განმავლობაში არაერთი პოლიტიკური დაჭერა და არაერთი პოლიტიკური პატიმარი გვყოლია, "კარტოგრაფების საქმე", ივერი მელაშვილი და ნატალია ილიჩოვა მაინც გამორჩეულები არიან, რადგან, ერთადერთი რის გამოც ისინი დაისაჯნენ და რის გამოც ამდენი თვე იყვნენ ციხეში, ეს არის, რომ "ქართულმა ოცნებამ" გადაწყვიტა ევაჭრა ამ ორი წესიერი პროფსიონალით, მხოლოდ და მხოლოდ იმისთვის, რომ საქართველოს მოსახლეობის გრძნობებზე ეთამაშა და "პატრიოტიზმის" წინა პლანზე წამოეწია. თუმცა, მინდა აქვე ვთქვა, რომ გუშინ უპრეცენდენტო სოლიდარობა იყო გირაოს თანხასთან დაკავშირებით, რამდენიმე საათში შეგროვდა გირაოს თანხა, ეს პირდაპირ აჩვენებს, რომ "ქართულმა ოცნებამ" ვერანაირად ვერ მოახერხა ამ ადამიანებისათვის მოღალატის იარლიყის მიწებება და ეს ადამიანები სრულიად საზოგადოების მხრიდან საოცარი მხარდაჭერით სარგებლობენ", - განაცხადა გოგორიშვილმა.
ცნობისთვის, საქართველოს ტერიტორიების საწინააღმდეგოდ ჩადენილ ქმედებებში ბრალდებული ივერი მელაშვილი და ნატალია ილიჩოვა სასამართლოს სხდომათა დარბაზიდან გაათავისუფლეს. მოსამართლე ლელა კალიჩენკომ დაკავებულებს აღკვეთის ღონისძიების სახით შეფარდებული პატიმრობა 20 000 - 20 000-ლარიანი გირაოს სანაცვლოდ შეუცვალა. ამასთან, სასამართლომ ივერი მელაშვილის თანამდებობიდან გადაყენების შუამდგომლობა დააკმაყოფილა.
"ინტერპრესნიუსი"