საქართველოში ვაქცინირებული ადამიანებიდან 27-ს გვერდითი მოვლენები ან რეაქცია გამოუვლინდა - კვირის პალიტრა

საქართველოში ვაქცინირებული ადამიანებიდან 27-ს გვერდითი მოვლენები ან რეაქცია გამოუვლინდა

საქართველოში ვაქცინირებული ადამიანებიდან 27-ს გვერდითი მოვლენები ან რეაქცია გამოუვლინდა. როგორც დაავადებათა კონტროლის ეროვნული ცენტრის გადამდებ დაავადებათა ცენტრის ხელმძღვანელმა ხათუნა ზახაშვილმა "ინტერპრესნიუსის" შეკითხვის საპასუხოდ განმარტა, მათგან 4 შემთხვევაში ინტენსიური თერაპია გახდა საჭირო, 3 შემთხვევაში ჰოსპიტალიზაცია, ხოლო 2 შემთხვევაში რეანიმაციაში გადაყვანა.

"გვერდითი მოვლენები და რეაქციები ვაქცინაციის შემდეგ ადამიანს შეიძლება ჰქონდეს, მათ შორის განსაკუთრებულ ყურადღებას საჭიროებს რამდენიმე გვერდითი მოვლენა და რეაქცია. საქართველოში ვაქცინირებულებიდან ჯერჯერობით რეგისტრირებული გვაქვს ასეთი 27 შემთხვევა, მათგან 4 შემთხვევა იყო, როდესაც დასჭირდათ ინტენსიური თერაპია, 3 შემთხვევაში დასჭირდათ ჰოსპიტალიზაცია, ხოლო 2 შემთხვევაში რეანიმაციული ღონისძიება", - განაცხადა ზახაშვილმა.

ამავე საკითხზე ისაუბრა ასევე დაავადებათა კონტროლის ეროვნული ცენტრის ხელმძღვანელმაც. ამირან გამყრელიძის განცხადებით, ვაქცინაციიდან 1-2 დღის განმავლობაში შესაძლოა დაფიქსირდეს ტემპერატურის მატება, კუნთების, სახსრების ტკივილი, დაღლილობა, ინექციის ადგილზე სიწითლე და სხვ.

"ზოგადად, კოვიდ ვაქცინებზე გვერდითი მოვლენები უფრო ხშირია 1-2 დღის განმავლობაში, ვიდრე იმ კალენდარულ ვაქცინებზე, რასაც ბავშვთა ასაკში ვიყენებთ. ის სხვადასხვა ვაქცინაზე მერყეობს დაახლოებით 5%-დან 60%-ის ფარგლებში, რომელიც არის შედარებით მსუბუქი. მხედველობაში მაქვს ტემპერატურის მომატება 38 ნახევრამდე, იშვიათ შემთხვევაში შესაძლოა მეტიც. შესაძლოა ასევე იყოს კუნთების, სახსრების ტკივილი, თავის ტკივილი, დაღლილობა, ინექციის ადგილზე სიწითლე. უნდა ვიცოდეთ, რომ კოვიდ ვაქცინაციის შემდგომი 2 დღის განმავლობაში შესაძლოა ეს დისკომფორტი იყოს", - განაცხადა გამყრელიძემ.

ხათუნა ზახაშვილის განცხადებით კი, საქართველოში მიღებულია გადაწყვეტილება, რომ ამ ეტაპზე ვაქცინაცია ნებისმიერი ვაქცინით, რაც ქვეყანაში შემოვა, დაშვებული იქნება 18 წლის ასაკიდან პირებზე.

მისი თქმით, მოვლენების განვითარების მიხედვით შესაძლებელია, რომ მოხდეს ასაკის ზღვარის დაწევა ვაქცინაციასთან დაკავშირებით, თუმცა ამ ეტაპზე არ იგეგმება.

"ფაიზერისთვის", ახალი კვლევებით, თავიდანვე იყო შესაძლებლობა, რომ ადამიანები 16 წლიდან აცრილიყვნენ. თავიდანვე ვაქცინაზე 16 წლის ასაკის ადამიანებზე ჩატარდა კვლევები. ზოგიერთ ქვეყანაში ამ ვაქცინისთვის დასაშვებია ასაკი 16 წლიდან, საქართველოში მიღებულია გადაწყვეტილება, რომ ამ ეტაპზე ვაქცინაცია ნებისმიერი ვაქცინით, რაც ქვეყანაში შემოვა, დაშვებული იქნება 18 წლის ასაკის ზევით პირებზე" , - განაცხადა ზახაშვილმა.