"აქ შემოვედი იმისთვის, რომ თითოეული თქვენგანი სათითაოდ გაგიყვანოთ ამ დარბაზიდან" - კვირის პალიტრა

"აქ შემოვედი იმისთვის, რომ თითოეული თქვენგანი სათითაოდ გაგიყვანოთ ამ დარბაზიდან"

"მე შემოვედი აქ იმისთვის, რომ თითოეული თქვენგანი სათითაოდ გაგიყვანოთ ამ დარბაზიდან და ამის შემდეგ საზოგადოებას მიეცეს შესაძლებლობა, აირჩიოს ნამდვილი პარლამენტი და აირჩიოს ლეგიტიმური ხელისუფლება ზუსტად იმ პროპორციით, რომელსაც საზოგადოება გაიმეტებს თქვენთვის და არა ბიძინა ივანიშვილი, რომელმაც საკანონმდებლო ორგანო ნოტარიალურ კანტორად აქცია", - ამის შესახებ "ნაციონალური მოძრაობის" ლიდერმა ნიკა მელიამ პარლამენტის პლენარულ სხდომაზე სიტყვით გამოსვლისას განაცხადა.

როგორც მელიამ განაცხადა, უმრავლესობის წევრები არ ეკუთვნიან საკუთარ თავს და პოლიტიკურად არანაირი კაპიტალი არ აქვთ.

"გადაჭარბების გარეშე იქნება ნათქვამი, ალბათ, ყველას ძალიან კარგად ესმის, რომ ამ ტრიბუნასთან მოსასვლელად ემოციური დისკომფორტის დაძლევა მიწევს. ეს რომ სხვაგვარად იყოს გასაკვირი იქნებოდა, ვინაიდან, ამ დარბაზში მყოფთა დიდმა ნაწილმა თითი მიაჭირა ღილაკს ორჯერ და პირადად მიიღეთ მონაწილეობა პოლიტიკური ოპონენტის ციხეში ჩასმის, ჩემი აზრით, თქვენთვისაც კი ძალიან სამარცხვინო გადაწყტვეტილებაში. თუმცა, ჩემი თქვენგან დასაჭერად გადადებულის დისკომფორტი არაფერია იმასთან შედარებით, თუ რა დისკომფორტს განიცდის დღეს ჩვენი ხალხი და რას გრძნობს ჩვენი ხალხი, რომელიც იძულებულია დღეს ამ თავყრილობას პარლამენტი უწოდოს, თანაც იცოდეს, რომ ერს ყველაფერი არ შეესაბამება, არ გამოხატავს არ ასახავს მათ ნებას, სურვილებს და მისწრაფებებს.

ალბათ, ბევრი კითხვა გექნებათ და შევეცდები ნაწილობრივ გიპასუხოთ. ერთი კითხვაა, რატომ ვარ მე დღეს აქ? - ერთადერთი, რის გამოც დღეს მე აქ ვარ ჩემს მეგობრებთან ერთად ამ ყველაფერს აქვს მკაფიო და კონკრეტული ამოცანა, რომ მალე დავტოვო ეს დარბაზი და ამ დარბაზში, რაც შეიძლება მცირე დოზით, ნაკლებად დაგაფრთხოთ. ამ დარბაზის დატოვებას ვაპირებ მე თქვენთან ერთად. მე შემოვედი აქ იმისთვის, რომ თითოეული თქვენგანი ვინც დღეს აქ ხართ სათითაოდ გაგიყვანოთ ამ დარბაზიდან და ამის შემდეგ საზოგადოებას მიეცეს შესაძლებლობა აირჩიოს ნამდვილი პარლამენტი და აირჩიოს ლეგიტიმური ხელისუფლება ზუსტად იმ პროპორციით, რომელსაც საზოგადოება გაიმეტებს თქვენთვის და არა ბიძინა ივანიშვილი, რომელმაც საკანონმდებლო ორგანო ნოტარიალურ კანტორად აქცია", - აღნიშნა მელიამ.

მელიამ უმრავლესობის წევრებს მიმართა და აღნიშნა, რომ ისინი ბიძინა ივანიშვილის ტყვეობაში არიან.

"ბევრი თქვენგანიც კი გულის სიღრმეში მეთანხმებით, რასაც ხშირად ვსაუბრობთ ოპოზიციონერები, მაგრამ თუკი საჯაროდ, ხელოვნური, ცირიკური პასუხებით გადიხართ ფონს, ეს სულაც არ ნიშნავს, რომ როცა გულახდილად ესაუბრებით თქვენ მეგობრებს, არ აცნობიერებთ, რომ სახელმწიფო არის მიტაცებული, რაც მტელმა მსოფლიომ გაიგო და მიტაცებულია ერთი ადამიანის მიერ. მე არ ვფიქრობ, რომ ბიძინა ივანიშვილი არის ის ადამიანი, რომელზეც ხშირად უნდა ვისაუბრო, მაგრამ ეს არის მოცემულობა, რომელიც დღეს გვაქვს. ეს არის ადამიანი, რომელმაც პროკურატურაც, პოლიციაც, მთავრობაც და თითოეული თქვენგანიც აქცია მიტაცების ინსტრუმენტად. თქვენ ხომ ჩემზე კარგად იცით, რომ არ ეკუთვნით საკუთარ თავს, თქვენ ხომ ჩემზე კარგად იცით, რომ პოლიტიკურად არანაირი კაპიტალი არ გაქვთ.

მე არ ვამბობ, რომ თქვენა ასე გინდოდათ, როდესაც 2012 წლის 1-ელ ოქტომბერს მოხვედით, მაგრამ გინდოდათ თუ არა ეს სხვა საკითხია, თქვენ აღმოჩნდით ტყვეობაში. როდესაც გისმენთ ხოლმე მეც კი არ მჯერა, რომ ამ ქვეყანაში შეიძლება დაიბადოს და გაიზარდოს ადამიანი და იყოს უსიტყვო მორჩილებაში ოლიგარქი ადამიანის, რომელსაც ბევრი ფული აქვს და მეტი არაფერი. თქვენ ხართ დასახსნელნი ამ ტყვეობიდან. მე ძალიან კარგად ვიცი, რომ საქართველოს ნამდვილ პატრიოტს, რომელსაც უწევს პოლიტიზირებულ უსამართლო პოლიციასთან დაპირისპირება, პროკურორთან და მოსამართლესთან, თქვენც იგივე ფიქრები და შიშები წამოგეშლებათ ხოლმე. თუკი გაბედავთ და ხვალ განსხვავებულ პოზიციას დააფიქსირებთ, ბიძინა ივანიშვილის ეს პოლიტიკური პოლიცია თქვენც დაგიპირისპირდებათ, სასამართლოც და პროკურატურაც", - განაცხადა მელიამ.

"ერთი წამით არ ჩათვალოთ, რომ მე თქვენზე გაბრაზებული ვარ", - ასე მიმართა ნიკა მელიამ "ქართული ოცნების" დეპუტატებს.

მისივე თქმით, ოპოზიცია მმართველ გუნდს შემოდგომაზე დაამარცხებს და შექმნის კოალიციურ მთავრობას.

"მე თქვენთან ბევრი სალაპარაკო არ მაქვს, ერთი წამით არ ჩათვალოთ, რომ მე თქვენზე გაბრაზებული ვარ. მიუხედავად იმისა, რომ მართლაც როგორც მაუზერიანმა ბოლშევიკებმა მიიღეთ ორჯერ გადაწყვეტილება, იგივე ხდებოდა 30-იან წლებში, როცა ხვრეტდნენ თავიანთ კოლეგებსაც კი. მე თქვენ არ აღგიქვამთ როგორც კოლეგებს, პოლიტიკოსებს, ერთხელაც არ გამჩენია სურვილი თქვენთან ტელედებატებში მოხვედრის, მიუხედავად იმისა, რომ თქვენც არ გაქვთ სურვილი. რაზე უნდა გესაუბროთ? რაზე უნდა ვისაუბროთ ჩვენ?! ამიტომ, მე მირჩევნია ვესაუბრო საზოგადოებას, ვესაუბრო იმ საზოგადოებას, რომელთან ერთადაც ოპოზიცია ძალიან მალე, მიმდინარე წელს, დაამარცხებს ამ რეჟიმს. კოალიციურ მმართველობაში მოვა. მე ასე ვხედავ ამ ქვეყნის განვითარებას. ერთია, რომ ქვეყანა ოლიგარქის კლანჭებიდან ვიხსნათ და მეორეა, რომ ქვეყანა მართლაც იმართოს ერთობლივად. თქვენი, როგორც რეჟიმის წარმომადგენილების დამარცხება, რომლებიც ხართ ოლიგარქის მსახურებაში, თუკი სადმე შემიძლია პატივი დაგდოთ არის ეს - ჩვენი მხრიდან თქვენი დამარცხება ვერავითარ შემთხვევაში ვერ იქნება ვიწროპარტიული ამოცანა და ეს მგონი პატივია უკვე თქვენთვის. თქვენი დამარცხება უკვე არის ეროვნული ამოცანა, თითოეული ჩვენგანის, ვინც ოპოზიციაში ვართ.

მიუხედავად იმისა, რომ ცდილობთ ერთმანეთს წავეკიდოთ, ხელებს იფშვნეტს ყველა, განსაკუთრებით ოლიგარქი, თქვენ ნახავთ უახლოეს პერიოდში საერთო მიზნის გარშემო კვლავ გამოვნახავთ უნარს, რომ ამ მავნებელი რეჟიმის წინააღმდეგ გავერთიანდეთ", - განაცხადა ნიკა მელიამ.

"ინტერპრესნიუსი"