"დიახ, გახარიამ წერილი პირადად მე გადმომცა" - კვირის პალიტრა

"დიახ, გახარიამ წერილი პირადად მე გადმომცა"

"ჩვენ სულ ვამბობდით, რომ ხელისუფლებაში კორუფცია და ნეპოტიზმია. გახარიამ ამის შესახებ მხოლოდ პრემიერის პოსტის დატოვების შემდეგ გაიგო? იქნებ თავადაც სარგებლობდა?"

"წერილზე აღარ ვისაუბრებ, ჩვენ ყველაფერი ვთქვით, დანარჩენი შესაბამისმა უწყებებმა გაარკვიონ... ადრე თუ გვიან, სიმართლე გაირკვევა", - ასეთია "ლელოს" ერთ-ერთი ლიდერის, ბადრი ჯაფარიძის აზრი. შეგახსენებთ, რომ გიორგი გახარიას პოლიტიკური პარტიის "საქართველოსთვის" პრეზენტაციის შემდეგ წერილის თემა ისევ აქტუალური გახდა. "ლელოს" ლიდერებმა საზოგადოებას შეახსენეს, რომ პროკურატურას დღემდე არ გამოუძიება ეს საქმე. მათი თქმით, წერილი გიორგი გახარიამ საკუთარ კაბინეტში გადასცა ბადრი ჯაფარიძეს. "ლელოს" წევრების განცხადებით, პროკურატურა ამ თემის ნიველირებას ცდილობს და იმისდა მიუხედავად, რომ დიდი ხანია ხელთ აქვთ ინგლისიდან ჩამოტანილი ანაბეჭდები, გამოძიებას მაინც არ იწყებენ. გახარიას თანამებრძოლები ამბობენ, რომ ბადრი ჯაფარიძე და მამუკა ხაზარაძე საზოგადოებას ყოველდღე ახალ-ახალ ვერსიას სთავაზობენ, სინამდვილეში კი მათი ბრალდებები უსაფუძვლოა და ამ საკითხზე საუბრით პოლიტიკური დღის წესრიგის შექმნას ცდილობენ.

წერილზე, ანაკლიის პორტზე, გახარიას პოლიტიკურ ველზე დაბრუნებასა და სხვა მნიშვნელოვან საკითხებზე "ლელოს" ლიდერი ბადრი ჯაფარიძე გვესაუბრება:

- არ ვიცი, რას გულისხმობენ გახარიას თანამებრძოლები ახალ-ახალი ვერსიების გავრცელებაში. მიკვირს, ბატონი ხოჯევანიშვილი რომ ამბობს, ჩამოყალიბდნენ, ვინ შეასრულა ფოსტალიონის როლი, ვინ მიიღო წერილი, სად გადასცესო და ა.შ. ჰკითხოს გახარიას და მოუყვება.

ჩვენ ახალი არაფერი გვითქვამს, ადრეც ვამბობდით, რომ წერილი მე გადმომცა გახარიამ. ახლა, როდესაც პოლიტიკურ ველზე დაბრუნდა, რატომ განვაახლეთ ამ თემაზე საუბარი? იმიტომ, რომ როდესაც ჟურნალისტებმა გახარიას წერილის შესახებ კითხვები დაუსვეს, მან ყველაფერი უარყო. შარშან აგვისტოში, უფრო ადრეც, ვამბობდი, რომ ჩვენსა და გახარიას შორის შუამავალი არ ყოფილა.

დიახ, წერილი გახარიამ პირადად მე გადმომცა.

- მაშინ რატომ უარყოფს ამას ახლა, როდესაც უკვე პრემიერი აღარ არის, ხომ შეუძლია თქვას, რომ წერილის გადმოცემა ივანიშვილმა დაავალა და პასუხისმგებლობა მოიხსნას? - არ ვიცი, იმის თქმა, რომ წერილი არ გადმოუცია, ტყუილია. გახარია, ალბათ, ფიქრობს, რომ ამის აღიარებამ შეიძლება მის პოლიტიკურ კარიერას დიდი დარტყმა მიაყენოს ან სულაც დაასრულოს.

- თქვენ შემოგთავაზეს საგამოძიებო კომისიის შექმნა არა მარტო წერილის, არამედ ანაკლიის საკითხზეც. რას აპირებთ? - კარგი იქნება საგამოძიებო კომისიის შექმნა. ამაზე ვიფიქრებთ. ამასთან, უკვე წამოვაყენეთ ინიციატივა, რომ პარლამენტში შეიქმნას სისტემური კორუფციის შემსწავლელი დროებითი საგამოძიებო კომისიაც კორუფციასთან დაკავშირებული ყველა საეჭვო ფაქტის შესასწავლად.

- კორუფციასა და ნეპოტიზმზე ისაუბრა გახარიამაც პარტიის პრეზენტაციაზე და შემდეგ ჟურნალისტებთანაც. ამას მოჰყვა სატელევიზიო სიუჟეტი, სადაც გიორგი გახარიას კლანურ მმართველობასა და ნეპოტიზმზე იყო საუბარი. - ჩვენ სულ ვამბობდით, რომ ხელისუფლებაში კორუფცია და ნეპოტიზმია. გახარიამ ამის შესახებ მხოლოდ პრემიერის პოსტის დატოვების შემდეგ გაიგო? იქნებ თავადაც სარგებლობდა? ტელესიუჟეტი იმის დასტურია, რომ "ოცნებას" კრიტიკულად განწყობილი პოლიტიკოსის გაშავება სურს. არადა, დარწმუნებული ვარ, გახარია პოლიტიკურ ველზე ივანიშვილმა დააბრუნა. ვინც ივანიშვილს კარგად იცნობს, ამბობს, რომ ხალხის ერთმანეთთან დაპირისპირება, გადაკიდება სჩვევია. ახლა შორიდან დააკვირდება ორივე პოლიტიკურ ჯგუფს და ფსონს გამარჯვებულზე დადებს.

- ესე იგი, ფიქრობთ, რომ გახარიას დადანაშაულება კორუფციაში, ნეპოტიზმში, გუნდისა და სამშობლოს ღალატში სისხლისსამართლებრივ დევნაში არ გადაიზრდება? - რა თქმა უნდა, არა!

- თუ მაინც ასე მოხდა?

- მაშინ მე დავიცავ პოლიტიკური დევნისგან, ოღონდ უსაფუძვლო პოლიტიკური დევნისგან. რეალურად ჩადენილი დანაშაულისთვის პასუხი უნდა აგოს.

- მართლა ფიქრობთ, რომ შეიძლება ხელისუფლებამ გახარიას "შეთქმულების" ბრალდება უბრალოდ "გაუტაროს"? - მახსენდება ძველი ამბები, როდესაც ივანიშვილი ვიღაცებს მოღალატეებად მოიხსენიებდა, შემდეგ კი გვერდით იყენებდა. ჯერ კიდევ "ნაციონალური მოძრაობის" მმართველობისას მოიხსენია ვიღაც-ვიღაცები მოღალატეებად, შემდეგ კი პოლიტიკურ ბრძოლაში გვერდით დაიყენა.

- ცოტა ხნის წინ მამუკა ხაზარაძემ "თბილისის სამშენებლო ამნისტიის შესახებ" კანონპროექტს "კორუფციული და ქალაქის მკვლელი" კანონი უწოდა. პასუხად "ქართული ოცნების" წევრმა ირაკლი ზარქუამ ბრალად დაგდოთ, რომ თქვენ სათავო ოფისის მშენებლობისთვის ნაგვით გაავსეთ ხევები ვაშლიჯვარში, რომ დედაქალაქს სთხოვდით სატყეო ზონიდან 5 ათასი ჰექტარი სამშენებლო ზონად გაგეკეთებინათ. რას უპასუხებთ ამ ბრალდებას? - "ოცნება" ცდილობს პასუხისმგებლობა აარიდოს დეველოპერებს, რომლებმაც გამოუსწორებელი ზიანი მიაყენეს თბილისის ლანდშაფტს. ჩვენი გადაწყვეტილებებით კეთილსინდისიერ დეველოპერებს არ უნდა მივანიშნოთ, თქვენ მართალია ნებართვით გათვალისწინებული ყველა პარამეტრი გაითვალისწინეთ, მაგრამ თანაბარ პირობებში აღმოჩნდით იმ დეველოპერებთან, რომლებმაც მშენებლობის ყველა სტანდარტი და წესი დაარღვიესო. ჩვენი ინიციატივა იყო შეგვედგინა ექსპლუატაციაში გადასაცემი პრობლემური ობიექტების ნუსხა და განგვესაზღვრა, რამდენად მძიმეა დარღვევა და ვინ არის დამნაშავე.

მმართველი გუნდი გვეუბნება, რომ ჯერ ამნისტია უნდა იყოს და მერე გაირკვეს სხვა დანარჩენი. ჩვენ არასწორად მიგვაჩნია დეველოპერებისთვის დაუსჯელობის სინდრომის გაჩენა.

- ზარქუას ბრალდებაზე რას იტყვით?

- ჩვენ იქ ნაგავი არ დაგვიყრია, ვინც დაყარა, ის დაჯარიმდა.

- თქვენ ასევე კრიტიკულად შეაფასეთ პარტიების დაფინანსების შესახებ კანონპროექტი. საკანონმდებლო პაკეტის მიხედვით, პარტია, რომელიც მანდატებზე უარს იტყვის, საბიუჯეტო დაფინანსებასა და კანონით განსაზღვრულ პრივილეგიებს დაკარგავს. თქვით, რომ ამ კანონპროექტით გათვალისწინებული ღონისძიებები და სანქციები არაპროპორციულია. - სიტყვა "არაპროპორციული" პირდაპირ არის ნახსენები ვენეციის კომისიის დასკვნაშიც. ვენეციის კომისიის ასეთი დასკვნის გათვალისწინებით ეს კანონპროექტი ამ ფორმით არ უნდა გამოსულიყო. ერთადერთი, რაც "ქართულმა ოცნებამ" გააკეთა, ის არის, რომ კანონი ამ წლის ნაცვლად 2022 წელს ამოქმედდება.

- რას ამბობს ვენეციის კომისიის დასკვნა? - ამბობს, რომ კანონპროექტი უნდა გადაისინჯოს, რომ მასში გათვალისწინებული ღონისძიებები და სანქციები არაპროპორციულია. ამ კანონპროექტმა შესაძლოა საფრთხე შეუქმნას პოლიტიკური პარტიის არსებობას. შარლ მიშელის შეთანხმებაში სწორედ ამ კანონპროექტსა და იმაზეა საუბარი, რომ უნდა გათვალისწინებულ იქნეს ვენეციის კომისიის დასკვნა. ჩვენ დავარეგისტრირეთ ალტერნატიული კანონპროექტი, რომელიც სრულად ეთანხმება მიშელის შეთანხმებასა და იმ წინადადებას, რომელიც შემოგვთავაზეს მოდერატორებმა.

- აშკარაა, რომ შარლ მიშელის დოკუმენტის პუნქტების შესრულება სულ უფრო რთულდება. აქილევსის ქუსლად იქცა "ამნისტიის შესახებ" კანონი. თქვენი აზრით, ეს მხოლოდ "ქართული ოცნების" ბრალია? - არც ველოდით, რომ "ქართული ოცნება" დაუბრკოლებლად გაგვატარებინებდა შარლ მიშელის დოკუმენტით გათვალისწინებულ ყველა რეფორმას.

მუდმივად ძალისხმევა გვიწევს, რათა მმართველი გუნდი დავაბრუნოთ მიშელის დოკუმენტის ფორმატში და გავატაროთ ისეთი უმნიშვნელოვანესი რეფორმები, როგორიც არის მართლმსაჯულების რეფორმა, საარჩევნო კანონმდებლობაში ცვლილებების შეტანა, ხელისუფლების გადანაწილება და ა.შ.

- ამ დოკუმენტში ერთ-ერთი მთავარი პუნქტია ამნისტიის შესახებ კანონპროექტი. ოპოზიციის კანონპროექტი უკვე ჩავარდა, სავარაუდოდ, კანონად "ქართული ოცნების" ინიციატივა იქცევა. ფაქტია, რიგ საკითხებზე "ნაციონალური მოძრაობის" გაჯიუტება მათ ლიდერ ნიკა მელიას დილემის წინაშე დააყენებს. გამოსავალს სად ხედავთ? - ამნისტიის საკითხის შეთანხმების დოკუმენტში შემოტანა სწორედ იმით იყო განპირობებული, რომ ჩვენ მუდმივად ვაყენებდით ნიკა მელიას სისხლისსამართლებრივი დევნის შეწყვეტის საკითხს. ვერავინ იტყვის, რომ საუბარი იყო ფართო ამნისტიაზე, ან ვიმსჯელეთ 20-21 ივნისის მოვლენებზე და ამის შედეგად შევთანხმდით ამნისტიაზე. ასე არ იყო.

"ოცნება" ცდილობს ნიკა მელიას საქმე ფართო ამნისტიად გამოიყენოს. ჩვენ სხვა გამოსავალს ვერ ვხედავთ, გარდა იმისა, რომ მმართველი გუნდის კანონპროექტს "ამნისტიის შესახებ" ხმა არ მივცეთ.

ხათუნა ბახტურიძე