"პიკს გავდივართ, საკმაოდ მაღალი დადებითობის მაჩვენებელი გვაქვს, რაც ნიშანია, რომ სტატისტიკა ჯერ კიდევ მზარდი იქნება"
"საკმაოდ მაღალი დადებითობის მაჩვენებელი გვაქვს, სტატისტიკა მზარდი იქნება",- ამის შესახებ ჯანდაცვის მინისტრმა ეკატერინე ტიკარაძემ ჟურნალისტებთან საუბრისას განაცხადა.
მისივე თქმით, ვაქცინაციის პროცესი მნიშვნელოვნად გაუმჯობესდა.
"როგორც უკვე მედიასთან არაერთხელ განვაცხადე, რა თქმა უნდა, ჩვენ გავდივართ პიკს. დღეს ჯერ გვაქვს საკმაოდ მაღალი დადებითობის მაჩვენებელი, რაც ეპიდემიოლოგებისთვის და ჯანდაცვის სექტორისთვის ნიშანია, რომ სტატისტიკა ჯერ კიდევ მზარდი იქნება. დღეს გვაქვს 46 ათასამდე აქტიური შემთხვევა. ამ შემთხვევების უმეტესობის ნაწილი ჩვენი ოჯახის ექიმების მხრიდან იმართება ბინაზე. 8 ათასამდე საწოლია მობილიზებული ქვეყნის მასშტაბით, საიდანაც ძირითადი წილი, რა თქმა უნდა, მოდის თბილისზე.
ჩვენ ბოლო 2 კვირის განმავლობაში ვაკვირდებოდით თბილისში ინფექციის გავრცელების საკმაოდ მაღალ სიჩქარეს, რაც პირველ რიგში უკავშირდებოდა იმას, რომ გარკვეული მიგრაციიდან გამომდინარე ადამიანები ავადდებოდნენ სხვადასხვა რეგიონში და შემდეგ ბრუნდებოდნენ თბილისში, მათ საცხოვრებელ ადგილებში.
ჩვენ ვაკვირდებით, რომ რეგიონების ჭრილში, ინფექცია არის მზარდი, საწოლების მობილიზაცია, რა თქმა უნდა, მიმდინარეობს რეგიონების დონეზე. დღეს თბილისში 3 ათასზე მეტი პაციეტი გადის სტაციონარულ მკურნალობას, 900-მდე აჭარაში, 1000-მდე პაციენტი- იმერეთში.
დადებითი დღეს არის ის, რომ ვაქცინაციის პროცესი მნიშვნელოვნად გაუმჯობესდა. ყოველდღიურად ვაკვირდებით მატებას, რომ ადამიანები უფრო და უფრო მაღალი ნდობით არიან ვაქცინის მიმართ განწყობილები, შესაბამისად, იღებენ გადაწყვეტილებას. ეს ძალიან კარგია, თუმცა, ეპიდემიოლოგები და ჯანდაცვის სხვა წარმომადგენლები არაერთხელ აღვნიშნავთ, რომ ვაქცინაციის შედეგები იქნება შედარებით მოგვიანებით. იქიდან გამომდინარე, რომ ჩვენ სწორედ შევძლოთ ინფექციის მართვა და არსებული პიკის სტაბილიზაცია მოხდეს, მნიშვნელოვანია ინტენსიური პირბადის გამოყენება, სოციალური დისტანციის დაცვა და რეგულაციაზე ადეკვატური რეაგირება საზოგადოების მხრიდან",-აღნიშნავს ტიკარაძე.
ოჯახის ექიმების რესურსის გადატვირთვასთან დაკავშირებით ინფორმაცია უკვე მაქვს. ამის გამო 1 კვირის წინ ჩვენ კიდევ 80 ოჯახის ექიმი დავამატეთ, - როგორც მან აღნიშნა, რომ ჯანდაცვის სამინისტრო ონლაინ კლინიკის გაფართოებაზე მუშაობს. ამასთან ერთად ტიკარაძემ გადაუდებელი დახმარების, 112-ის ცხელ ხაზზეც ისაუბრა და განაცხადა, რომ მისი სამინისტრო ამ პრობლემასთან დაკავშირებით სხვა უწყებებთან თანამშრომლობს.
"რაც შეეხება 112-ს, ეს არ არის ჩემი უწყება, მაგრამ კოლეგა მინისტრთან მქონდა საუბარი და ისინიც აცხადებენ პერსონალის მობილიზებას. მაქვს ინფორმაცია, რომ დამატებით 100 პირი არის დაკონტრაქტებული, რათა 112-ში შემოსულ ზარებზე სწრაფი რეაგირება მოხდეს. როგორც ვიცი, 70 პირი უკვე ჩართულია საქმეში, რათა ზარების განტვირთვა მოხდეს", - განაცხადა ეკატერინე ტიკარაძემ