შრომის ინსპექციის სამსახური "გარდენიას" დალუქვაზე განმარტებას აკეთებს - კვირის პალიტრა

„გარდენია შევარდნაძის“ ტერიტორიაზე ის ფართი დაილუქა, რომელშიც კოვიდრეგულაციების დარღვევით ღონისძიება ჩატარდა.

როგორც შრომის ინსპექციის სამსახურის წარმომადგენელმა, გიორგი ცხადაძემ ჟურნალისტებთან საუბრისას განაცხადა, აღნიშნულ ადგილას 10-ზე მეტი პირის მონაწილეობით სოციალური ღონისძიება გამოვლინდა, რაც მოქმედი რეგულაციების დარღვევას წარმოადგენს.

„ამასთან დაკავშირებით, მიღებულ იქნა გადაწყვეტილება, რის შემდეგაც ფიზიკური პირი 2000 ლარის ოდენობით დაჯარიმდა“, - განაცხადა გიორგი ცხადაძემ.

როგორც მან განმარტა, დალუქვა „გარდენიას“ მთლიან სივრცეს არ შეეხო.

„შენობა და საცხოვრებელი სახლი არ დავხურეთ, დაილუქა მხოლოდ კვების ობიექტი, ფანჩატურის მსგავსი ნაგებობა, სადაც სოციალური ღონისძიებები იმართება ხოლმე“, - აღნიშნა გიორგი ცხადაძემ.

თავის მხრივ, როგორც „გარდენია შევარდნაძის" მფლობელი ზურაბ შევარდნაძე აცხადებს, „ნამდვილად არ იყო ქორწილი" და მას პირადი სტუმრები ჰყავდა.

"სტუმრები იყვნენ ჩემთან, იყო 22 კაცი“, - აღნიშნა ზურაბ შევარდნაძემ.

"ინტერპრესიუსი"