გიგი უგულავა გათავისუფლდა - რა გადაწყვეტილება მიიღო თბილისის საქალაქო სასამართლომ
თბილისის საქალაქო სასამართლომ ოპოზიციონერი პოლიტიკოსი გიგი უგულავა ადმინისტრაციულ სამართალდამრღვევად ცნო და 3000-ლარიანი ჯარიმის სანაცვლოდ გათავისუფლდა.
დღევანდელ პროცესზე ორი სამართალდამცველი დაიკითხა, რომელთა განცხადებით, უგულავას დაკავებაში მონაწილეობდნენ. სამართალდამცველების განმარტებით, უგულავამ მათ „ძაღლები” უწოდა და გზის გათავისუფლებასთან დაკავშირებით კანონიერ მოთხოვნას არ დაემორჩილა. უგულავას თქმით კი, სამართალდამცველებისთვის პიროვნული შეურაცხყოფა არ მიუყენებია.
ცნობისთვის, გიგი უგულავა სამართალდამცველებმა თბილისის საქალაქო სასამართლოსთან მიმდინარე საპროტესტო აქციაზე დააკავეს. ის ადმინისტრაციულ სამართალდარღვევათა კოდექსის 173-ე მუხლით იყო დაკავებული, რაც პოლიციის კანონიერი მოთხოვნისადმი დაუმორჩილებლობას გულისხმობს.
ოპოზიციონერი პოლიტიკოსის გიგი უგულავას ადვოკატის გიორგი კონდახიშვილის განცხადებით, დაცვის მხარე უგულავასთვის ჯარიმის შეფარდების გადაწყვეტილებას გაასაჩივრებს.
როგორც კონდახიშვილმა სასამართლო სხდომის შემდეგ აღნიშნა, სასამართლომ დაცვის მხარის მიერ წარდგენილი არცერთი არგუმენტი არ გაითვალისწინა.
„არ იქნა გათვალისწინებული დაცვის მხრიდან წარდგენილი არცერთი მყარი არგუმენტი. ერთი ის, რომ აქ არ იყო გზის გადაკეტვა, ვინაიდან შეკრებისა და მანიფესტაციის კანონიდან გამომდინარე, თუ მომიტინგეების რაოდენობა აჭარბებს იმ რაოდენობას, რომ ფეხით სავალ ბილიკზე შეუძლებელია აქციის განთავსება, ეს უკანონობად არ ითვლება. რაც შეეხება გიგი უგულავას განცხადებას შინაგან საქმეთა სამინისტროს შეფასების თვალსაზრისით, რომ პოლიციელები აქციაზე იქცეოდნენ როგორც შევარდნაძის დროინდელი პოლიციის თანამშრომლები, სასამართლომ ეს ალბათ ჩათვალა როგორც შეურაცხყოფა. ჩვენ გავასაჩივრებთ, თუმცა ეს არის ტენდენცია და ხელისუფლების მხრიდან გამოყენებული ინსტრუმენტი, რომ პოლიტიკურად აქტიური მოქალაქეები დააშინოს, რათა არავინ მიიღოს მშვიდობიან აქციებში მონაწილეობა“,- განაცხადა გიორგი კონდახიშვილმა.
"ინტერპრესნიუსი"