რამდენიმე დღის წინ, ლამაზი გოგონებით სავსე გარემოში, ჟიურის წევრებმა და საზოგადოებამ სამყაროში ყველაზე ლამაზი ქალი ერთხმად გამოავლინეს - მის სამყაროს ტიტული კიდევ ერთმა გოგონამ მოიპოვა და მსოფლიოს თავი ასაკით, გარეგნობითა და კეთილი ხასიათით გააცნო. ჰარნააზ კაურ სანდუ 2021 წლის მის სამყარო გახდა. ვინ არის ჰარნააზ კაურ სანდუ? 21 წლის ახალგაზრდა ინდოელი მოდელის გზა მის სამყარომდე, როგორც თვითონ ამბობს, საკმაოდ რთული აღმოჩნდა. ჰარნააზ სანდუ სოფელ კოჰალში დაიბადა, მისი მამა უძრავი ქონების აგენტია, დედა - ექიმი-გინეკოლოგი. 2006 წელს ჰარნააზი ოჯახთან ერთად საცხოვრებლად ინგლისში გადავიდა, თუმცა ორ წელიწადში კვლავ ინდოეთში დაბრუნდა. ჰარნააზმა სკოლა ინგლისში დაასრულა და შემდეგ სწავლა ინფორმაციული ტექნოლოგიების განხრით გააგრძელა, ბაკალავრის ხარისხი მიიღო და მაგისტრობისთვის საჯარო მართვის ფაკულტეტზე განაგრძო სწავლა. ჰარნააზმა მოდელობა ადრეული ბავშვობიდან გადაწყვიტა და თინეიჯერობიდან დიდი გამარჯვებისკენ მიმავალი გზა დასახა. 17 წლის ასაკში ყველასგან მალულად, ჩუმად სახლიდან გავიდა და პირველი სილამაზის კონკურსის შესარჩევ სიაში ჩაეწერა. შესარჩევი ტური ჰარნააზმა მარტივად გაიარა და მეტიც, კონკურსის მოგებაც შეძლო, სახლში დაბრუნებულს მამამ უთხრა, რომ მისი არჩევანის წინააღმდეგი იყო და სურდა მოდელობისთვის თავი დაენებებინა. რამდენიმე წარმატებული გამოსვლისა და გამარჯვების შემდეგ, ჰარნააზის ოჯახმა მისი არჩევანი მიიღო და მოდელმა მსოფლიო დონის კონკურსებზეც გადაინაცვლა. გზა "მის სამყარომდე" რთული აღმოჩნდა... 2019 წელს სანდუ "მის ინდოეთი" გახდა, 2021 წლის აგვისტოში მან "მის დივას" ტიტულიც მოიპოვა და ინდოეთის სახელით "მის სამყაროს" კონკურსზე დარეგისტრირდა. "მე ჩემი ქვეყნის ახალგაზრდებს წარმოვადგენ, მინდა ვიცოდე, რა ხდება ჩემს ქვეყანაში, როგორ მუშაობს მთავრობა და მთლიანად ქვეყანა“ - თქვა ჰარნააზმა მის სამყაროს შესარჩევი ტურის ვიდეოში. 12 დეკემბერს ასობით ფერადი განათებით გაბრდღვიალებულ სცენაზე მსოფლიოს ქვეყნებიდან 79 კანდიდატი იდგა. ყველა მათგანი ელოდა თავის წილ გამარჯვებას, თუმცა ჰარნააზმა ჟიურის წევრების მოხიბვლა შეძლო და მის სამყაროს ტიტულიც დაიმსახურა. ჰარნააზი მესამე ინდოელი ქალია, რომელმაც "მის სამყაროზე" გაიმარჯვა, ინდოეთს კი ბოლო წარმატება სილამაზის კონკურსში 2000 წლის შემდეგ არ მოუპოვებია. ჰარნააზის გამარჯვება საზოგადოებას არ გაკვირვებია, ინდოელი მოდელი სცენაზე ემოციური სიტყვით გამოვიდა, საოცარი სამოსი წარადგინა, საკუთარ და ქალთა უფლებებზე ილაპარაკა და დაამტკიცა, რომ 2021 წელს გამარჯვებას სწორედ ის იმსახურებდა. შესარჩევი ტური რთული იყო, ინდოეთის სახელით რამდენიმე კანდიდატი იყო წარმოდგენილი, მსოფლიოს მასშტაბით კი კონკურსში ასობით გოგონა მონაწილეობდა. შესარჩევ ტურში გოგონებმა პატარა ვიდეოები გაგზავნეს, სადაც საკუთარ თავზე, წარმატებასა და ყველა მათთვის სასურველ თემაზე ისაუბრეს. ჰარნააზმა თავის ვიდეოში დედაზე ისაუბრა, ქალზე რომელმაც ოჯახში პატრიარქატი დაამარცხა და წარმატებული გინეკოლოგი გახდა. ასევე, ცოტა რამ მოჰყვა ბავშვობაზეც. "მის სამყარო" დედასთან ერთად იზრდებოდა, მოხალისედ დადიოდა ბანაკებში და დედის მსგავსად სულ ინტერესდებოდა ქალების ჯანმრთელობით, მათი სამედიცინო პრობლემებითა და დიაგნოზით. ქალებისადმი დიდი პატივისცემის გამო, ჰარნააზმა ქალბატონების მხარდაჭერა ისწავლა და მათი უფლებადამცველიც გახდა. მოდელი დღემდე აქტიურად იცავს ყველა ქალს, იბრძვის მათი უფლებებისთვის, ცდილობს დაამარცხოს რასიზმი და პატრიარქატი მსოფლიოში. თავის შესარჩევ ვიდეოშიც მოდელმა ხაზი გაუსვა ქალებისადმი უსასრულო პატივისცემას. "მინდა გავავრცელო ხმა, ყველას ვუთხრა, რომ საკუთარი თავის უნდა სჯეროდეთ. თქვენ უნდა ისაუბროთ, ხმა ამოიღოთ, რადგან თქვენ თქვენი ცხოვრების მთავარი პერსონა და ლიდერი უნდა იყოთ ყველა გარემოში" - აღნიშნა მოდელმა ვიდეოში. მის სამყაროს ფინალურ ტურში ჰარნააზი ტოპ 5 გოგოში შეარჩიეს, წამყვანმა მონაწილეებს მარტივი კითხვები დაუსვა და ინდოელ გოგონას კლიმატის დაცვაზე მოუწია საუბარი. "ბევრი ფიქრობს, რომ კლიმატის ცვლილება სისულელეა. რას გააკეთებდით, რომ გადაარწმუნოთ ისინი?" "გულწრფელად გული მწყდება იმის დანახვაზე, თუ როგორ იტანს ბუნება უამრავ პრობლემას და ეს ყველაფერი ჩვენი უპასუხისმგებლო საქციელის გამო ხდება. მე სრულიად ვგრძნობ, რომ დროა ვიმოქმედო და ნაკლები ვილაპარაკო, რადგან თითოეულ მოქმედებას შეუძლია ან მოკლას ან გადაარჩინოს ბუნება“ - თქვა სანდუმ სცენაზე. 21 წლის მოდელი სცენაზე თავდაჯერებული გამოვიდა, ასევე თავდაჯერებულმა წარადგინა ტრადიციული სამოსი, დიდი ქოლგითა და აქსესუარებით ხელში და საბოლოოდ, ელეგანტურ სამოსში მის სამყაროს 2020 წლის გამარჯვებულისგან საჩუქრად გვირგვინი მიიღო. „მე მჯერა ჩემი თავის და სწორედ ამიტომ ვდგავარ აქ“ - თქვა ჰარნააზმა კონკურსში. კონკურსის შედეგებს საზოგადოების მხრიდან როგორც დადებითი, ასევე უარყოფითი დამოკიდებულება მოჰყვა. ხალხის აზრით, სანგუ გამარჯვებას არ იმსახურებდა, რადგან ინდოელი გოგონა სილამაზის კონკურსის კრიტერიუმებში ვერ ჯდებოდა და არც მისი საუბარი ჟღერდა დამაჯერებლად, ზოგის აზრით კი ინდოეთის წლევანდელი მებრძოლი გოგო ღირსეული გამარჯვებით დაბრუნდა შინ. (წყარო) (სპეციალურად საიტისთვის)
