"ეს გასაოცარი ადამიანი მიიწევს მიზნისკენ, რომელიც ყველასთვის მიუღწეველი რჩება" - რას წერს ამერიკული გამოცემა ლაშა ტალახაძეზე
ისეთი პატარა ქვეყნისთვის, როგორიც საქართველოა, მსოფლიოს მხრიდან მცირე გამოხმაურება, სიუჟეტი, რეპორტაჟი ანდაც, სტატია შეუმჩნეველი არასდროს რჩება. რამდენიმე დღის წინ, გავლენიანმა ამერიკულმა გამოცემამ "ფოქს სპორტმა" (FOXS SPORTS) საქართველოს საამაყო სპორტსმენის, ლაშა ტალახაძის შესახებ სტატია გამოაქვეყნა, რომელშიც დაწერა, რომ ლაშა ტალახაძე მალე მითიურ 500 კილოგრამს აწევს და ამით კაცობრიობის ისტორიაში ჩაიწერება. სტატიის ავტორმა ლაშას მსოფლიოს უძლიერესი ადამიანი უწოდა.
"ლაშა ტალახაძე ისე წევს მძიმე წონებს, თითქოს ამის გაკეთება მისთვის ძალიან იოლია" - წერს გამოცემა.
"ფოქს სპორტის" სტატიაში ქართველი სპორტსმენის ყველა წარმატებაა ნახსენები. სტატიაში ვკითხულობთ რომ, ქართველმა ძალოსანმა ტოკიოს ოლიმპიურ თამაშებზე აკვრასა და ატაცში რეკორდი დაამყარა, დაამარცხა მეტოქეები და ოქროს მედალი მოიპოვა, შემდეგ ამ წარმატებას არ დასჯერდა და თავისივე დამყარებული მსოფლიო რეკორდი გააუმჯობესა. ძალოსნობის მსოფლიო ჩემპიონატზე ტალახაძე დაუჯერებლად დიდ წონებს დაეჭიდა. 225 კილოგრამი, შემდეგ 267 და ჯამში დაფიქსირებული 492 კილოგრამით დაუჯერებელ ნიშნულს მიაღწია. ოლიმპიადაზე ამბობდნენ, რომ 492 მაღალი ციფრია იმ ადამიანისთვის, რომელიც 180 კილოგრამს იწონის, თუმცა ტალახაძემ ეს შეძლო და რეკორდის დამყარებისთან ერთად ოქროს მედალიც მოიპოვა.
სომეხი გორ მანასიანი ბოლო ძალოსანი იყო, რომელმაც ტალახაძეს ცხრა წლის წინ აჯობა, წელს გამართულ მსოფლიოს ჩემპიონატზე კი ლაშამ მინასიანს 44 კილოგრამით აჯობა.
"ის უკვე ახლოს არის მითიური 500 კილოგრამის აწევასთან, ეს გასაოცარი ადამიანი მიიწევს მიზნისკენ, რომელიც ამ მომენტისთვის ყველასთვის მიუღწეველი რჩება. 500 კილოგრამის აწევა ბევრისთვის შეუძლებელია, თუმცა არა ლაშასთვის. მას მხოლოდ 8 კილოგრამი აკლია და მას ამის მიღწევა ნამდვილად შეუძლია" - დაწერა MMA-ის ანალიტიკოსმა ლუკ თომასმა სოციალურ ქსელ "ტვიტერზე".
ტოკიოს ოლიმპიადის შემდეგ, ტალახაძემ რამდენიმე ინტერვიუში თქვა რომ მისი მიზანი ახალი რეკორდის დამყარებაა, ეს რეკორდი კი ძალოსანისთვის ისეთივე გამაოგნებელია, როგორც ორსაათიანი გადაბმული სირბილი მარათონზე.
"ჩემი ერთ-ერთი მიზანი რაც შეიძლება მეტი რეკორდის დამყარებაა, პარიზის ოლიმპიურ თამაშებში მონაწილეობას მივიღებ და იქ ვცდი შედეგის გაუმჯობესებას, სარისკო იქნება მაგრამ ვეცდები 500 კილოგრამი ავწიო და ამისთვის მაქსიმუმს გავაკეთებ. თუ 500 კილოგრამს ვერ შევძლებ, ვეცდები 500-მდე მაქსიმალური ზღვარი დავაწესო და ჩემი შედეგი კიდევ გავაუმჯობესო" - თქვა ტალახაძემ ერთ-ერთ ინტერვიუში. (წყარო)
(სპეციალურად საიტისთვის)