"ზაფხულამდე ვირუსი შეიძლება უდიდესმა ნაწილმა გადაიტანოს" - რა განსხვავებაა "ომიკრონის" B1 და B2 ვარიანტებს შორის?
"ომიკრონის" გავრცელება პიკს აღწევს, ვაქცინაციის ტემპი დაბალია, მოსახლეობა - დაბნეული. კოვიდსიახლეებით "კვირის პალიტრის" სტუმარია ალერგოლოგ-იმუნოლოგი ბიძინა კულუმბეგოვი.
- პანდემია უკვე პიკს აღწევს. კლება, ალბათ, თებერვლის მეორე ნახევრიდან დაიწყება. "ომიკორნმა" მთელ მსოფლიოში აჩვენა, რომ სწრაფად იქმნება პიკური ვითარება, მაგრამ, ყველა წინა ტალღისგან განსხვავებით, კლებაც სწრაფად იწყება. რა თქმა უნდა, საფრთხე ყველასთვის არსებობს, განსაკუთრებით იმ ქვეყნებისთვის, სადაც აცრილი ცოტაა. დიდი რაოდენობით აქტიური შემთხვევის გამო იქმნება რისკი ჰოსპიტალურ სექტორში. კლინიკაში მოხვედრილი ადამიანების მდგომარეობა თითქმის ისეთივე მძიმეა, როგორიც "ალფა" და "დელტა" ვარიანტების დროს იყო. დაავადება მსუბუქად მიმდინარეობს იმ შემთხვევაში, თუ ადამიანი ორჯერ არის ვაქცინირებული და ბუსტერიც გაკეთებული აქვს. ასეთ ავადმყოფს შემთხვევათა 95%-ში არ სჭირდება კლინიკაში გადაყვანა.ჩვენ გვაქვს უპრეცედენტო რაოდენობის - თითქმის 134 000 აქტიური შემთხვევა, ჰოსპიტალიზებულია თითქმის 4800-მდე ადამიანი. ეს ჯერჯერობით დაბალი მაჩვენებელია, მაგრამ მაინც არის საშიშროება, რომ აქტიური შემთხვევების რაოდენობის ზრდასთან ერთად ჰოსპიტალი ბევრ ადამიანს შეიძლება დასჭირდეს, თუმცა ქვეყანა მაქსიმალურად არის მობილიზებული. თებერვლიდან 40 ონლაინკლინიკა გვემატება. 2000-ზე მეტი ოჯახის ექიმია ჩართული "კოვიდის" მკურნალობის პროცესში და ყველაფერს აკეთებენ, რაც შეუძლიათ.
- ლაბორატორიულად დადასტურებული ყველაზე მეტი რამდენი შემთხვევა შეიძლება იყოს პიკის განმავლობაში?
- რეალური მაჩვენებლის გამოსათვლელად ტესტებით გამოვლენილ რაოდენობას 2-3-ზე ამრავლებენ, ანუ თუ ტესტებით 18 000 შემთხვევა დადასტურდა, ეს ნიშნავს, რომ ინფიცირებულთა რეალური რაოდენობა 40-50 000-ია.
- რაც შეეხება დაავადების მიმდინარეობას...
- "ომიკრონი", ძირითადად, სასუნთქ გზებს აზიანებს. მსუბუქ შემთხვევებს, გარდა სითხისა და სიცხის კონტროლისა, წამალი არ სჭირდება, მაგრამ თუ მდგომარეობა გართულდა, დაიწყო სუნთქვის გაძნელება, თავბრუსხვევა, ძლიერი ძილიანობა ან გულმკერდში ტკივილი, რაც მოსალოდნელია, თუ ადამიანს აქვს ქრონიკული დაავადებები, სხვადასხვა პათოლოგია, თუნდაც ასაკი (60 წელი და მეტი), რასაკვირველია, მაქსიმალური ყურადღებაა საჭირო და ეს სწორედ ოჯახის ექიმებმა უნდა შეძლონ, თუმცა მათ მოქალაქეებმაც ხელი უნდა შეუწყონ. ძალიან ფრთხილად უნდა ვიყოთ, რომ დაავადება მასობრივად არ გავრცელდეს და ქვეყანას და ჯანდაცვის სექტორს პაციენტების მოვლის შესაძლებლობა მიეცეთ. პირბადე, ვაქცინა და ბუსტერიზაცია არის გარანტია, რომ პაციენტების რაოდენობა განსაკუთრებულად არ გაიზრდება. ამით უნდა დავეხმაროთ ჩვენს თავსაც და ქვეყანასაც.
- ჩემი შვილი გავუშვი სკოლაში და შევიტყვე, რომ საკლასო ოთახში თავმოყრილ მოსწავლეებს რამდენიმე მასწავლებელმა გაკვეთილი ონლაინ ჩაუტარა... გასაგებია, რომ პედაგოგსაც თავისი მიზეზი აქვს, მაგრამ...
- ჩვენ ვხედავთ, რომ სასწავლო პროცესი ძალიან დაზარალდა. ბავშვების ავადობას რაც შეეხება, მძიმე შემთხვევები თითქმის არ გვაქვს. მათ სახლებში ვერ გამოვამწყვდევთ. როგორც სხვა დროს ცივდებოდნენ, ალბათ, ახლაც გაცივდებიან. თუ ბავშვები სკოლაში იყვნენ, იქ კი პედაგოგი არ დახვდათ, ეს, ალბათ, გამონაკლისია. ამ ეტაპისთვის სკოლები არც ერთ ქვეყანაში დაკეტილი არ არის, ამიტომ ჩვენც ნუ ვეცდებით. საყოველთაოდ მიღებული მოსაზრებით, პანდემიის დროს სკოლები უნდა იყოს პირველი, რაც გაიხსნება და ბოლო, რაც დაიხურება...
- "ომიკრონის" B2 ვარიანტზე ლაპარაკობენ. რა განსხვავებაა B1 და B2 ვარიანტებს შორის?
- "ომიკრონის" შვილობილი ვარიანტები თავიდანვე არსებობდა. მეორე ვარიანტი, გავრცელების სისწრაფის თვალსაზრისით სარისკოა, მაგრამ ეს არ ნიშნავს, რომ დაავადების სიმძიმე განსხვავებულია. ყველა ქვეყანა ადასტურებს, რომ მეორე ვარიანტი უფრო სწრაფია, ბევრგან დომინაციისკენ მიისწრაფვის, მაგრამ კლინიკურ დამძიმებას არ იწვევს.
- ჩვენთან ჯერჯერობით პირველი დომინირებს?
- ჯერჯერობით ძირითადად, პირველი ვარიანტი გვხვდება.
- აქამდე, ძირითადად, "დელტა" ვარიანტით დაავადებულთა გარდაცვალების შემთხვევები გვქონდა. ახლა, ალბათ, "ომოკრონით" დამძიმების შედეგებიც გამოჩნდება...
- გარდაცვალების შემთხვევათა უდიდესი ნაწილი, ძირითადად, "დელტა" შტამით ავადობის შედეგები იყო. "ომიკრონის" გავრცელებისას ჰოსპიტალიზაციის შემთხვევები იზრდება, მაგრამ არა ისე, როგორც წინა შტამების დროს. ამბობენ, რომ მიახლოებითი მონაცემებით, 1000-დან ერთი ადამიანის გარდაცვალების რისკი არსებობს, თუმცა "ომიკრონით" გამოწვეულ სიკვდილიანობაზე სხვა ქვეყნებში დარწმუნებით ვერ ლაპარაკობენ, რადგან იქ ამ მაჩვენებელზე გავლენას ახდენს ვაქცინაცია, ბუნებრივი იმუნიტეტი. მაგალითად, თუ ჩვენს ქვეყანაში დაავადებულთა დაახლოებით 5%-ია ჰოსპიტალიზებული, ბრიტანეთში, სადაც აცრილია მოსახლეობის 90%, ჰოსპიტალიზაცია დაავადებულთა მხოლოდ 0,5%-ს დასჭირდა ანუ 10-ჯერ ნაკლებს, ვიდრე ჩვენს ქვეყანაში. სიკვდილიანობა ნაკლები იქნება, თუმცა თუ ბევრი ადამიანი დაავადდა, ცხადია, გარდაცვლილიც მეტი გვეყოლება. ყოველდღიურად თუნდაც დაავადებულთა 0,1% რომ გარდაიცვალოს, ეს ძალიან დიდი დანაკარგია. "ომიკრონის" სწრაფად გავრცელების გამო პოპულაციური იმუნიტეტის ჩამოყალიბების შანსი დიდია. შეიძლება ზაფხულამდე კაცობრიობის უდიდესმა ნაწილმა ეს ვირუსი გადაიტანოს. რა თქმა უნდა, ვირუსი გავრცელდება ზაფხულშიც, შემოდგომაზეც, მაგრამ გადატანილი ვირუსის შედეგად ჩამოყალიბებული იმუნური პასუხის მქონე ორგანიზმს ესა თუ ის ვარიანტი მძიმე ფორმით არ დაემართება, ამიტომ ველით, რომ ვირუსი იარსებებს, ოღონდ მისი გავრცელება გავლენას აღარ მოახდენს ეკონომიკაზე, პოლიტიკაზე, სწავლაზე. დარჩება, როგორც მედიცინის ნაწილი, ეს კი ნიშნავს პანდემიის ენდემურ ფაზაში გადასვლას.
- ალბათ, ამ შეხედულების გამო ამბობდნენ, რომ 2022 წელი იქნებოდა პანდემიის დასასრულის დასაწყისი, თუმცა ამის შემდეგ ჯანმომ ისიც განაცხადა, ეს მოლოდინი, შესაძლოა, 2024 წლამდე გაგრძელდესო...
- ეს არის გაფრთხილება, რომ "ომიკრონს" არხეინად და უპასუხისმგებლოდ არ უნდა მოვეკიდოთ. ამერიკის დაავადებათა კონტორლის ცენტრი დაახლოებით ასეთ ფორმულირებას გვთავაზობს: ის უფრო მსუბუქია, მაგრამ არ არის მსუბუქიო, ანუ ის მსუბუქია, ვიდრე "დელტა" - ეს არის და ეს. პანდემიის შესუსტებას ჯანმო მაინც ვაქცინაციის მასშტაბს უკავშირებს. მაგალითად, აფრიკის მოსახლეობის მხოლოდ 5%-ია აცრილი, ასე რომ, საქმე არც ასე იოლადაა...
თუმცა ექსპერტების უმრავლესობა მაინც ვარაუდობს, რომ ზაფხულში მოსახლეობის უდიდეს ნაწილს, ჩვენს ქვეყანაშიც კი, ვირუსზე იმუნური პასუხი ექნება. ეს ნიშნავს, რომ შეიძლება ვირუსი მეორედ და მესამედ დატრიალდეს, მაგრამ დაავადებულთა რიცხვი, წესით, მკვეთრად უნდა შემცირდეს. შესაბამისად, უნდა შემცირდეს სიკვდილიანობის მაჩვენებელიც. თუ ამ სიტუაციას ვაქცინირებული დახვდება განსაკუთრებით ასაკოვანი მოსახლეობა, რა თქმა უნდა, ეს წინ გადადგმული ნაბიჯი იქნება.
"ფაიზერი" და "მოდერნა" მარტში "ომიკრონის" საწინააღმდეგო სპეციფიკურ ვაქცინას გამოუშვებენ და მას, უპირველესად, პრიორიტეტული ჯგუფები მოიხმარენ.
- არსებობს გარანტია, რომ უფრო აგრესიული შტამი აღარ გამოჩნდება?
- თავის დროზე ესპანურმა გრიპმა 50 მილიონი ადამიანი შეიწირა, ბევრჯერ განიცადა მუტაციაც. მერე გაჩნდა აზიური გრიპი, ფრინველის გრიპი, ღორის გრიპი, რომლებმაც მილიონობით ადამიანი შეიწირა, ამიტომ ახლაც შეიძლება პანდემიის ეს ეტაპი დასრულდეს, თუმცა არავინ იცის, მერე რა მოხდება. შეიძლება 2026 წელს ახალ, უფრო აგრესიულ ვარიანტად მოგვევლინოს. ამის პოტენციური და თეორიული შესაძლებლობა არსებობს.
"მწვანე პასპორტი“ გასაუქმებელია, რადგან რეალურად არაფრის მაქნისია“
რესტორატორთა ასოციაციის ხელმძღვანელის შოთა ბურჯანაძის განცხადებით, ე.წ. მწვანე პასორტი გასაუქმებელია, რადგან რეალურად არაფრის მაქნისია.
"სარესტორნო ბიზნესის გაჩერება და დღეს არსებული რეგულაციები რაიმე როლს რომ თამაშობდეს ინფიცირების შეჩერებაში, რეგულაციები უფრო უნდა გამკაცრდეს, მაგრამ შეზღუდვები, რაც დღესდღეობით ფურცელზეა დაწერილი და ასევე ის შეზღუდვები, რაც "მწვანე პასპორტთან" დაკავშირებით არსებობს, მხოლოდ და მხოლოდ ფიქციაა, არაფრის მაქნისია, გარდა უკუქმედებისა. ამით ეკონომიკა ჩერდება, კვდება ბიზნესი, იხურება რესტორნები, თანამშრომლები კარგავენ სამუშაო ადგილებს. ჩვენი სფეროდან ძალიან დიდი გადინებაა იმ პროფესიონალებისა, რომლებიც 20 წლის განმავლობაში იზრდებოდნენ... ამირან გამყრელიძე და პაატა იმნაძე არაფერს აკეთებენ. მეორე კლასელსაც შეუძლია ისე მართოს ეპიდემია, როგორც დღეს ეს ადამიანები მართავენ. მართვის ბერკეტი არ არსებობს, არსებობს მხოლოდ შედეგები, რომელსაც ვითვლით სტატისტიკით. მხოლოდ სტატისტიკოსები არიან გამყრელიძე და იმნაძე. მართვის თვალსაზრისით, ერთადერთი რესტორნების შეზღუდვა დააწესეს, რომელიც არაფრის შემჩერებელია". შოთა ბურჯანაძე მიესალმება პრემიერ-მინისტრ ირაკლი ღარიბაშვილის მიდგომას, რომელმაც პანდემიის ფონზე ქვეყანა არ ჩაკეტა. "ქვეყანა არ ჩაკეტა, ქვეყანა ამოვიდა იქიდან, სადაც ვიყავით და ეკონომიკა ამუშავდა. დღეს ე.წ. მწვანე პასპორტიც თუ მოიხსნება, უამრავი ადამიანის სამუშაო ადგილების გადარჩენას შევძლებთ".