2021 წლის საბავშვო ევროვიზიაზე საქართველოს სახელით მუსიკალური პროექტის - “რანინას” გამარჯვებული, ენერგიული და მუდამ მოღიმარი ბიჭი - ნიკო ქაჯაია წარდგა. მთელი საქართველო ეკრანებიდან გულშემატკივრობდა ბიჭს, რომელმაც მასავით მხიარული სიმღერა შეასრულა და ჩვენი ქვეყანა დიდი სცენიდან კიდევ ერთხელ ასახელა. ნიკო საქართველომ შეიყვარა, ახლა კი დროა, ჩვენც უკეთ გავიცნოთ ის. - ნიკო მთელი საქართველო გიცნობს, როგორი გრძნობაა ეს? - ძალიან კარგი გრძნობაა, პირველ რიგში, იმიტომ, რომ ეზოში ჩასვლისას ხალხი ავტოგრაფს და ფოტოს გადაღებას მთხოვს, ამაზე ხომ ბევრი ბავშვი ოცნებობს! ადამიანები მიგზავნიან ფოტოებს, ჩემს სიმღერაზე გადაღებულ ვიდეოებს, ცეკვავენ, მღერიან და უსმენენ ჩემს ნამღერს. - როგორი ბიჭია ნიკო ქაჯაია, რა უყვარს, როგორ ატარებს თავისუფალ დროს ? - მიყვარს ეზოში ჩასვლა და მეგობრებთან ერთად გართობა, თუ სახლში ვარ, XBoX-ით ვერთობი, ახლა ვაპირებ ფული შევაგროვო და "ფლეისთეიშენიც" ვიყიდო. სიმღერა, მუსიკის მოსმენა და პლასტელინებით ძერწვა მიყვარს. - როდის დაიწყე სიმღერა და ვინ აღმოაჩინა ეს ნიჭი შენში? - ნიჭი დედამ აღმოაჩინა. 3 წლის ვიყავი, როდესაც პირველად ვიმღერე, თუმცა 2 წლის ასაკში უკვე მელოდიებს ვყვებოდი. დედამ და მამამ ჩემს ნიჭს ყურადღება მიაქციეს და მუსიკალურ აკადემიაში შემიყვანეს, შემდეგ ამას მოჰყვა "რანინა" და "ევროვიზია". როგორც მეუბნებიან, პატარა ასაკში არ ვსაუბრობდი და იმის მაგივრად, რომ მელაპარაკა, მუსიკით გამოვხატავდი ყველაფერს. როგორც ჩანს, თავიდანვე შეატყვეს, რომ მუსიკის ნიჭი და სიყვარული მქონდა. ყველასგან დამოუკიდებლად, ჩემით გადავწყვიტე, რომ მინდა, სამომავლოდაც მუსიკას გავყვე. - რომელია შენი საყვარელი მუსიკალური სტილი და მიმართულება? - მომწონს ჯაზი, "რანინაში" მონაწილეობის დროს ჯაზი შემიყვარდა. პროექტის მეორე ტურში შევასრულე და სხვანაირად დავინახე ეს მიმართულება. ჯაზში მომწონს სტილი, შეგიძლია სიმღერისას ტექსტს შენი დეტალები დაამატო, რაც თავისუფლად სიმღერის საშუალებას გაძლევს. - რა განცდაა შენთვის სიმღერა? - ეს ცოტა ფილოსოფიას ჰგავს, როდესაც ვმღერი სხვა სამყაროში გადავდივარ, სხვა განზომილებაში. სიმღერის დროს სულ გახარებული და ბედნიერი ვარ, სადღაც, ასტრალურ სამყაროში ვხვდები. - უკვე მტკიცედ გაქვს არჩეული სამომავლო პროფესია თუ ჯერ კიდევ ფიქრობ? - უკვე ვიცი, რომ მომღერლობა მინდა, გადაწყვეტილი მაქვს, რომ ჩემი ცხოვრება სიმღერას მივუძღვნა. მინდა, ბევრ ქვეყანაში გამოვიდე, მათ შორის, საქართველოშიც და ჩვენი ქვეყანა ყველგან ვასახელო. სურვილი მაქვს, მთელმა მსოფლიომ იცოდეს, რომ ქართველებს საუკეთესო სიმღერები, მუსიკა და მელოდიები გვაქვს. - გახსოვს შენი პირველი განცდები "რანინაზე", როდესაც სცენაზე შენი სახელი და გვარი გამოაცხადეს? - ცოტა ხანს აზრზე ვერ მოვედი. ეს იმხელა ემოციებია, რომ არ ვიცი, როგორ ავხსნა. როდესაც ადამიანი მოულოდნელად იგებს ასეთ რაღაცას, წამიერად შეშდება. მახსოვს, რაღაც საოცარ სიხარულს ვგრძნობდი სხეულში, მეგონა, რომ სამოთხეში მოვხვდი და ყველაზე ბედნიერი ადამიანი ვიყავი მთელ მსოფლიოში. - მოგვიყევი, როგორი იყო ევროვიზია, ყველაზე ფერადი ცერემონიალი… - ევროვიზია ძალიან კარგი იყო, საქართველო ვასახელე და მეოთხე ადგილითაც კმაყოფილი დავრჩი. ალბათ, უკეთეს რეიტინგებს ველოდი, თუმცა "ტოპ 5"-ში მოვხვდი. ევროვიზიაზე მეგობრული ხალხია, მეც ბევრს დავუმეგობრდი და ზოგიერთის ნომერიც მაქვს ჩაწერილი. სიმღერის მხრივ დიდი გამოცდილება მივიღე და თუ შანსი მომეცემა, მომავალში მეორედაც გავალ. - შევამჩნიეთ, რომ სპექტაკლ “მუსიკალურ ჰანგებში” მონაწილეობ, როგორ მოირგე მსახიობის როლი? - ძალიან მომწონს, განსაკუთრებით, ჩემი პერსონაჟი. მგონია, რომ ერთმანეთს ვგავართ, მასაც რაღაცების შესწავლა, გართობა, მხიარულება უყვარს და ზოგჯერ არ იცის, როგორ გაჩერდეს. წარსულში ერთმანეთი რომ გაგვეცნო, კარგი მეგობრები ვიქნებოდით. სპექტაკლში მონაწილეობა დიდი ბედნიერებაა, ცოცხლად ასრულებ სიმღერას, ხალხი გისმენს, მოსწონთ და ამას მსახიობი რამდენჯერმე იმეორებ. - ნიკო გაგვიმხილე, რა არის შენი ყველაზე დიდი ოცნება? - გაგიმხილოთ? მინდა, მსოფლიოში ერთ-ერთი საუკეთესო მომღერალი გავხდე. - ვინ არის შენი ყველაზე დიდი გულშემატკივარი? - ჩემი ოჯახი, დედა, მამა, განსაკუთრებით კი - ბებო და ბაბუ. მეუბნებიან, რომ ძალიან მაგარი ბიჭი ვარ და კიდევ დიდ წარმატებას მივაღწევ, სულ გვერდში მიდგანან. მუდამ მახსენებენ, რომ არასდროს დავნებდე. - "რანინას" გამარჯვებული და ევროვიზიის მონაწილე ხარ, რას უნდა ველოდოთ უახლოეს მომავალში შენგან? - მინდა, "ვოისში" მივიღო მონაწილეობა, ჯერ არ არის გადაწყვეტილი, როდის იქნება, თუმცა მინდა, რომ ვცადო. ასევე, მინდა, ორი წლის შემდეგ, რამე ფილმშიც მივიღო მონაწილეობა. - ნიკო, ამ ინტერვიუს ბევრი ბავშვი წაიკითხავს, რამეს ხომ არ ეტყვი მათ? - ყველა ბავშვს ვეტყოდი, რომ არასდროს დანებდნენ, იშრომონ და წარმატებას აუცილებლად მიაღწევენ. შრომის გარეშე არაფერი კეთდება, ჯერ შრომა და შემდეგ - წარმატებაც იქნება. აქვე მივმართავ მთელ საქართველოს, დიდი მადლობა ყველას ამხელა სითბოსთვის და სიყვარულისთვის, მე თქვენ გარეშე წარმატებას ვერ მივაღწევდი. (სპეციალურად საიტისთვის)
