"ეს არის ძალიან ბინძური თემა, პროვოკაციული და ამის ავტორი შეიძლება იყოს ბარიკადის ორივე მხარეს" - კვირის პალიტრა

"ეს არის ძალიან ბინძური თემა, პროვოკაციული და ამის ავტორი შეიძლება იყოს ბარიკადის ორივე მხარეს"

საქართველოს მისამართით უკრაინის ხელისუფლების მიერ გაკეთებული განცხადებები და სერიოზული ბრალდებები დიდი განსჯის საგანია. ჩვენი ქვეყნის ხელისუფლება აცხადებს, რომ ეს ყველაფერი სრულიად მიუღებელი და ყველანაირ საფუძველს მოკლებულია და უკრაინულ მხარეს ამ ბრალდებებზე მტკიცებულებებს სთხოვს, თუმცა ჯერ ამაზე პასუხი არ არის. რას ემსახურება ეს განცხადებები და რამდენად შეიძლებოდა, ეს ფაქტები მომხდარიყო, ამ და ბევრ საინტერესო საკითხზე ექსპერტი მამუკა არეშიძე გვესაუბრება:

- ეს განცხადება, თავისთავად, უაღრესად მძიმე და თავხედურია. იმიტომ არა, რომ ასეთი რამ არ შეიძლება, მომხდარიყო. ვთქვათ, მოხდა, ვთქვათ, რამე გამორჩა საქართველოს შესაბამის სტრუქტურას, მაგალითად, საბაჟოს, ასეთი რამის გარკვევა მეგობრულ ქვეყნებს შორის კულუარულად ხდება. ქვეყანა საომარ მდგომარეობაშია და მესმის, შეიძლება გარკვეული ემოციური მომენტებია, მაგრამ მათი გაკეთებული განცხადება პროვოკაციულია. ასეთი ტიპის განცხადებამდე წინასწარ უნდა გადადგმულიყო ნაბიჯები ან ფაქტები ზუსტად უნდა ყოფილიყო მოყვანილი, ამიტომ ეს ვერავითარ კრიტიკას ვეღარ უძლებს.

ინფორმაციის მომწოდებელი გაცხადებული არ არის, გამოდის, ვითომ, ახლა, ამ ომის დროს, უკრაინის დაზვერვას სცალია იმისთვის, რომ საქართველოს ტერიტორიაზე შესაბამისი დაზვერვის რგოლი ჰყავდეს. დარწმუნებული ვარ, სხვის მიერ მიწოდებულ ინფორმაციას ეყრდნობიან. ეს "ომის პარტიაა", როგორც ხელისუფლება ამბობს, თუ ზოგიერთი დასავლელი მოკავშირის შესაბამისი პოლიტიკური ჯგუფები, ვისაც უნდა პროვოცირება, რომ რუსეთი ჩართული იყოს უფრო ფართომასშტაბიანად ომში, მაგას ვერ გეტყვით.

ყველაფერ ამას დაემატა კულებას მოუფიქრებელი, ასეთივე პროვოკაციული განცხადება, რომ საქართველომ აუცილებლად მტკიცებულებები უნდა წარმოადგინოს. მარტო მთავრობას კი არა, ჩვენც, საზოგადოებას გვაინტერესებს, რამდენად მართალია ეს ამბავი და უკრაინამ უნდა წარმოადგინოს მტკიცებულება, თუ აქვს და არა - საქართველოს მთავრობამ. შემდეგ, როდესაც გამოვიდა უკრაინის რადის უშიშროების კომიტეტის ერთ-ერთი ხელმძღვანელი, თქვა, რამდენიმე დღეში მოხდება მტკიცებულებების წარდგენაო. ისეთი შთაბეჭდილება მრჩება, ახლა ცდილობენ მტკიცებულებების მოგროვებას. სიმართლე გითხრათ, ორ ქვეყანას შორის ასეთი ურთიერთობები უკვე მომაბეზრებელი ხდება. ისეთ სცენარს ვხედავთ, რაც საქართველოს, ჩვენი ქვეყნის დისკრედიტაციას გულისხმობს და არა - მთავრობის. ეს დიდი ხანია, დაწყებულია, აქ იგრძნობა "ომის პარტიის" ხელი, მაგრამ არა მგონია, გადამწყვეტი ეს იყოს, უფრო სხვა ძალებია ამაში ჩართული. მაგალითად, თუ მართლა მოხდა საქართველოს ტერიტორიაზე ასეთი ტიპის ტვირთის გადაადგილება, რასაკვირველია, ეს პროვოკაციაა და ამაში მონაწილე ადამიანები უმკაცრესად უნდა დაისაჯონ. ერთ-ერთმა სააგენტომ გაავრცელა ასეთი ტიპის ინფორმაცია, რომ საქართველოში არის გახსნილი რუსული ფირმა, რომელიც ჩრდილოეთ კავკასიაში წამსვლელი ადამიანების მეშვეობით, რუსეთში მიკროჩიპებს აგზავნის, რომელიც ძალიან მნიშვნელოვანია სამხედრო წარმოებისთვის რუსეთში.

- შეიძლება ასეთი რამ მოხდეს?

- თეორიულად ეს შესაძლებელია, მაგრამ ესეც გათვლილია საქმეში ჩაუხედავ ადამიანებზე, იმიტომ, რომ რუსეთის სამხედრო წარმოებაში გამოიყენება ჩიპები, რომლებსაც ამზადებენ ჩინეთი და ინდოჩინეთის ქვეყნები, ასევე - ტაილანდი. ეს ჩიპები იქიდან შემოდიოდა. ჩემთვის გაუგებარია, რატომ უნდა გამოეყენებინათ საქართველოს ტერიტორია თუ არა პროვოკაციისთვის? ეს პროვოკაცია რუსეთში უნდა იყოს, წესით, დაგეგმილი. დავუშვათ, ეს მიკროჩიპები არ არის შორეული აღმოსავლეთიდან, არამედ - არის დუბაიდან, როგორც ამას ეს სააგენტო წერს, არის არაბული. ან სად აკეთებენ ამას არაბები, არ ვიცი და ვერც წარმომიდგენია მაღალტექნოლოგიურად ამზადებდნენ, მაგრამ რომც დავუშვათ, ამზადებენ, თუ ეს ხდება და - საქართველოს ტერიტორიაზე, პატარა ზომის გამო, მგზავრებზე ანაწილებენ, ფულს უხდიან და მერე ამ მგზავრებს რუსეთში გადააქვთ, თეორიულად შეიძლება, თუმცა ჩემთვის ისიც რთული წარმოსადგენია, თუ ეს პროვოკაცია არ არის, ასეთი მცირე რაოდენობის ჩიპები ვის რაში სჭირდება. თან ეს ხელისუფლების დონეზე არ იქნებოდა, ორი თავი ვის აქვს? გარდა ამისა, თავდაცვის სამინისტროს განცხადებაში წერია, გაცემულია ხელისუფლებისგან ბრძანება უშიშროების სტრუქტურებისთვის, ამას ხელი არ შეუშალონო, იქ ვის აქვს ორი თავი? იმიტომ კი არა, რომ რაღაც შიშზეა საქმე, არარაციონალურია, უბრალოდ. ჯერ ერთი, ის შედეგი არ დადგება, ვიღაცა რუსეთუმე თუ ხარ და წარმოგიდგენია რუსეთზე მუშაობ, მეორეც, ძალიან დიდ ხიფათთან არის დაკავშირებული. ყველამ კარგად იცის, ჩვენს საბაჟოზე, გამტარ პოსტებზე დაყენებულია ისეთი ამერიკული პროგრამა, რომელიც ზუსტად ამოწმებს, რა ტიპის ბარგი მიაქვს თითოეულ იქ წამსვლელს.

- ანუ გამოვლენა საბაჟოზე პრობლემა არ არის?

- დავუშვათ ასეთი რამ მოხდა, გამოავლინეს დასავლურმა სპეცსამსახურებმა, მაგრამ რადგან არ არის დიდი პარტია და განსაკუთრებით მნიშვნელოვანი პარტია, არ ჩათვალეს სასკანდალო თემად და გამაფრთხილებელი ფორმა მისცეს ამას, გააფრთხილეს საქართველოს ხელისუფლება და შემდეგ ამბავი გაახმოვანებინეს უკრაინელებს, იმ პრინციპით, რძალო, შენ გეუბნები და მულო, შენ გესმოდესო. თუმცა ამაშიც სერიოზული ეჭვი მეპარება, რადგან დასავლური დიპლომატიის წარმომადგენლობისთვის პრობლემა არ იქნებოდა, პირდაპირ ეთქვათ საქართველოს ხელისუფლებისთვის, გაეფრთხილებინათ კიდევაც. ასე რომ, ეს არის ძალიან ბინძური თემა, პროვოკაციული და ამის ავტორი შეიძლება იყოს ბარიკადის ორივე მხარეს, რაც მე არა ერთხელ მითქვამს. მაგრამ ყველა ვარიანტში, უკრაინელებს ასეთი ტიპის განცხადება არ უნდა გაეკეთებინათ, ეს ჩემთვის დანაშაულია.

- ხელისუფლებამ ხელი "ნაცმოძრაობისკენ" გაიშვირა, ამ სკანდალის უკან დასახელდა ლორთქიფანიძე და სხვები, ამას უშვებთ? შესაძლოა ქვეყნისთვის ასეთი საზიანო ქმედება ჩაიდინონ?

- "ნაციონალური მოძრაობა" ქვეყანაზე ხომ არ ფიქრობს, მათი ძირითადი ნარატივი არის ის, რომ როგორმე ხელისუფლებაში დაბრუნდნენ, ამ დაბრუნების პროცესში ქვეყანას რამე დარტყმა მიადგება თუ არა, ეს არის 0,1 პროცენტის საფიქრალი, დანარჩენებისთვის ეს არაფერს ნიშნავს. ეს რამდენჯერ დაგვიმტკიცეს, თუნდაც აგვისტოს ომის კონტექსტში. რაც შეეხება სხვა ქვეყნების სპეცსამსახურების ამბავს, ეს მიხეილ სააკაშვილმაც თქვა ბრიტანული და ამერიკული დაზვერვის თაობაზე. ყველა ვარიანტში ეს არის პროვოკაცია. განცხადება პროვოკაციაა და თუ ასეთ რამეს მართლა ჰქონდა ადგილი და უკრაინელებმა ეს განცხადების ფორმით გაახმოვანეს, ეს კიდევ უარესი პროვოკაციაა. თუ მართლა მოხდა საქართველოს ტერიტორიაზე რამე ტვირთის გადაადგილება, ესეც პროვოკაციაა, ვიღაცის მიერ დადგმული, რომ საბოლოო შედეგი დადგეს, ის, რაც უნდათ.

- ამ დროს რას აკეთებენ ჩვენი სპეცსამსახურები?

- ისინი ასეთ შემთხვევას გამორიცხავენ. ამასვე გამორიცხავს ჩვენი ხელისუფლება, მაგრამ მე, როგორც გვერდიდან მაყურებელი, თავს უფლებას ვაძლევ, ეს ვერსიები წამოვაყენო.

- ამ ომის ფონზე, ეს სკანდალი რატომ აგორდა?

- ამასობაში ბევრი რამ აგორდა, იმასაც ამბობენ, კიდევ უარესს უნდა ველოდოთო. ან გრძნობენ, ან იციან, რომ ეს მოხდება. ამ ტიპის სცენარი ჩემთვის ძალიან კარგად გასაგებია, რაც დაიწყო ომის პირველი დღიდან. დღეს ხომ უკრაინელები და რადიკალური ოპოზიცია ერთსა და იმავეს იმეორებენ, რომ საქართველო არაფერს აკეთებს უკრაინის დასახმარებლად. ეს არის მათი მთავარი გზავნილი, მაგრამ მერე უცებ გადმოხტება მათი რომელიმე წარმომადგენელი და მადლობას უხდის საქართველოს ჰუმანიტარული ტვირთვისთვის, ან საერთაშორისო სანქციებში მხარდაჭერისთვის და ა.შ. ავიწყდებათ ეს სცენარი რომ მუშაობს. რაც შეეხება ვიცე-პრემიერის გამოსვლას, ის პირდაპირ ამბობს, ეს იყო იარაღიო. ეს ინფორმაცია მოქმედებს საზოგადოებაზე, როგორც უკრაინელებზე, ასევე ქართველებზე. თქვენ უნდა ნახოთ, როგორ არის აჭრელებული ჩემი მესენჯერი უკრაინიდან მოსული წერილებით, ხალხი გადარეულია, პირდაპირ გაიგეს და მართლა ჰგონიათ, რომ იარაღს ვაწვდით, ტანკს და ზარბაზანს, თვითმფრინავს და ა.შ. რაში სჭირდება რუსეთს ჩვენი მიწოდებული იარაღი? მაგრამ წარმოვიდგინოთ ასეთი სურათი, არაფერი ლარსიდან არ გასულა და ოკუპირებული ტერიტორიებიდან შევიდა, ესეც ხომ პროვოკაციაა?

- ესეც ხომ ითქვა, რომ ოკუპირებულ ტერიტორიებს იყენებდა რუსეთი, ამასაც გამორიცხავთ?

- ამასაც არ გამოვრიცხავ, ასეთი რამ შეიძლება ყოფილიყო. საიდან შედის? მაგალითად, აფხაზეთი ავიღოთ, აფხაზეთს არავისთან აქვს საჰაერო მიმოსვლა, ერთადერთი, ვისთანაც აქვს სტაბილური საზღვაო მიმოსვლა, ეს არის თურქეთი, რომელიც იარაღს აძლევს უკრაინას "ბაირაქტარის" სახით, და კიდევ სხვა იარაღს. წარმოიდგინეთ, ვიღაცამ თურქეთში შეისყიდა და ამხელა გზაზე წამოვიდა? არ მგონია... ანდა თუ გააკეთა და აფხაზეთის ტერიტორიიდან შევიდა, იგივე მცირე გაბარიტების ტექნოლოგიური საშუალებები, ეს ნიშნავს, რომ პროვოკაცია მოაწყო, რათა მოეხდინა არამარტო აფხაზების დისკრედიტაცია, არამედ საერთაშორისო სამართლის მთავარი სუბიექტისთვის - საქართველოსთვის. ასეა თუ ისე, ეს ჩემთვის პროვოკაციაა.

- მაინც რამდენად კარგად კონტროლირებადია ჩვენი საზღვრები?

- ვთქვათ, სომხეთიდან წამოვიდა ტრაილერი, შეიძლება რაღაც გააპარო, მიკროჩიპია, ძალიან პატარაა, მაგრამ დიდი პარტია რომ გაიტანო, გამორიცხულია. ეს ყველაფერი ვინ გააკეთა, არავინ იცის, საბოლოო ჯამში, კვალი იკარგება. ამიტომ ვამბობ, ყველა ვარიანტში პროვოკაციაა. თუ ეს გაკეთებულია ქართველი ჩინოვნიკებისგან, მით უფრო, პროვოკაციაა და ეს ხალხი უნდა დაისაჯოს კანონის მთელი სიმკაცრით და ქვეყნის დისკრედიტაციისთვის განსაკუთრებული სასჯელი უნდა იყოს.

- გაქვთ მოლოდინი რომ მასალები დაიდება?

- ჩვენ ისეთ სამყაროში ვცხოვრობთ, რომ მაღალი დამაჯერებელი მასალების დადებით არც ერთი მხარე თავს არ იღლის. მაინცდამაინც ბუჩას კადრები უნდა დადებულიყო, რომ მიმხვდარიყვნენ როგორი საშინელი მდგომარეობაა უკრაინაში? ისიც რუსეთის ხელისუფლებამ ფეიკად მონათლა და ამას აჰყვა ის მეხუთე კოლონა, რომელიც დასავლეთის სხვადასხვა ქვეყნებშია განლაგებული, მაღალი დონის ჩინოვნიკების და ბიზნესმენების სახით, ეს ცალკე პრობლემაა, მაგრამ რა ტიპის მტკიცებულებებიც არ უნდა დადოს უკრაინის ხელისუფლებამ, თუ ეს არ იქნება აბსოლუტურად წელში გამართული მტკიცებულები, ამის დაჯერება წარმოუდგენელია. წარმოადგინონ ვთქვათ 5-6 ოპტიკური ნივთი და თქვან რომ ეს შევიდა რუსეთშიო, შეუძლიათ ეს დადონ, მაგრამ დამაჯერებლობაა აქ მთავარი. ეს ხომ პროვოკაციული იქნება. მე მინდა ამ შემთხვევაში ასეთი ტიპის ინფორმაცია: საიდან წამოვიდა ტვირთი, ვინ წამოიღო, რა ორგანიზაციის მიერ არის ეს ტვირთი დეკლარირებული, კონკრეტულად ვის ჩაბარდა, ვინ გადაიტანა საზღვარზე, ვინ იყო იმ დღეს მებაჟე და ვინ გაატარა. ეს ყველაფერი ფირმის დასახლებით, ქვეყნის დასახლებით თუ არ იქნება, ვერ დავუჯერებთ მათ.

- რა უნდა გააკეთოს ჩვენმა ხელისუფლებამ რომ ეს ბრალდება ჩამოირეცხოს?

- ამ ოპერაციის დამგეგმავმა იცის, რომ ამის ჩამორეცხვა ხელისუფლებას ძალიან გაუჭირდება. ეს იმას ნიშნავს, მე ვიტყვი და შენ თავი იმართლეო, დღევანდელ პოლიტიკაში ეს ცნობილი ხერხია. საზოგადოების ცნობიერებაში კი რჩება პირველი ინფორმაცია, ძალიან რთულია ამის გაკეთება. საქართველოს ხელისუფლებას მაინც მართებს სერიოზული სამსახურებრივი გამოძიების ჩატარება, ამას ლაპარაკი არ უნდა. თუნდაც იმისთვის, რომ მისი აქტიურობა გამოჩნდეს, რომ ცდილობს სიმართლის გაგებას. საქართველოს ხელისუფლებამ კატეგორიულად უნდა მოითხოვოს არა მხოლოდ ამაზე პასუხის გაცემა, არამედ - პასუხი მთავარ კითხვაზე - რა უნდათ? ეს უნდა მოხდეს დასავლელი პარტნიორების თანდასწრებით და ამისთვის არ არის საჭირო კიევში ჩასვლა. არსებობს ევროკავშირი თუ სხვა ადგილები, სადაც უკრაინის მაღალი რანგის ჩინოვნიკები არიან და იქ შეიძლება მოხდეს ეს შეხვედრა.

- ჩვენი ხელისუფლების განცხადებები ხშირად ხდება კრიტიკის ობიექტი, ეს განცხადებებიც ხომ არ უწყობს ხელს?

- მე არ მომწონს მათი ბევრი განცხადება და მითქვამს, შინაარსს ვეთანხმები, ფორმას - არა. მაგრამ რაც კულებამ თქვა, ამას ანალოგი არ აქვს. წლებია ამბობენ, მეგობრები ვართო და იმან თქვა, ჩვენ დაგაბრალეთ და თქვენ თავი იმართლეთო. ხელისუფლებამ რაც უნდა განაცხადოს, ეს სხვანაირად იქნება მიწოდებული, ხალხი მუშაობს, რომ დისკრედიტირება მოახდინოს. ზოგიერთ მათგანს, ხედავთ, რა ტიპის გავლენები აქვთ უკრაინაში. რატომ უნდა ჰქონდეთ ძებნაში მყოფი ადამიანებს ასეთი გავლენა უკრაინაში, ვერ წარმომიდგენია.

- როგორ იმოქმედებს ეს განცხადებები საქართველო-უკრაინის ურთიერთობაზე?

- ძალიან მძიმე ურთიერთობები გველის წინ. ომი დამთავრდება და დარწმუნებული ვარ, ეს ომი დამთავრდება უკრაინის გამარჯვებით, მერე უკვე ამის სერიოზული გარჩევა უნდა მოხდეს. ამის ასე მიტოვება არ შეიძლება.

(სპეციალურად საიტისთვის)