„სწორედ ასე თქვა დიდმა შოთა რუსთაველმა..." - რადას თავმჯდომარე შალვა პაპუაშვილს მიმართავს - კვირის პალიტრა

„სწორედ ასე თქვა დიდმა შოთა რუსთაველმა..." - რადას თავმჯდომარე შალვა პაპუაშვილს მიმართავს

არასათანადო - ასე აღწერა საქართველოს პარლამენტის თავმჯდომარემ შალვა პაპუაშვილმა ჩემი მოწვევა ბუჩასა და ირპენის მოსანახულებლად , - ამის შესახებ უკრაინის უმაღლესი რადის თავმჯდომარემ რუსლან სტეფანჩუკმა „ფეისბუქის“ საკუთარ გვერდზე დაწერა და რუსთაველის ერთ-ერთი აფორიზმის პერიფრაზით საქართველოს პარლამენტის თავმჯდომარეს მიმართა.

„სწორედ ასე თქვა დიდმა შოთა რუსთაველმა: ერთგული მეგობარი მეგობარს დაეხმარება, მას არ ეშინია უბედურების”, - წერს სტეფანჩუკი ქართულ ენაზე.

ამასთან მისი თქმით, უკრაინა აფასებს დახმარებას.

„კოლეგავ, უკრაინა აფასებს ნებისმიერ დახმარებას, რომელსაც სხვა ქვეყნებისგან იღებს ამ რთულ დროს. ჩვენ ყოველდღე ვითხოვთ უფრო მკაცრ სანქციებს, სამხედრო, პოლიტიკურ და ფინანსურ მხარდაჭერას. არიან ქვეყნები, რომლებიც ყველა სფეროში გვეხმარებიან. არიან ქვეყნები, რომლებიც მხოლოდ ინდივიდუალურ საკითხებში გვიწევენ დახმარებას.

ჩვენ ვიცით, რომ ქართველები ყოველთვის გულწრფელი და მამაცი მეომრები არიან, რომელთაგან ბევრი დღეს გვერდში უდგას ჩვენს დამცველებს და იცავს უკრაინას რუსული შემოჭრისგან, ისევე როგორც ბევრი უკრაინელი 2008 წელს. ისინიც ქართველების გვერდით იდგნენ რუსეთის წინააღმდეგ, რომელმაც შელახა თქვენი დამოუკიდებლობა, ოკუპირება მოახდინა თქვენი ტერიტორიის ნაწილის, დახოცა თქვენი ხალხი“ ,- დასძინა უკრაინის უმაღლესი საკანონმდებლო ორგანოს თავმჯდომარემ.

სტეფანჩუკმა განაცხადა, რომ რუსეთთან დაპირისპირების პირველივე დღეებიდან, უკრაინა მხარს უჭერდა საქართველოს: პოლიტიკურ, საინფორმაციო, საერთაშორისო და სამხედრო დონეზე.

„უბრალოდ, მინდა შეგახსენოთ, რომ უკრაინული საჰაერო თავდაცვის სისტემების („ბუკ“, „ოსა“) წყალობით თქვენ დაიცავით თქვენი ცა“, - დაწერა მან.

სტეფანჩუკის თქმით, "მხარდაჭერა ყოველთვის გულწრფელი უნდა იყოს. ჩვენი ხალხები და ისტორია ყოველთვის შეგვაფასებს ჩვენ პოლიტიკოსებს“.

„ერთადერთი რამ, რაც ენითგამოუთქმელს მხდის, არის კითხვა: არის თუ არა მიზანშეწონილი უწოდო მოწვევას „არასათანადო“, რომ ჩამოხვიდე მეგობარ ქვეყანაში და დაინახო მისი გაჭირვება, გაიზიარო მისი მწუხარება, გამოხატო მხარდაჭერის სიტყვები? მეჩვენება, რომ მეგობარმა ეს უნდა გააკეთოს მოწვევის გარეშე“, - განაცხადა რადას თავმჯდომარემ.

შეგახსენებთ, 8 აპრილს საქართველოს პარლამენტის თავჯდომარემ, შალვა პაპუაშვილმა განაცხადა,რომ მანაც მიიღო რადას თავმჯდომარის მოწვევა, ჩავიდეს უკრაინაში. პაპუაშვილის განმარტებით, საკითხების განუმარტებლობის ფონზე, "ოფიციალური მოწვევა არასათანადოდ ჩანს".

ინტერპრესნიუსი