"სახლში რომ მივაცილე, ცოტა საზღვრებს გადავცდით... იმ საღამოს ვიცოდი, რომ მე ის ერთადერთი ვიპოვე"

მაისის დასაწყისში მსოფლიო კინოინდუსტრიამ და მთლიანად სამყარომ ჰოლივუდის კიდევ ერთი ლამაზი, ბრჭყვიალა და ფერადი საღამო - "მეთ გალა" იხილა, სადაც ცნობილი მსახიობები, კინორეჟისორები და მომღერლები, მათთვის შექმნილ სამოსში გამოწყობილები, წითელ ხალიჩაზე წარდგნენ. ამ წლის "მეთ გალას" თემა ამერიკაში მოდის ანთოლოგია იყო. უცხოელი ვარსკვლავები კი გრანდიოზული საღამოსთვის სპეციალურად მოემზადნენ და ხალიჩაზე ასობით ფოტოს გადასაღებად გაეშურნენ. 2022 წლის "მეთ გალაზე" საზოგადოების უდიდესი ნაწილის ყურადღება ამერიკელმა მსახიობმა ბლეიკ ლაივლიმ მიიქცია, რომელიც საღამოზე "ვერსაჩეს" ფერადი კაბით წარდგა, კიბეზე ასვლის შემდეგ კი კაბის შუაში დამაგრებული ბანტი შეიხსნა და მეორე მხარე, ცისფერი შლეიფი გამოაჩინა. კაბა ნამდვილად საოცარი სანახავი იყო, თუმცა არავინ უყურებდა კაბას, რადგან ბლეიკს კიბის ბოლოში მეუღლე ელოდებოდა, რომელიც გაბრწყინებული თვალებით უყურებდა თავის მეორე ნახევარს და ყველას მაგივრად მას უხაროდა ბლეიკის წითელ ხალიჩაზე გამოჩენა. თითქოს სწორედ ის იყო ფოტოგრაფი ან ლაივლის გულშემატკივარი დიდი არმიიდან. არავის გაჰკვირვებია, რომ იმ საღამოს მთავარ წყვილად ამერიკელი მსახიობები - ბლეიკ ლაივლი და რაიან რეინოლდსი დასახელდნენ. ბევრმა დღემდე არ იცის, რომ ამ ორის სიყვარულის ამბავი არც ისე დიდი ხნის წინ დაიწყო, თუმცა მათ დღემდე ჰოლივუდის სამაგალითო წყვილად მოიხსენიებენ. ასე ამბობენ, რომ ორივეს გაუმართლა, რადგან წლების შემდეგ მათზე ბევრს დაწერენ, მათი სიყვარულის ამბავი ხალხს გამორჩეულად დაამახსოვრდება. რაიანი ქერათმიან, მუდამ მოღიმარ ამერიკელ მსახიობს 2010 წელს გადასაღებ მოედანზე შეხვდა, სადაც ფილმში &bdquo;მწვანე ლამპარი“ რეინოლდსი მთავარ როლს ასრულებდა, ბლეიკი კი მეორეხარისხოვანი როლის შემსრულებელი მსახიობი იყო. მათი რომანი 2010 წელს უნდა დაწყებულიყო, თუმცა გადაღებები მორჩა, პრემიერაც შედგა და მსახიობები კვლავ მეგობრებად დარჩნენ. იმ დროს რაიანი სკარლეტ იოჰანსონს ხვდებოდა, ბლეიკი კი სერიალ &bdquo;ჭორიკანას“ მსახიობს - პენ ბედგლის შეყვარებული იყო. 2010 წლის ბოლო ორივესთვის ურთიერთობის დასასრული აღმოჩნდა. რეინოლდსი სკარლეტს დაშორდა, ბლეიკმა კი პენი მიატოვა. რას გამოაპარებ ჰოლივუდს? მსახიობების მარტოობამ ახალი ჭორები გააჩინა, ხმა დადიოდა, რომ ბლეიკი და რაიანი ერთმანეთს ხვდებოდნენ. 2011 წლის შემოდგომაზე მსახიობები &bdquo;ორმაგ პაემანზე“ წავიდნენ, სადაც ბლეიკი სხვა ბიჭს, რაიანი კი ყველასთვის უცნობ გოგოს შეხვდა, "ორმაგმა პაემანმა" არ გაამართლა და 2011 წლის ზამთარში ბლეიკმა და რაიანმა ერთად ყოფნის შესახებ ინფორმაცია დაადასტურეს. 2012 წლის დასაწყისში მსახიობები სამხრეთ კაროლინაში ჩუმად დაქორწინდნენ, მოკრძალებულ ცერემონიას მხოლოდ ახლობლები დაესწრნენ და წლის ბოლოს წყვილი წითელ ხალიჩაზე პირველად გამოჩნდა. &bdquo;მე ვიცი, რომ რაიანი შესანიშნავი მამა იქნება ჩვენი შვილებისთვის. ის მუდამ მობილიზებული, აქტიური და ყურადღებიანია. რაიანი ჩემი ცხოვრების ნაწილია, რადგან რასაც ვაკეთებთ, ყოველთვის ერთად ვაკეთებთ, ეს ჩვენი წესია“, - თქვა ბლეიკმა "ვოგისთვის" მიცემულ ინტერვიუში. &bdquo;თუ ვმუშაობ კინოზე, ის მეხმარება როლის მორგებაში, ასე ვიქცევი მეც. რაიანი ძალიან კარგი მწერალია, როდესაც დატვირთული კვირა გვაქვს, ცდილობს, გამამხნევოს და ჩემთვის რაღაცები, თბილი სიტყვები დაწეროს. მას თითქოს ყველაფრის საზომი აქვს, ყველაფერი იცის და მეც კარგად მიცნობს“, - ამბობს ბლეიკი მეუღლეზე. 2014 წლის შემოდგომაზე ბლეიკი კამერებიდან გაქრა, თითქოს მსახიობმა ცოტა ხნით მცირე შესვენება აიღო, რაიანს კი საყვარელი მეუღლის ამბებს ინტერვიუებში ხშირად ეკითხებოდნენ. ოქტომბრის ბოლოს ლაივლიმ თავისი გაუჩინარების მიზეზი გაამხილა და სოციალურ ქსელში პატარა მუცელი გამოაჩინა, დეკემბერში წყვილს პირველი შვილი - გოგონა, ჯეიმსი შეეძინა. სახელმა მედიაში მცირე დაბნეულობაც გამოიწვია. ჯეიმსი ბევრისთვის ბიჭის სახელთან ასოცირდებოდა, თუმცა ჯეიმსი ბავშვის შემოკლებული სახელია და ეს წყვილისთვის პრობლემას არ წარმოადგენს. 2016 წელს ყვითელი პრესა ბლეიკის მეორე ორსულობაზე ალაპარაკდა, ჭორები კვლავ გამართლდა და ინეზ რეინოლდსი დაიბადა. მეორე შვილის გაჩენის შემდეგ რაიანმა ამერიკულ ჟურნალში ოჯახზე ილაპარაკა და პირველად გაიხსენა მისი და ბლეიკის სასიყვარულო ურთიერთობა. &bdquo;პატარა რესტორანში ვსადილობდით, გვიანი იყო, თითქმის მარტოები ვიყავით. რესტორანში მუსიკა უკრავდა, ბლეიკს ვკითხე, გინდა, ვიცეკვოთ-მეთქი? ის კი დამთანხმდა. იმ საღამოს სახლში რომ მივაცილე, ცოტა საზღვრებს გადავცდით, მერე რა მოხდა, არ გავიხსენებ, თუმცა იმ საღამოს ვიცოდი, რომ მე ის ერთადერთი ვიპოვე“, - გაიხსენა რეინოლდსმა. 2016 წლის დეკემბერში რეინოლდსების ოჯახი წითელ ხალიჩაზე გამოჩნდა, რაიანის ვარსკვლავის გახსნაზე მთელი ყურადღება ინეზმა მიიქცია, პატარა გოგოს დებიუტმა და ამ ერთიანმა ოჯახმა საზოგადოებას კიდევ ერთხელ დაანახა მათი სიყვარული. რაიანს ხელში ჯეიმსი ეჭირა, ბლეიკს - ინეზი და მათი პატარა, ლამაზი ოჯახი ათასობით მოსიყვარულე ადამიანში დიდ ბედნიერებას ასხივებდა. ...და აი, კიდევ ერთი შვილი! რეინოლდსების ოჯახში მესამე გოგონა გაჩნდა, 2020 წელს ბლეიკსა და რაიანს ბეტი რეინოლდსი შეეძინათ. რაიანი შვილის დაბადებას ემოციებით და სიხარულით შეხვდა. &bdquo;მომწონს სამი გოგოს მამობა, ალბათ, მილიონი წელიც ვერ წარმოვიდგენდი, რომ გოგონების მამა ვიქნებოდი. მე ბიჭებში გავიზარდე, სამი უფროსი ძმა მყავს, ყველაზე პატარა ვარ და ვიცი, რა განცდაა დედმამიშვილების ყოლა. ახლა უკვე კარგად მესმის რამხელა თავგადასავალია, იყო სამი გოგოს მამა. არ ვხუმრობ, ეს გოგონები მთელ სამყაროში ყველაზე ამოუცნობი არსებები არიან და სწორედ მათი დახმარებით ვსწავლობ, როგორ გავუმკლავდე ცხოვრებაში ცეცხლს და ქარიშხალს“, - თქვა რაიანმა ერთ-ერთ ინტერვიუში. ალბათ, დღეები არ გვეყოფა იმაზე სალაპარაკოდ, რომ ავხსნათ, თუ როგორ უყვართ ერთმანეთი მსახიობებს, თუმცა მათ ურთიერთობას ამაზე საუბარი და დამტკიცება ნამდვილად არ სჭირდება. რაიანის და ბლეიკის პოსტები სოციალურ ქსელში, ერთმანეთის გამამხნევებელი გამოსვლები და სიყვარულით სავსე მზერა ისედაც ყველაფერს ამბობს. იმაზე არავინ ლაპარაკობს, რომ რაიანს შვილები სამყაროში ყველასა და ყველაფერს ურჩევნია. მსახიობების ფანების დიდი არმია ხშირად წერს, რომ მხოლოდ მათი ყურებით მიხვდები, რას ნიშნავს პატივისცემა, გაგება და ერთიანობა. 2016 წელს, რაიანის ვარსკვლავის გახსნაზე, მსახიობმა სცენიდან მიმართა ბლეიკს, რაიანის გამოსვლა სოციალურ ქსელებში თვეების განმავლობაში ტრიალებდა. &bdquo;მინდა, მადლობა გადავუხადო ჩემს ცოლს, ბლეიკს, რომელიც აქ ზის და მუდამ გვერდში მიდგას. ის ჩემთვის ყველაფერია. მინდა იცოდე, რომ შენ ჩემს ცხოვრებაში საუკეთესო მოვლენა ხარ, შენ შეცვალე ყველაფერი უკეთესობისკენ და ორი არაჩვეულებრივი ადამიანი მაჩუქე, რომელთა ყოლაზეც ვერასდროს ვიოცნებებდი“, - თქვა რაიანმა სიტყვით გამოსვლის დროს. &bdquo;მაპოვნინეთ მასზე უკეთესი მეგობარი, მე დაგელოდებით“. &bdquo;ხანდახან, კიდევ არ მჯერა, რომ დაქორწინებულები ვართ“ - დაწერა ბლეიკმა ერთ-ერთ ფოტოზე. 2021 წელს, დედის დღეს, რაიანმა ბლეიკს დიდი სასიყვარულო მისალოცი ტექსტი დაუწერა, სადაც საყვარელ მეუღლეს თითოეული დღისთვის საჯაროდ გადაუხადა მადლობა. &bdquo;მადლობელი ვარ იმ სინათლისა და სიკეთისთვის, რომელსაც "კონტრაბანდულად" ახორციელებ ჩვენი ცხოვრების ყოველ წამში. ჩვენი შვილების თვალებში გხედავ... მათ ყოველ სიცილში. ყველა შემთხვევაში ვფიქრობ, გამიმართლა, რომ შენი მზის სხივი ჩემამდეც მოვიდა, ამ სხივს კი შენ თითოეული ჩვენგანისთვის ყოველ წამს ასხივებ. გილოცავ დედის დღეს, ჩემო სიყვარულო“, - დაწერა რაიანმა ინსტაგრამზე. (სპეციალურად საიტისთვის)