"სისხლში, ფილტვებში ყველას ფოსფორი აღმოგვიჩინეს“
რუსებმა დონეცკის მისადგომებთან ფოსფორის რაკეტა გამოიყენეს, რომელიც საერთაშორისო კანონმდებლობით აკრძალულია. შედეგად ათი ქართველი მეომარი მოიწამლა, თუმცა ყველა გადარჩა. ერთ-ერთი, ავთო ქაჯაია, დღეს ჩვენი სტუმარია.
- 2002-დან 2017 წლამდე ვირიცხებოდი საქართველოს ჯარში. 2018 წელს პოლონეთში წავედი. უკრაინაში ომი რომ დაიწყო, სამ დღეში უკვე იქ ვიყავი და შეიარაღებულ ძალებში ჩავირიცხე. ყოველთვის ვიქნები იმ ქვეყნის გვერდით, რომელსაც რუსეთი დაემუქრება... 2014 წლიდან რუსეთის ჯარები განლაგებულია დონეცკის მისადგომებთან ძალიან ახლოს. იმ დღეს პოზიციებზე გამაგრებული იყვნენ როგორც უკრაინელები, ისე, 100 მეტრის მოშორებით, რუსები. ჩვენ დაგვევალა შეტევაზე გადასვლა და პოზიციების გადანაცვლება. დავალების შესასრულებლად წავედით და მიუხედავად იმისა, რომ ორჯერ მეტი მებრძოლი დაგვხვდა, მაინც მოვერიეთ...
- და რუსული ჯარი ორჯერ იმაზე უკან გადაისროლეთ, ვიდრე დავალება გქონდათ?
- გადავისროლეთ კი არა, ადგილზე დავტოვეთ... პირველი დღე იყო ამ პოზიციების განადგურება, დაკავება. მეორე დღეს 500-600 მეტრით წინ წავიწიეთ. ამ ორი დღის განმავლობაში ჭურვების წვიმაში ვიყავით. ჯარისკაცები დაიჭრნენ, ზოგმა კონტუზია მიიღო. ათნი დავრჩით. უსაფრთხოების გამო ორ-სამ საათში ერთხელ ვიცვლიდით პოზიციებს. დილის 4 საათი იქნებოდა, მე და ჩემი მეგობარი ვპატრულირებდით, როცა ჩვენ გვერდით ტერიტორიაზე, სადაც მანამდე ვიყავით დაბანაკებული, ფოსფორის რაკეტა გასკდა. ჰაერში სკდება და ფოიერვერკივით ჩამოდის... ამდენი წელი ჯარში გვაქვს გატარებული, თითქმის ყველანაირი ბომბისა თუ რაკეტის შეფასება შეგვიძლია და სუნის მიხედვით ვხვდებით, რა არის... მაშინვე წამოვხტით და შევცვივდით რაღაც ქოხში, კარი, ფანჯრები ნაჭრებით ამოვქოლეთ, მაგრამ სუნმა მაინც შემოაღწია. ფოსფორი ნისლივით მოდის...
ცოტა ხანში დაგვეწყო ჰაერის უკმარისობა, გულისრევა. ფოსფორით მოწამვლას ახასიათებს სუნთქვის შეკავება, ჟანგბადის უკმარისობა, თვალების წვა, აზიანებს სასუნთქ ორგანოებს. ყველაზე რთული ფილტვების დაზიანებაა... ველოდებოდით გათენებას, რომ რამე მოგვეხერხებინა. ისეთ ადგილას ვიყავით, ჩვენი პატრონი არავინ იყო. 50 კმ იყო გასავლელი, სამშვიდობომდე რომ მიგვეღწია. აქვე ქართული ლეგიონია და ამ ბიჭებმა იზრუნეს, რომ სამედიცინო დაწესებულებამდე ჩამოვეყვანეთ. ლეგიონის ექიმი ბატონი ირაკლი დაგვხვდა თავისი კოლეგებით. საავადმყოფო გაფრთხილებული ჰყავდათ და მოგვხედეს. სისხლში, ფილტვებში ყველას ფოსფორი აღმოგვიჩინეს, სასუნთქი გზებიც დამწვარი გვაქვს. არ ვიცი, რა მოგვივიდოდა, იქ რომ დავრჩენილიყავით.
- რაც მთავარია, თქვენ მიერ გადაწეული საზღვრები შენარჩუნებულია...
- კი და კიდევ გადაიწიაო, ამბობენ, თუმცა რაც ჩემი თვალით არ მინახავს, გადაჭრით ვერ ვიტყვი. ადგილობრივი ბატალიონის ბიჭები მადლობას გვითვლიან, თქვენი გამოცდილება გამოგვადგაო. მინდა მალე გამწერონ, რომ ჩვენი დაწყებული საქმე ბოლომდე მივიყვანოთ - ისტორიულ საზღვარს უნდა გავცდეთ. უკრაინელებმა ქართველი "ანგელ ხრანიტელები" შეგვარქვეს. ეს მოტივაციას გვმატებს და ყველაფერს გავაკეთებთ, რომ მტერზე გავიმარჯვოთ. რუსეთს ბოლო უნდა მოეღოს.