"ერეკლე მეორეს რომ იფარებენ ახლა უსინდისოდ... "ქოცური" სტანდარტით დავით აღმაშენებელი ყველაზე ცუდი მეფე იყო"
ოპოზიციონერი პოლიტიკოსი, გიგი უგულავა მიიჩნევს, რომ ხელისუფლების წარმომადგენლები "ყველაფერზე წამსვლელები" არიან ძალაუფლების შესანარჩუნებლად. უგულავას თქმით, "ქართული ოცნება" ახლა ერეკლე მეფეს "იფარებს." ამ საკითხზე მან "ტვ პირველის" ეთერში, გადაცემაში "ღამის ამბები" ისაუბრა.
"ყველა ელოდება ამ ომის დასრულებას, იმიტომ რომ ომის შიში ქვეყანაში მაშინ ჰიპერტროფირდება, როდესაც ხელისუფლება აღვივებს. ასეთი ხელისუფლება, არ ვიცი... ერეკლე მეორეს რომ იფარებენ ახლა უსინდისოდ, ერეკლე მეფე ასეთ ხალხს გვერდზე არ დაიყენებდა კი არა, სიკვდილით დასჯიდა. "ქოცური" სტანდარტით დავით აღმაშენებელი ყველაზე ცუდი მეფე იყო ამ ქვეყანაში.
ყველაფერზე წამსვლელები არიან იმიტომ, რომ იციან საღამოს მათი პროპაგანდისტული მახვილი ამას გაიტანს და საბოლოო ჯამში, იმას, ვისაც უნდა დააჯეროს, დააჯერებს, ან კითხვის ნიშნებს გაუჩენს.
ამ ომის პირობებში ახლა ჩვენ შევედით უკვე ისეთ ფაზაში, რომ ეს თამაში აღარ გამოვა, ახლა იქნება - ან იქით უნდა წახვიდე და ან -აქეთ.
ფაქტია, რომ "ქართული ოცნება", როგორც მოვლენა, რომელიც შვა ბიძინა ივანიშვილმა, სამწუხაროდ ეფუძნება ყველაზე განუვითარებელ, ყველაზე ბნელ ინსტინქტებს, რომლებიც ჩვენ, როგორც ადამიანებს, როგორც სოციუმის წევრებს გვაქვს, ადამიანებს, რომლებიც საბჭოთა კავშირიდან გამოვედით. ყველა ამ ბნელ ინსტინქტზე დაფუძნებით, მისი კულტივაციით, ნაკვერჩალს რომ სულს უბერავ და აღვივებ, ასე ცდილობენ იმ ყველაფრის გაღვივებას, იმისთვის, რომ მხოლოდ და მხოლოდ ერთი რამ - ძალაუფლება შეინარჩუნონ", - ამბობს უგულავა.